Go Boela Bakeng sa go Aga Tebogo
1 Maeto a go boela a nago le morero a tutuetša ka mo go tšwelago pele le go oketša kgolo ya mong wa ntlo ya go ba modumedi. Ditšhišinyo tše dingwe tše di šomago ke dife tšeo di ka gopolwago ge go boelwa go bao ba bontšhitšego kgahlego?
2 Sa pele-pele, lokišetša gabotse. Se se thoma ketelong ya mathomo. Bjang? Ka go boloka dipego tše di nepagetšego tša kgahlego ye e bontšhitšwego. Ngwala leina la mong wa ntlo, taba yeo e ahla-ahlilwego, kamoo a arabetšego ka gona le dipuku lege e le dife tše di sepedišitšwego. Ka morago hlahloba pego ya gago ya ntlo le ntlo pele ga ge o ka boela, gomme o naganišiše ka thapelo seo o tlago go se bolela.
3 Bjale o itokišitše. O ka re’ng? Ge e ba o tlogeletše mong wa ntlo potšišo ketelong ya pele, gona o ka agela tabeng yeo ge o boela. Ka mohlala, ketelong ya mathomo, ka morago ga go lebiša tlhokomelo ya mong wa ntlo go letlakala 8, serapa 12 la puku ya Go Tsoma ga Batho Modimo, o ka rotoša potšišo e rego, “Ke ka baka la’ng o swanetše go nyakišiša bodumedi bja gago?”
Ge o boela, ka morago ga go ithola, mo gongwe o ka re:
◼ “Ge re be re boledišana nakong e fetilego, re ile ra botšiša lebaka leo ka lona re swanetšego go rata go nyakišiša bodumedi bja rena. Na o ile wa naganišiša seo gape? [Dumelela karabo.] Na o nagana gore Modimo o amogela madumedi ka moka? [Dumelela karabo.]” Elang hloko diswantšho tše di lego go matlakala 11 le 13 ka pukung ya Go Tsoma ga Batho Modimo. Ka morago ga go bolela ka diswantšho tše, mo gongwe o ka rata gape go bolela ka taba ye e lego ka lepokising go letlakala 14. Hlalosa gore gaešita lege re rata go hlompha ditumelo tša motho yo mongwe tša bodumedi, fela ka nako e swanago re rata go kgonthišega gore re rapela Modimo ka tsela yeo a e amogelago. Gore o bule tsela bakeng sa leeto le lengwe la go boela, mo gongwe o ka botšiša e nngwe ya dipotšišo tše di lego go letlakala 17 goba 18 gomme wa ithapela go boa gore o tle o arabe potšišo yeo.
4 Ge e ba ketelong ya gago ya mathomo o ile wa ahla-ahla ditsela tša go hlaola bodumedi bja therešo gomme wa tlogela puku ya Go Tsoma ga Batho Modimo, gona potšišo e botse yeo o ka theago go yona leeto la gago la go boela e ka ba: “Madumedi a mantši gakaakaa a bile gona bjang?” Ge o boela, o ka bolela ka dintlha tše di itšego tše di lego go kgaolo 2 ya puku yeo.
5 Lentšu la temošo ke le. E-ba šedi ka dipotšišo tšeo o di botšišago ge o boela. Go botšiša gore “Na o badile taba yeo ke go tlogeletšego yona?” goba “Na o sa nkgopola?” goba “Na o sa gopola seo re ilego ra boledišana ka sona nakong e fetilego ge ke be ke le mo?” go dira gore mong wa ntlo a se phuthologe. Dipotšišo tše bjalo gantši ga di tšweletše mafelelo a mabotse. Ka lehlakoreng le lengwe, e-ba yo a nago le bogwera, yo a kobegelago mathokong ohle le yo a bolelago ka boripana. Dika tše di tla godiša molaetša.
6 Mekgwa ye gotee le e mengwe e ka dirišwa go mediša tebogo dipelong tša bao ba thabelago. Ke ka baka la’ng o sa ipeele pakane ya go dira bonyenyane leeto le tee la go boela bekeng e nngwe le e nngwe? Diriša ditšhišinyo tše di šomago tšeo di ngwadilwego ka mo godimo gomme o tsome bagoeledi ba ba nago le phihlelo bao ba tlago go go thuša. Lethabo la gago le tla oketšega ge o dutše o agela kgahlegong yeo e bontšhitšwego mathomong ka go dira maeto a go boela ao a atlegago.