Kopano ya Tikologo Yeo e Tlago go re Thuša go Šireletša Bomoya bja Rena
1. E nngwe ya ditokišetšo tše di tšwago go Jehofa bakeng sa go re thuša go phethagatša thomo ya rena ya go tsebatša ditaba tše dibotse ke efe?
1 Ka seatla se se bulegilego, Jehofa o nea tsebišo, tlwaetšo le kgothatšo tše re di nyakago gore re kgone go phethagatša thomo ya go tsebatša ditaba tše dibotse. (Mat. 24:14; 2 Tim. 4:17) Kopano ya rena ya tikologo ya ngwaga le ngwaga ke e nngwe ya ditokišetšo tše bjalo. Lenaneo le lefsa la ngwaga wa tirelo wa 2010 le tla godiša sehlogo se se rego “Šireletša Bomoya bja Gago,” seo se theilwego go Baroma 8:5 le Juda 17-19. Go lokišeleditšwe gore le thome ka beke ya August 31, 2009.
2. (a) Kopano ye ya tikologo e tla re hola ka ditsela dife? (b) Dikopano tša tikologo tša nakong e fetilego di go thušitše bjang bodireding?
2 Kamoo re tla Holegago ka Gona: Lenaneo le le tla re lemoša ka dikotsi, tše bjalo ka ditšhitišo tše di re amogago nako gomme tša tloša tlhokomelo ya rena go seo se tlogago se le bohlokwa. Re tla ithuta kamoo re ka phemago moya wa go tlogelela dilo gomme re tla hlahloba seo go ba motho wa moya go se bolelago. Tšhiedišano ya ka Sontaga e tla bontšha kamoo batho ba le ka o tee ka o tee e bile e le malapa ba ka gatago megato ya go matlafatša bomoya bja bona ge ba gateletšegile kudu le ge ba lekwa kudu tumelong. Lenaneo le le tla re thuša go šireletša dipelo tša rena, go hlokomela go phela ga rena gabotse moyeng le go dula re gopotše ka ditšhegofatšo tše dikgolo tšeo di letetšego bao ba šireletšago bomoya bja bona.
3. Kopano ya lena ya tikologo e neng gomme le swanetše go ikemišetša go dira’ng?
3 Ge o tsebile gore kopano ya lena ya tikologo e tla swarwa neng le gore e tla swarelwa kae, dira dithulaganyo tša go ba gona le go tlo theetša mananeo ka moka a matšatši a mabedi. Kgodišegang gore Jehofa o šegofatša diatla tša motho yo mafolofolo.—Die. 21:5.
4. Ke’ng seo re kgodišegilego gore re tla se hwetša kopanong ya rena e tlago ya tikologo?
4 Ruri Jehofa ke Monei wa mpho ye e botse. Lenaneo leo le lokišeleditšwego ke sehlopha sa mohlanka yo a botegago e tla ba selo seo re se nyakago gore re tšwele pele re le badiredi ba Bakriste. Re leboga Jehofa ka ditokišetšo tša gagwe tše lerato tšeo di re thušago go “[kgomarela] boipolelo bja phatlalatša bja kholofelo ya rena re sa teka-teke.”—Baheb. 10:23-25; Jak. 1:17.