Bolela Ka Tsela Ya Modimo E Išago Khutšong Le Polokegong

1 Batho ba ile ba dira dikholofetšo tše dintši tša khutšo le polokego, eupja ga go le e tee ya tše yeo e kgotsofatšago dinyakwa tša kgonthe tša batho lefaseng ka bophara. Gaešita lege lehloyo la bodumedi, la merafo le la setšhaba di kopane le boikgogomošo le megabaru ya tša dipolitiki di bonala e le mapheko a magolo a lefase la polokego le khutšo, Bakriste ba therešo ba tseba gore mapheko a kgonthe ke Sathane Diabolo le go gana ga motho go ikokobeletša Jehofa Modimo.—Ps. 127:1; Jer. 8:9; 1 Joh. 5:19.

2 Ka January re tla katanela go thuša baagišani ba rena go lemoga gore tsela ya Modimo e išago khutšong le polokegong ke yona tsela e nnoši le gore Jehofa o na le tharollo e phalago tšohle ya mathata ka moka a batho.

3 Go Diriša Mpho: Re ka abelana le ba bangwe molaetša wo o agago ka go diriša mpho e šišintšwego bakeng sa January, e lego puku ya O ka Hwetša Bjang Khutšo ya Kgonthe le Polokego? ka moneelo wa R2,60. (Hle hlokomela: Go ka ba go sepedišwa dipuku tše di fapanego ka maleme a mangwe. Hle lebelela ditsebišo ka leleme la gago go bona dipuku tšeo di swanetšego go sepedišwa.)

4 Batho ba dimilione lehono ba nyamile gomme ba hlologetše nako ya phodišo le khutšo ya kgonthe, polokego le khutšo ya monagano. Puku ya O ka Hwetša Bjang Khutšo ya Kgonthe le Polokego? e ka ba mothopo wa kgonthe wa kgothatšo go ba bangwe. Khutšo ya kgonthe le polokego di ka tšwa mothopong o tee feela, e lego Jehofa Modimo. Ka ge Jehofa e le mothopo o nnoši wa khutšo ya kgonthe, batho ba swanetše go ‘rotogela thabeng ya Jehofa’ gomme ba rutwe ditsela tša gagwe. (Mika 4:2, 3) Puku ye e tla thuša batho ba dipelo tše di botegago gore ba ithute kamoo Jehofa, ka Mmušo wa gagwe a tlago go tliša khutšo le polokego tše di sa felego lefaseng le.

5 Batho ba bantši ba ipotšiša ge e ba maiteko a gona bjale a khutšo a tla atlega. Puku ya Khutšo ya Kgonthe e ka ba homotša ka tsebo ya gore Modimo o tla tlišetša batho khutšo e sa felego. Morero wa gagwe ka lefase ga o dumelele go senywa ga lona ke batho. Tlala, bodiidi bjo bo se nago kholofelo le go se be le magae ke maemo a letšatši le letšatši a batho ba dimilione nageng ye. Puku ya Khutšo ya Kgonthe e šupa tharollong e nnoši ya kgonthe bakeng sa mathata. Go se bolokege ga motho ka noši ka baka la bosenyi bjo bo golago go dira gore ba bantši ba ikwe ba le bjalo ka bagolegwa ka magaeng a bona ka noši. Puku ya Khutšo ya Kgonthe e nea tshedimošo ya Mangwalo ka tharollo.

6 Ditsela tša mehleng yeno tša go phela, go akaretša go dirišwa gampe ga matla ao a neilwego ke Modimo a tša botona le botshadi di sentše maphelo a batho le malapa a sa balegego. Puku ya Khutšo ya Kgonthe e šupa go ditekanyetšo tša Modimo le tšhireletšo tšeo di newago bao ba kgethago go phela ka tšona. Ke ka baka la’ng o sa boeletše lelokelelo la dikagare tša yona le dikgaolo tša puku tšeo di ka kgahlišago batho tšhemong ya lena?

7 Thoma Dithuto tša Beibele: Re swanetše go ithapela go swara thuto ya Beibele nakong e nngwe le e nngwe ge re sepediša puku. Gape re kgothaleditšwe go thoma dithuto tša Beibele ka pampišana, pukwana (brochure) goba makasine. Ge e ba o lemoga gore mong wa ntlo o šetše a e-na le e nngwe ya dipuku tša rena, ithapele ka bohlale go bontšha kamoo e ka dirišwago ka gona thutong ya Beibele. Dipampišana le dipukwana ke ditlabakelo tše di kgahlišago kudu tšeo di ka dirišwago moo batho ba ka bago ba sa kgone go lefelela dipuku tša rena tše di tlemilwego.

8 Polokego ya kgonthe e ka tšwa feela go Mmopi, Jehofa Modimo. Re nyaka go thuša ba bantši ka mo go kgonegago gore ba bule dipelo tša bona le menagano bakeng sa therešo ya Lentšu la Modimo gomme ba amogele kholofelo yeo le re swaretšego yona. Eka re ka diriša ka mo go holago dithušo tša go ruta tšeo re nago le tšona bakeng sa go bolela ka tsela ya Modimo e išago khutšong le polokegong.—Jes. 2:3, 4.