Šireletša Monagano wa Gago
1. Sehlogo sa kopano ya tikologo ya ngwaga wa tirelo wa 2013 se reng, gomme morero wa lenaneo leo ke ofe?
1 Jesu o rutile barutiwa ba gagwe gore ba rate Jehofa ka dipelo tša bona ka moka, meoya ya bona ka moka le menagano ya bona ka moka. (Mat. 22:37, 38) Dikopano tša lenyaga tša selete le tša tikologo di hlametšwe go re thuša gore re matlafatše motho wa rena wa ka gare. O tla gopola gore sehlogo sa kopano ya rena ya selete ya 2012 se re: ‘Šireletša Pelo ya Gago!’ Lenaneo la kopano ya letšatši le kgethegilego ya ngwaga wa tirelo wa 2013 le na le sehlogo se rego: “Šireletša Letswalo la Gago.” Ge e le lelokelelo la dikopano tša tikologo leo le thomago kgweding e tlago le tla ba le sehlogo se rego: “Šireletša Monagano wa Gago,” gomme se theilwe go Mateo 22:37. Lenaneo le le hlametšwe go thuša yo mongwe le yo mongwe wa rena gore a lekole dikgopolo tša gagwe ka morero wa gore di kgahliše Jehofa ka mehla.
2. Re swanetše go nyaka dikarabo tša dipotšišo dife nakong ya lenaneo?
2 Seo re Tlago go se Rutwa: Ge re dutše re theeditše lenaneo leo la kopano ya tikologo, re swanetše go nyaka dikarabo tša dipotšišo tše, e lego tšona dintlhakgolo tša kopano:
• Re ka phema bjang go “nagana dikgopolo tša batho”?
• Re ka thuša bjang go tloša seširo seo se foufatšago menagano ya bao ba sa dumelego?
• Re nyaka go ba le boemo bofe bja monagano?
• Go naganišiša ka dilo tšeo di nago le mohola go re thuša ka’ng?
• Re ka dumelela Jehofa bjang go tutuetša menagano ya rena?
• Ke bjang banna, basadi, batswadi le bana ba ka dirago gore go be le lethabo ka lapeng?
• Re ka itokišetša bjang letšatši la Jehofa?
• Go hlamela menagano ya rena modiro go bolela’ng?
• Go diriša seo re ithutago sona go re hola ka’ng?
3. Ke ka baka la’ng go le bohlokwa gore re be gona matšatšing ka bobedi a kopano, re theetše ka kelohloko gomme re diriše seo re ithutago sona?
3 Sathane o lwela go senya menagano ya rena. (2 Bakor. 11:3) Ka gona, re swanetše go šireletša menagano ya rena gomme re laole dikgopolo tša rena. Re swanetše go dula re bonagatša monagano wa Kriste gomme re lwe le ditutuetšo tša lefase le leo le se nago molao. (1 Bakor. 2:16) Ka gona rulaganya gore o be gona matšatšing ka bobedi a kopano ya tikologo. O theetše ka kelohloko. Go diriša ga rena tsebišo e bohlokwa yeo re tlago go e rutwa moo go tla re thuša gore re hlamele menagano ya rena go dira tirelo ya Mmušo ka phišego.—1 Pet. 1:13.