Tokišetšo ya Badiredi ba Bakriste
1. Ke tokišetšo efe e mpsha yeo e ilego ya thoma ka 1938, gona ka morero ofe?
1 Ka 1938, mokgatlo wa Jehofa o ile wa thoma tokišetšo e mpsha. Diphuthego di ile tša laletšwa go ba gona dikopanong tša lefelo, tšeo ga bjale di bitšwago dikopano tša tikologo. Ka morero ofe? Tokollo ya Informant ya January 1939 (yeo ga bjale e lego Tirelo ya Rena ya Mmušo) e araba ka gore: “Dikopano tše ke karolo ya mokgatlo wa Jehofa wa Pušo ya Modimo bakeng sa go tšwetša pele tirelo ya gagwe ya Mmušo. Tlhahlo yeo e newago moo ke ya bohlokwa bakeng sa motho yo mongwe le yo mongwe e le gore a dire gabotse modiro wo re o abetšwego.” Ge re ela hloko koketšego ya bagoeledi ba Mmušo go tloga go ba 58 000 feela ka 1938 go ya go ba fetago 7 000 000 ka 2009, go molaleng gore dikopano tša tikologo, di phetha morero wa tšona wa go thuša badiredi ‘go dira modiro wo ba o abetšwego’!
2. Ke tsebišo efe yeo e tlago go newa kopanong ya rena ya tikologo ngwageng o mofsa wa tirelo?
2 Sehlogo sa Ngwaga o Tlago: Re fagahletše kopano ya tikologo yeo e tlago go thoma ka September le kgothatšong yeo e tlago go newa moo. Sehlogo sa yona se re, ‘Ga le Karolo ya Lefase’ go tšwa lengwalong la Johane 15:19. Ke dipolelo dife tše dingwe tšeo ruri di tlago go hola badiredi ba Bakriste? Ka Mokibelo re tla kwa polelo e nago le sehlogo se se rego: “Tirelo ya Nako e Tletšego e a re Šireletša—Bjang?” Le gona re tla thabela tšhiedišano ya dikarolo tše tharo yeo e nago le sehlogo se se rego: “Le se ke la Šilafatšwa ke . . . ” “Sebata,” “Mogweba-ka-mmele yo Mogolo” le “Babapatši ba Basepedi.” Ka Sontaga re tla kwa tšhiedišano yeo e nago le sehlogo se se rego: “Rata Jehofa, e Sego Lefase.” Dipolelo tše dingwe di akaretša tšeo di rego: “Tšwelang Pele le le ‘Badiiledi e Bile le le Badudi ba Nakwana’” le “E-bang Sebete! Le ka Fenya Lefase.”
3. Go ba gona kopanong ya tikologo go ka re hola bjang?
3 Ka morago ga go ba gona kopanong ya tikologo ya morago bjale, kgaetšedi yo mongwe yo a bego a goga maoto bodireding o ngwadile gore lenaneo leo le dirile gore a hlahlobe lefsa maemo a gagwe le go ikemišetša go “ya tirelong gomme a kgaotše go itirela sehlare sa ntšhirela!” Ga go pelaelo gore lenaneo la kopano ya tikologo la ngwaga o mofsa wa tirelo le tla re thuša ka moka ga rena gore re rate Jehofa go e na le go rata lefase. (1 Joh. 2:15-17) Kgonthišetša gore o ba gona le go theetša ka kelohloko gore o tle o holege ka botlalo tokišetšong ye e lerato ya badiredi ba Bakriste!