Go Leboga Babulamadibogo Ba Rena
1 Badiri-gotee ba Mmušo wa Modimo ba a matlafatšana. (Ba-Kol. 4:11) Ge re ela hloko gore modiro o mogolo kudu wa phuthego ya Bokriste ke go bolela ditaba tše di lokilego, gona go na le mabaka a tutuetšago a gore re leboge badiri ba nako e tletšego bao ba lego gare ga rena.—Mar. 13:10; Ba-Roma 16:2; Ba-Fil. 4:3.
KA BAKA LA’NG?
2 Ka tsela e lebanyago, babulamadibogo ba aga diphuthego ka go šoma le bagoeledi bao ba nago le phihlelo e nyenyane dibopegong tše fapa-fapanego tša modiro wa boboledi. Se se akaretša go nea bohlatse ka dimakasine, go lokišeletša le go dira dipoelo, go thoma le go swara ka mo go atlegago dithuto tša magae tša Beibele. Go oketša moo, babulamadibogo ba ka bea mohlala tabeng ya go nea bohlatse ka sebete ka mo go sa rulaganyetšwago. Go thekga ga bona dithulaganyo tša go nea bohlatse ka sehlopha tša gare ga beke go ba nea sebaka sa go ba thušo go ba bangwe. Tutuetšo ya bona e botse tirelong ya tšhemo e ka kwewa ka mo go kgethegilego ge babulamadibogo ba thekga tirelo ya tšhemo ya mafelo-bekeng, e lego nako yeo ka yona bagoeledi ba bangwe ba bantši ba kgonago go ba le karolo.
3 Babulamadibogo ba thuša diphuthego go akaretšeng tšhemo ka botlalo le gantši. Se se thuša batho gore ba tlwaelane kaone le molaetša wa rena gomme ba ikwe ba lokologile kudu ge re ba etela ka gobane ba re tseba. Diiri tše dintši tšeo babulamadibogo ba di dirišago tšhemong ba tlogelela batho ba thabelago dipuku le go hlagolela go thabela—ge e le gabotse, ba bjala le go nošetša dipeu tša therešo—di ka lebiša feela tšhemong e tšweletšago dienywa kudu.—1 Ba-Kor. 3:6.
KA PHUTHEGONG
4 Ba bantši ba kgothaleditšwe go tsenela tirelo ya nako e tletšego ka gobane dipelo tša bona di be di kgomilwe ke phišego le mafolofolo a babulamadibogo ba botegago. Kgaetšedi o mongwe o be a dika-dika go ka ba mmulamadibogo wa ka mehla ka gobane go be go se na mmulamadibogo le o tee ka phuthegong. Eupja ge a kgothaditšwe ke molebeledi wa tikologo, o ile a tšwela pele gomme a ngwadiša. Ba bangwe kapejana ba ile ba latela, gomme phuthego yeo mo nakong ye e na le palo ya go bonala ya babulamadibogo ba fišegago.
5 Go ka ba le dinako tše dingwe tšeo ka tšona bagolo ba ka kgopelago mmulamadibogo go thuša motho yo a fetogilego yo a sa tšwego ka mehla goba yo a tapilego. Thušo ye e ka akaretša go swara thuto ya Beibele le motho yoo. Ka gona tumelo le phišego tša mmulamadibogo di ka tlaleletša tabeng ya go tsošološa lerato la motho bakeng sa therešo gomme tša thuša go mo fa mafolofolo gape gore a šomele go phethagatša boikarabelo bja boineelo bja gagwe.—1 Ba-Thes. 5:14.
KGOTHATŠA BABULAMADIBOGO
6 Babulamadibogo, gaešita lege ba dira go gontši go kgothatša ba bangwe, bona ka noši ba nyaka kgothatšo e le gore ba tšwele pele ba thabile tirelong ya bona. (Ba-Roma 1:12) Na o bolela ka mo go swanetšego ka bodiredi bja bobulamadibogo? Ke neng la mafelelo moo o ilego wa reta mmulamadibogo ka modiro wa gagwe le moya wa boikgafo? Babulamadibogo ba leboga kudu go ba le motho yo ba šomago le yena tirelong ya tšhemo nakong ya diiri tša letšatši tšeo ka tšona bagoeledi ba sego kae ba tšwelego. Na o ka sepela gotee le babulamadibogo gomme mohlomongwe o diriše diiri tše teletšana e le go thekga modiro wa boboledi?
7 Ke bjang gape moo o ka kgothatšago babulamadibogo? Ka ntle le go ba reta, o ka bontšha go leboga ga gago badiri ba bjalo ba dirago ka thata ka tsela bonagalago ka go ba laleletša dijong, go ba thuša ka go ithatela ka ditshenyagalelo tša tša go sepela le go ba thekga ka ditsela tše dingwe ge o kgona.—Bapiša le 1 Ba-Thesalonika 5:12, 13.
8 Ge bagolo le bahlanka ba bodiredi ba etelela pele ka phuthegong, babulamadibogo le bagoeledi ba tla thekga ka mo go tletšego dithulaganyo tša tirelo tše di rulagantšwego gabotse. Ka baka leo, ka moka ga rena re tla ba re diriša dimpho lege e le dife tšeo re nago le tšona ‘go direlana.’—1 Pet. 4:10, 11.