Kgaolo 18

“Go Tsoma Mmušo Pele”

SEHLOGO se segolo sa Beibele ke go kgethagatšwa ga leina la Jehofa ka Mmušo. Jesu Kriste o rutile balatedi ba gagwe gore ba tsome Mmušo pele, ba o etiše pele ga dikgahlego tše dingwe bophelong. Ka baka la’ng?

Morokami o hlalositše gantši gore ka baka la therešo ya gore ke yena Mmopi, Jehofa ke Mmuši wa Legohle. O swanelwa ke go tumišwa ke dibopiwa tša gagwe. (Kut. 4:11) Lega go le bjalo, mathomong-thomong a histori ya motho morwa wa Modimo wa moya yo a ilego a itira Sathane Diabolo ka borabele o ile a hlohla bogoši bja Jehofa. (Gen. 3:1-5) Go oketša moo, Sathane o ile a bea bohle bao ba hlankelago Jehofa molato wa maikemišetšo a boithati. (Jobo 1:9-11; 2:4, 5; Kut. 12:10) Ka gona khutšo ya legohle e ile ya šitišwa.

Ka nywaga-some e mentši mo nakong ye, dipuku tša Watch Tower di hlalositše gore Jehofa o dirile tokišetšo ya go rarolla dikgang tše ka tsela yeo e godišago e sego feela matla a gagwe a magolo eupja gape le bogolo bja bohlale bja gagwe, toka ya gagwe le lerato la gagwe. Karolo ya motheo ya tokišetšo yeo ke Mmušo wa Modimo wa Mesia. Ka Mmušo woo, batho ba newa sebaka se se lekanego sa go ithuta ditsela tša go loka. Ka wona ba babe ba tla fedišwa, bogoši bja Jehofa bo tla lwelwa gomme morero wa gagwe wa go dira lefase paradeise yeo e dutšwego ke batho bao ba ratago Modimo e le ka kgonthe le bao ba ratanago le bao ba šegofaditšwego ka bophelo bjo bo phethagetšego, o tla phethwa.

Ka baka la bohlokwa bja wona, Jesu o eleditše balatedi ba gagwe gore: “Sa pele Le tsomê mmušô wa Modimo.” (Mat. 6:10, 33) Dihlatse tša Jehofa mehleng yeno di neile bohlatse bjo bogolo bja gore di katanela go kwa keletšo yeo.

Go Gafa Tšohle ka Baka la Mmušo

Mehleng ya pele, Barutwana ba Beibele ba ile ba ela hloko seo se bego se bolelwa ke go tsoma Mmušo pele. Ba ile ba ahla-ahla papišo ya Jesu yeo go yona a ilego a bapiša Mmušo le pheta ya theko e kgolo moo e lego gore monna o ile a “rekiša thoto ya xaxwe ka moka, a rêka yôna.” (Mat. 13:45, 46) Ba ile ba ela hloko bohlokwa bja keletšo ya Jesu go mmuši yo a humilego yo e sa lego yo mofsa ya gore a rekiše tšohle, a abele badiidi gomme a mo latele. (Mar. 10:17-30)a Ba ile ba lemoga gore ge e ba ba be ba tla ipontšha ba swanelwa ke go ba le karolo Mmušong wa Modimo, ba swanetše go dira Mmušo selo sa pele seo ba se kgahlegelago, ba diriša maphelo a bona, matla a bona, ditšhelete tša bona ka lethabo tirelong ya wona. Selo se sengwe le se sengwe bophelong se be se swanetše go tšea maemo a bobedi.

Charles Taze Russell ka boyena o ile a nweletša keletšo yeo pelong. O ile a rekiša kgwebo ya gagwe yeo e atlegago ya diaparo tša banna, a fokotša ganyenyane-ganyenyane dikgahlego tše dingwe tša kgwebo, ke moka a diriša dithoto tša gagwe ka moka tša lefaseng go thuša batho ka tsela ya moya. (Bapiša le Mateo 6:19-21.) E be e se selo seo a se dirilego feela ka nywaga e sego kae. Go theoša go fihla lehung la gagwe o ile a diriša dilo tša gagwe ka moka tša motheo—matla a gagwe, bophelo bja gagwe bjo bobotse bja mmele, dithoto tša gagwe tša dilo tše di bonagalago—bakeng sa go ruta ba bangwe molaetša o mobotse wa Mmušo wa Mesia. Lehung la Russell, modirišani e lego Joseph F. Rutherford o itše: “Charles Taze Russell o be a botegela Modimo, a botegela Kriste Jesu, a botegela morero wa Mmušo wa Mesia.”

Ka April 1881 (ge batho ba sego kae feela ba be ba e-ba gona dibokeng tša Barutwana ba Beibele), Morokami (wa Seisemane) o ile wa gatiša sehlogo se se rego “Go Nyakega Baboledi ba 1 000.” Se se be se akaretša taletšo e yago go banna le basadi bao ba bego ba se na malapa ao a ithekgilego ka bona gore ba tšee modiro wa go ba baebangedi ba babapatši ba puku tša bodumedi. Ge o diriša polelo ya papišo ya Jesu go Mateo 20:1-16, Morokami o botšišitše gore: “Ke mang yo a nago le kganyogo e kgolo ya go ya go šoma Tšhemong ya Morara, le yo a bego a dutše a rapelela gore Morena a bule tsela”? Bao ba bego ba kgona go nea bonyenyane seripa-gare sa nako ya bona ka mo go feletšego modirong wa Morena ba ile ba kgothaletšwa go dira dikgopelo. Go ba thuša ka ditshenyagalelo tša tša go sepela, dijo, diaparo le bodulo, Zion’s Watch Tower Tract Society e ile ya nea babapatši ba pele ba dipuku tša bodumedi dipuku tša Beibele bakeng sa go di aba, ya bolela moneelo o lekanetšego wo o ka kgopelwago bakeng sa dipuku gomme wa laela babapatši ba dipuku tša bodumedi go itšeela karolo ya tšhelete yeo ba tlago go e hwetša. Ke bomang bao ba ilego ba arabela dithulaganyong tše gomme ba tšea tirelo ya go bapatša dipuku tša bodumedi?

Ka 1885 go be go e-na le babapatši ba ka bago 300 ba dipuku tša bodumedi ba Mokgatlo. Ka 1914 palo mafelelong e ile ya feta 1 000. E be e se modiro o bonolo. Ka morago ga go etela malapeng metseng e mene e menyenyane le go hwetša feela batho ba bararo goba ba bane bao ba bego ba thabela go fihla bokgoleng lege e le bofe, o mongwe wa babapatši ba dipuku tša bodumedi o ile a ngwala gore: “Ke swanetše go dumela gore ke ile ka ikwa ke lewa ke bodutu go ya kgole gakaalo, ke gahlana le batho ba bakaalo gomme ka hwetša go bontšhwa go kgomega mo gonyenyane gakaalo ka morero wa Modimo le Kereke. Nthušeng ka dithapelo tša lena gore ke neele therešo ka mo go swanetšego le ka go se boife, ke se ke ka lapišwa ke go dira botse.”

Ba Ile ba Ithapa ka go Rata

Babapatši bao ba dipuku tša bodumedi e be e le baphulatsela ba kgonthe. Ba ile ba tsena mafelong ao a bego a tloga a sa tsenege a naga ka nako yeo mokgwa wa tša go sepela o bego o sa hlabologa gomme go feta tšohle, ditsela e be e fo ba tše lekanago le ditsejana tša dikariki. Kgaetšedi Early kua New Zealand ke o mongwe yo a ilego a dira seo. Go tloga pejana ga Ntwa ya I ya Lefase, o ile a gafa nywaga e 34 tirelong e bjalo ya nako e tletšego pele a e-hwa ka 1943. O ile a akaretša bogolo bja naga a sepela ka paesekele. Gaešita lege a be a golofaditšwe ke bolwetši bja marapo gomme a sa kgone go ragela, o be a diriša paesekele go ikokotlela ka yona le go rwala dipuku tša gagwe lefelong ka moka la kgwebo la Christchurch. O be a kgona go namela manamelo, eupja o be a swanelwa ke go a fologa ka samorago ka baka la bolwetši bja gagwe bjo bo golofatšago. Lega go le bjalo, ge feela a be a hwetša matla, o be a a diriša tirelong ya Jehofa.

Batho ba ga se ba tsenela modiro wo ka gobane ba ipotile. Ba bangwe ka tlhago e be e le ba boleta kudu, eupja ba be ba rata Jehofa. Pele ga ge a nea bohlatse lefelong la kgwebo, kgaetšedi o mongwe yo bjalo o be a kgopela o mongwe le o mongwe wa Barutwana ba Beibele gore a mo rapelele. Ge nako e dutše e e-ya a e-ba le phihlelo, o ile a thoma go fišegela modiro woo kudu.

Ge Malinda Keefer a be a bolela le Ngwanabo rena Russell ka 1907 mabapi le kganyogo ya gagwe ya go tsenela tirelo ya nako e tletšego, o ile a bolela gore o be a ikwa a nyaka go hwetša tsebo e ntši pele. Ge e le gabotse, o be a sa tšwa go kopana la mathomo le dipuku tša Barutwana ba Beibele ngwageng wa pele ga woo. Karabo ya Ngwanabo rena Russell e bile e rego: “Ge e ba o nyaka go leta go fihlela ge o tseba dilo ka moka o ka se ke wa thoma le ka mohla, eupja o tla ithuta ge o dutše o tšwela pele.” Ka ntle le go nyefiša, o ile a thoma kapejana kua Ohio, United States. Gantši o be a gopola Psalme 110:3 e rego: “Sethšaba sa xaxo se tlo ithapa.” O tšwetše pele a dira sona seo ka nywaga e 76 e latetšego.b O thomile a se a nyalwa. O ile a thabela go šoma a le lenyalong ka nywaga e 15. Eupja ka morago ga ge monna wa gagwe a hwile, o ile a tšwela pele ka thušo ya Jehofa. Ge a be a lebelela morago nywageng ka moka, o itše: “Ke leboga gakaakang gore ke ile ka ithapa ka go rata ke le mmulamadibogo ge ke be ke sa le mosadi yo mofsa gomme ka etiša dikgahlego tša Mmušo pele ka mehla!”

Ge go be go swarwa dikopano tša kakaretšo mehleng ya pele, gantši go be go dirwa dithulaganyo bakeng sa diboka tše di kgethegilego le babapatši ba dipuku tša bodumedi. Dipotšišo di be di arabja, ba bafsa ba be ba newa tlwaetšo gomme go newa kgothatšo.

Go tloga ka 1919 go ya pele, go be go e-na le ba bangwe ba bantši ba bahlanka ba Jehofa bao ba bego ba lebelela Mmušo wa Modimo e le o bohlokwa kudu moo le bona ba ilego ba aga maphelo a bona e le ka kgonthe go wona. Ba bangwe ba bona ba ile ba kgona go beela ka thoko dinyakwa tša tša boiphedišo gomme ba ikgafa ka mo go tletšego bodireding.

Go Kgotsofatša Dinyakwa tša Dilo tše di Bonagalago

Ba ile ba kgotsofatša bjang dinyakwa tša bona tša dilo tše di bonagalago? Anna Petersen (yoo ka morago e bilego wa ga-Rømer), e lego moebangedi wa nako e tletšego kua Denmark, o ile a gopola gore: “Re hweditše thušo dipukung tšeo re di sepedišago bakeng sa ditshenyagalelo tša letšatši le letšatši, gomme dinyakwa tša rena e be e se tše dikgolo. Ge go be go e-na le ditshenyagalelo tše dikgolo, tše gantši di be di lefelelwa ka tsela e itšego. Dikgaetšedi di be di re nea diaparo, diroko goba dijase gomme re be re di apara le semetseng, ka gona re be re apara gabotse. Maregeng a mangwe ke be ke šoma mošomo wa ka ofising ka dikgwedi tše mmalwa. . . . Ka go reka ge go be go theotšwe ditheko, ke be ke kgona go reka diaparo tšeo ke bego ke di nyaka bakeng sa ngwaga ka moka. Dilo di ile tša tšwela pele gabotse. Le ka mohla re be re sa hloke selo.” Dilo tše di bonagalago e be e se selo se segolo seo ba tshwenyegilego ka sona. Lerato la bona la go rata Jehofa le ditsela tša gagwe le be le le bjalo ka mollo o tukago ka gare ga bona, gomme ba be ba fo swanelwa ke go le bontšha.

Bakeng sa bodulo ba be ba ka hira phapoši e lekanetšego ge ba be ba dutše ba etela batho lefelong leo. Ba bangwe ba bona ba be ba diriša kharabane—e sego yeo e kgabišitšwego ka mo go feteletšego, feela lefelo la go robala le go jela. Ba bangwe ba be ba robala ditenteng ge ba be ba dutše ba huduga go tloga lefelong le lengwe go ya go le lengwe. Mafelong a mangwe banababo rena ba ile ba rulaganya “dikampa tša babulamadibogo.” Dihlatse tša tikologong di be di ka tsenya dithoto legaeng leo, gomme gwa abelwa motho o tee gore a le hlokomele. Babulamadibogo bao ba šomago tikologong yeo ba be ba ka diriša mafelo a a bodulo gomme ba kopanela ditshenyagalelo tšeo di akaretšwago.

Bašomi ba ba nako e tletšego ga se ba dumelela go hloka tšhelete go thibela batho bao ba swanago le dinku go hwetša dipuku tša Beibele. Gantši babulamadibogo ba be ba rekiša ka dilo tše di swanago le ditapola, makhura, mae, dienywa tše nanana le tša ka ditšhiping, dikgogo, sesepe le mo e ka bago selo lege e le sefe se sengwe. Ba be ba sa hume; go e na le moo, ye e be e le tsela ya go thuša batho bao ba botegago go hwetša molaetša wa Mmušo, mola ka nako e swanago ba hwetša dilo tšeo di nyakegago tša nama tša bophelo e le gore babulamadibogo ba kgone go tšwela pele bodireding bja bona. Ba be ba kgodišegile ka kholofetšo ya Jesu ya gore ge e ba ba “tšwela pele . . . [ba] tsoma mmušo pele le go loka ga [Modimo],” gona dijo le diaparo tše di nyakegago di be di tla newa.—Mat. 6:33, NW.

Go Ikemišetša go Šoma Kae le Kae mo go Nyakegago Thušo

Kganyogo ya bona e tšwago pelong ya go dira seo Jesu a bego a se abetše barutiwa ba gagwe e ile ya lebiša bašomi ba nako e tletšego mašemong a mafsa, gaešita le dinageng tše difsa. Ge Frank Rice a be a laletšwa go tloga Australia go ya go thoma boboledi bja ditaba tše di lokilego kua Java (yeo bjale e lego karolo ya Indonesia) ka 1931, o be a e-na le phihlelo ya nywaga e lesome bodireding bja nako e tletšego. Eupja bjale o be a swanetše go ithuta meetlo e mefsa gotee le maleme. O be a ka diriša Seisemane go nea bohlatse go ba bangwe ka mabenkeleng le diofising, eupja o be a nyaka go nea bohlatse le go ba bangwe gape. O ile a ithuta ka thata gomme ka dikgwedi tše tharo o be a tseba se-Dutch ka mo go lekanego go ka thoma go ya ka ntlo le ntlo. Ka morago o ile a ithuta se-Malay.

Frank o be a e-na le nywaga e 26 feela ge a be a e-ya Java, gomme karolo e kgolo ya nywaga e tshelelago yeo a e feditšego moo le kua Sumatra o be a šoma a nnoši. (Go ya bofelong bja 1931, Clem Deschamp le Bill Hunter ba ile ba tla ba e-tšwa Australia go tla go thuša modirong. E le sehlopha ba ile ba dira leeto la boboledi ka nageng, mola Frank a be a šoma motseng-mošate wa Java le tikologong ya wona. Ka morago, Clem le Bill le bona ba ile ba amogela dikabelo tšeo di ilego tša ba iša mafelong a aroganego.) Go be go se na diboka tša phuthego tšeo Frank a bego a ka ya go tšona. Ka dinako tše dingwe o be a lewa ke bodutu kudu, gomme o ile a lwantšhana ka makga a fetago le tee le dikgopolo tša go tlogela gomme a boele Australia. Eupja o ile a tšwela pele. Bjang? Dijo tša moya tšeo di lego ka go Morokami di ile tša thuša go mo matlafatša. Ka 1937 o ile a hudugela kabelong ya Indochina moo a ilego a phologa ka lešobana la nalete nakong ya meferefere e šoro ya ka morago ga Ntwa ya II ya Lefase. Moya woo wa go rata go šoma o be o sa dutše o le gona nywageng ya bo-1970 ge a be a ngwala bakeng sa go hlalosa lethabo la gagwe mabapi le therešo ya gore lapa la gagwe ka moka le be le hlankela Jehofa, le go bolela gore yena le mosadi wa gagwe ba be ba itokišetša gape go hudugela lefelong le lengwe kua Australia mo go bego go nyakega thušo e kgolo kudu.

‘Go Bota Jehofa ka Dipelo tša Bona ka Moka’

Claude Goodman o ile a ikemišetša go ‘bota Jehofa ka pelo ya gagwe ka moka le go se ithekge ka tlhaloganyo ya gagwe ka noši,’ ka gona o ile a kgetha tirelo ya go bapatša dipuku tša bodumedi e le moebangedi wa Mokriste go e na le sebaka sa kgwebo ya tša boiphedišo. (Die. 3:5, 6) O ile a šoma e le mmapatši wa dipuku tša bodumedi kua Engelane ka lebaka le le fetago ngwaga gotee le Ronald Tippin yo a bego a mo thušitše go ithuta therešo. Ka gona ka 1929, bobedi bja bona ba ile ba itira bao ba hwetšagalago bakeng sa go ya India.c Seo se ile sa tliša teko e kgolo gakaakang!

Nywageng e latetšego, ba ile ba sepela e sego ka maoto le setimela sa banamedi le pese feela eupja gape le ka setimela sa dithoto, kariki ya dikgomo, kamela, sampan, ritšha, gaešita le sefofane le setimela seo e sego sa mmušo. Ka dinako tše dingwe ba be ba ala malao a bona a go phuthwa diphapošing tša go leta tša seteišeneng, setaleng sa dikgomo, bjanyeng bja sethokgweng, goba mokutwaneng wa lebato leo le kgophilwego ka boloko bja dikgomo, eupja go be go bile go e-na le dinako tšeo ka tšona ba bego ba robala dihoteleng tša maemo a godimo le mafelong a phagamego a bogoši. Go swana le moapostola Paulo, ba ile ba ithuta sephiri sa go kgotsofala go sa šetšwe ge e ba ba be ba se na dilo tše di nyakegago goba ba e-na le tše dintši. (Ba-Fil. 4:12, 13) Gantši ba be ba e-na le dilo tše dinyenyane kudu tše di bonagalago, eupja le ka mohla ga se ba ka ba hloka seo ba bego ba tloga ba se nyaka. Ka bobona ba ile ba bona go phethagatšwa ga kholofetšo ya Jesu ya gore ge e ba ba be ba tsoma Mmušo pele le go loka ga Modimo, dinyakwa tša dilo tše di bonagalago tša bophelo di be di tla newa.

Go be go e-na le go hlaselwa mo gogolo ke dengue fever, letadi le teng-khwibidu, eupja tlhokomelo e lerato e be e newa ke Dihlatse-gotee. Go be go e-na le tirelo ye e swanetšego go dirwa gare ga bošoro bjo bo lego metseng e bjalo ka Calcutta, gomme go be go swanetše go newa bohlatse mašemong a teye dithabeng tša Ceylon (yeo bjale e tsebjago e le Sri Lanka). Gore go tlatšwe dinyakwa tša batho tša moya, go ile gwa sepedišwa dipuku, gwa bapalwa direkoto ka maleme a lefelong leo gomme gwa newa dipolelo. Ge modiro o dutše o oketšega, Claude o ile a ithuta le go diriša motšhene wa go gatiša le go hlokomela modiro diofising tša lekala tša Mokgatlo.

Ngwageng wa gagwe wa bo-87, o be a ka kgona go lebelela morago bophelong bja gagwe bjo bo tletšego ka diphihlelo tirelong ya Jehofa kua Engelane, India, Pakistan, Ceylon, Burma (yeo bjale e lego Myanmar), Malaya, Thailand le Australia. O ile a etiša Mmušo pele bophelong bja gagwe bobedi e le lesogana le le sa nyalago le ge e le monna yo a nyetšego le tate. O tsenetše tirelo ya nako e tletšego lebakeng la ka tlase ga nywaga e mebedi ka morago ga kolobetšo ya gagwe gomme o ile a e lebelela e le modiro wa gagwe wa bophelo bja gagwe ka moka.

Matla a Modimo a Dirilwe Ao a Phethagetšego Phokolong

Ben Brickell e be e le o mongwe wa Dihlatse tšeo tše mafolofolo—o be a swana kudu le batho ba bangwe ka gore o be a e-na le dinyakwa tše di swanago le tša bona le malwetši. O be a e-na le tumelo e kgolo kudu. Ka 1930 o ile a tsenela modiro wa go bapatša dipuku tša bodumedi kua New Zealand moo a ilego a nea bohlatse mafelong ao a sa kago a akaretšwa gape ka nywaga-some e mentši. Nywaga e mebedi ka morago, a le kua Australia, o ile a tšea leeto la dikgwedi tše hlano la boboledi nageng ka moka ya sehlakahlaka mo go sa kago gwa newa bohlatse pele. Paesekele ya gagwe e be e nameditše mapai, diaparo, dijo le dipuku tše di tlemilwego bakeng sa go sepedišwa. Gaešita lege banna ba bangwe ba ile ba hwa ge ba leka go sepela tikologong ye, o ile a tšwela pele a holofetše Jehofa. Se se latelago, o ile a šoma kua Malaysia moo a ilego a ba le mathata a magolo a pelo. Ga se a ka a tlogela. Ka morago ga lebaka la go fola, o ile a tsenela modiro wa boboledi bja nako e tletšego gape kua Australia. Mo e ka bago nywaga e lesome ka morago, bolwetši bjo bošoro bo ile bja mo dira gore a ye sepetlele, gomme ge a be a lokollwa ngaka e ile ya mmotša gore o be a “se sa tiile ka mo go lekanego ka makga a 85 lekgolong bakeng sa modiro.” O be a se sa kgona gaešita le go theoša le setarata go ya mabenkeleng ka ntle le go khutša tseleng.

Eupja Ben Brickell o be a ikemišeditše go tšwela pele gape, gomme o ile a tšwela pele a ema gore a khutše ge go nyakega. Go se go ye kae o be a boile a nea bohlatse dinaga-magaeng tša meboto tša Australia. O ile a dira seo a se kgonago go hlokomela boemo bja gagwe bja tša maphelo, eupja tirelo ya gagwe go Jehofa e be e le selo se segolo bophelong bja gagwe go fihlela lehung la gagwe nywageng e 30 ka morago a le nywageng ya gagwe ya magareng ya bo-60.d O ile a lemoga gore tlhaelelo yeo e tšweletšego ka baka la go fokola ga gagwe e be e tla tlatšwa ke matla a Jehofa. Kopanong kua Melbourne ka 1969, o ile a šoma lefapheng la babulamadibogo a e-na le petšhe e kgolo karolong ya ka pele ya molala wa seaparo sa gagwe, yeo e balegago ka gore: “Ge e ba o nyaka go tseba ka bobulamadibogo, mpotšiše.”—Bapiša le 2 Ba-Korinthe 12:7-10.

Go Fihlelela Metsana ya Sethokgweng le Dikampa tša Dithabeng tša Meepo

Go fišegela tirelo ya Jehofa go ile gwa tutuetša e sego banna feela eupja le basadi go amogela modiro mafelong ao a sa kago a fihlelelwa. Freida Johnson e be e le o mongwe wa batlotšwa, e le o monyenyane ka leemo gomme a le nywageng ya gagwe ya bo-50 ge a be a šoma a nnoši dikarolong tša Amerika Bogare, a akaretša mafelo ao a swanago le lebopo la ka leboa la Honduras a nametše pere. Go be go nyakega tumelo gore a šome a nnoši lefelong le, a etele mašemong ao a aroganego a dipanana, ditoropo tša La Ceiba, Tela le Trujillo, gaešita le metsana yeo e se nago batho ba bantši ya Carib ka mošola. O ile a nea bohlatse moo ka 1930 le 1931, gape le ka 1934, ka 1940 le ka 1941, a sepediša dipuku tše dintši tšeo di rwelego therešo ya Beibele.

Nywageng yeo mošomi o mongwe yo mafolofolo o ile a thoma modiro wa gagwe wa bophelo ka moka tirelong ya nako e tletšego. Yo e be e le Kathe Palm yo a bego a belegetšwe Jeremane. Seo se mo tutueleditšego go gata mogato e bile go ba gona kopanong kua Columbus, Ohio ka 1931, yeo go yona Barutwana ba Beibele ba ilego ba amogela leina Dihlatse tša Jehofa. E bile ka nako yeo mo a ilego a ikemišetša go tsoma Mmušo pele, gomme o be a sa dutše a dira seo ka 1992 a e-na le nywaga e 89.

Tirelo ya gagwe ya bobulamadibogo e thomile kua New York City. Ka morago kua Dakota Borwa o ile a ba le mošomi-gotee le yena ka dikgwedi tše sego kae eupja ka morago a tšwela pele a nnoši, a sepela ka pere. Ge a be a laleletšwa go šoma kua Colombia, Amerika Borwa, o ile a dumela ka go rata, a goroga moo bofelong bja 1934. Le gona, o ile a ba le mošomi-gotee le yena ka nakwana eupja ka morago a šala a nnoši. Se ga se sa mo dira gore a ikwe a swanetše go tlogela.

Banyalani ba ile ba mo laletša gore a tle go ba tlatša kua Chile. Mo go be go e-na le tšhemo e nngwe e kgolo, yeo e bego e akaretša dikhilomithata tše 4 265 go bapa le lebopo la ka bodikela la kontinente ya Amerika Borwa. Ka morago ga go bolela meagong ya diofisi tša motse-mošate, o ile a ya karolong ya ka leboa ya kgole. Kampeng e nngwe le e nngwe ya moepo, motseng o mongwe le o mongwe wa khamphani, o mogolo goba o monyenyane, o ile a nea bohlatse ka ntlo le ntlo. Bašomi bao ba lego maemong a phagamego kua Andes ba be ba tlabilwe ke go bona mosadi yo a sepelago a nnoši a ba etela, eupja o be a se a ikemišetša go tlogela le o tee lefelong leo a le abetšwego. Ka morago o ile a hudugela ka borwa, moo di-estancia (dipolasa tša dinku) tše dingwe di bego di akaretša dihaketare tše 100 000. Batho ba moo e be e le bao ba nago le bogwera le ba botho gomme ba ile ba mo amogela ditafoleng tša bona ka dinako tša dijo. Ka tsela ye le tše dingwe, Jehofa o ile a mo hlokomela gore a hwetše dinyakwa tša nama tša bophelo.

Go bolela ditaba tše di lokilego tša Mmušo wa Modimo e bile karolo ya bophelo bja gagwe ka moka.e Ge a be a lebelela morago nywageng ya gagwe ya tirelo o itše: “Ke ikwa gore ke bile le bophelo bjo bo humilego kudu. Ngwageng o mongwe le o mongwe ge ke e-ya kopanong ya batho ba Jehofa, ke ba le maikwelo a lethabo le kgotsofalo ge ke dutše ke bona batho ba bantši gakaakaa bao ke ilego ka ba le dithuto tša Beibele le bona ba gaša ditaba tše di lokilego, ba thuša ba bangwe go tla meetseng a bophelo.” O be a ile a thabela go bona palo ya bareti ba Jehofa kua Chile e gola go tloga go mo e ka bago 50 go ya ka godimo ga 44 000.

“Ké Nna é, Nthomê”

Ka morago ga go kwa polelo yeo e theilwego taletšong ya Jehofa ya tirelo bjalo ka ge e ngwadilwe go Jesaya 6:8 le go arabela ga moporofeta ka go rata ka gore, “Ké nna é, nthomê,” Martin Poetzinger, kua Jeremane, o ile a kolobetšwa. Nywaga e mebedi ka morago, ka 1930 o ile a tsenela bodiredi bja nako e tletšego kua Bavaria.f Go se go ye kae balaodi ba mmušo moo ba ile ba iletša boboledi bja Dihlatse, mafelo a diboka a tswalelwa gomme dipuku tša tšewa. Ma-Gestapo a be a tšhošetša. Eupja ditiragalo tšeo tša ka 1933 ga se tša ka tša dira gore bodiredi bja Ngwanabo rena Poetzinger bo fele.

O ile a laleletšwa go šoma kua Bulgaria. Kua Bulgaria go be go dirišwa dikarata tša bohlatse bakeng sa go rola dipuku tša Beibele. Eupja batho ba bantši ba be ba sa kgone go bala le go ngwala. Ka gona, Ngwanabo rena Poetzinger o ile a tsenela dithuto tša go ithuta leleme la bona leo le bego le diriša dialefapete tša se-Cyril. Ge lapa le be le tlogeletšwe dipuku, gantši go be go nyakega gore bana ba banyenyane ba balele batswadi ba bona.

Karolong e kgolo ya ngwaga wa pele, Ngwanabo rena Poetzinger o be a nnoši gomme o ile a ngwala gore: “Segopotšong, ke ile ka neela polelo ka noši, ka rapela ka noši gomme ka phetha diboka ke nnoši.” Ka 1934 batho bao ba tšwago dinageng dišele ba ile ba lelekwa ka nageng, ka gona o ile a ya Hungary. Mo o be a swanetše go ithuta leleme le lengwe le lefsa e le gore a kgone go abelana ditaba tše di lokilego le ba bangwe. Go tloga Hungary o ile a ya dinageng tšeo ka nako yeo di bego di tsebja e le Czechoslovakia le Yugoslavia.

O bile le diphihlelo tše dintši—a hwetša barati ba therešo ge a dutše a sepela tikologong ya magaeng le metsaneng, a rwele morwalo wa dipuku ka mokokotlong; a bona tlhokomelo ya Jehofa ge batho ba botho ba dutše ba mo nea dijo gaešita le marobalo bošego; a bolela go fihla mantšiboa le bao ba mo neilego marobalo bakeng sa go kwa molaetša o oketšegilego o homotšago wa Mmušo.

Go be go bile go e-na le diteko tše šoro tša tumelo. Nakong ya ge a be a šoma ka ntle ga naga ya gabo gomme a se na tšhelete, o ile a babja o šoro. Ga go na ngaka yeo e bego e rata go mmona. Eupja Jehofa o ile a thuša. Bjang? Mafelelong go ile gwa ikopanywa le mohlokomedi yo mogolo wa sepetleleng sa lefelong leo. Monna yo, yo a dumelago Beibele ka go tia, o ile a hlokomela Ngwanabo rena Poetzinger bjalo ka ge a be a tla hlokomela morwa wa gagwe, a dira bjalo ka ntle le tefo. Ngaka e be e makaditšwe ke moya wa boikgafo wa lesogana le wo o bego o bonala modirong wo le bego le o dira, gomme ya amogela sehlopha sa dipuku tša Mokgatlo e le mpho.

Teko e nngwe gape e šoro e ile ya tla dikgweding tše nne ka morago ga lenyalo. Ngwanabo rena Poetzinger o ile a golegwa ka December 1936 gomme a tswalelelwa la mathomo kampeng e nngwe ya tshwenyo, ka morago a išwa go e nngwe, mola mosadi wa gagwe a be a tswaleletšwe kampeng e nngwe e bjalo. Ga se ba ka ba bonana ka nywaga e senyane. Jehofa ga se a ka a thibela tlaišo e bjalo e sehlogo, eupja o ile a tiiša Martin le mosadi wa gagwe Gertrud le ba bangwe ba dikete gore ba e kgotlelele.

Ka morago ga ge yena le mosadi wa gagwe ba lokolotšwe, Ngwanabo rena Poetzinger o ile a thabela nywaga e mentši tirelong e le molebeledi wa mosepedi kua Jeremane. O be a le gona dikopanong tšeo di kgahlišago tšeo di ilego tša swarwa ka morago ga mehla ya ntwa mafelong ao e bego e le mabala a go swarela megwanto a Hitler kua Nuremberg. Eupja mo nakong ye mabala ao a be a tletše lešaba le legolo la bathekgi bao ba botegago ba Mmušo wa Modimo. O ile a ya dikopanong tšeo di sa lebalegego Lepatlelong la Yankee la New York. O ile a thabela ka mo go tletšego tlwaetšo Sekolong sa Beibele sa Watchtower sa Gilead. Ka 1977 o ile a ba setho sa Sehlopha se Bušago sa Dihlatse tša Jehofa. Pono ya gagwe go theoša go fihla bofelong bja tsela ya gagwe ya lefaseng ka 1988 e ka hlaloswa gabotse kudu ka mantšu a: ‘Selo se tee seo ke se dirago ke se—go tsoma Mmušo pele.’

Go Lemoga Seo go se Bolelago e le ka Kgonthe

Ge e le gabotse moya wa boikgafo ga se selo se sefsa gare ga Dihlatse tša Jehofa. Ge volume ya mathomo-thomo ya Millennial Dawn e be e gatišwa morago kua ka 1886, taba ya boineelo e ile ya hlaloswa ka mo go nabilego. Go ile gwa hlaloswa motheong wa Mangwalo gore Bakriste ba therešo ba “neela” se sengwe le se sengwe go Modimo; seo se akaretša matla a bona, dithoto tša bona tša dilo tše di bonagalago le maphelo a bona ka noši. Ka gona Bakriste ba fetoga balaki ba seo se “neetšwego” go Modimo, gomme bjalo ka balaki ba swanetše go ikarabela—e sego go batho eupja go Modimo.

Palo e golago ya Barutwana ba Beibele ba ile ba ikgafa e le ka kgonthe tirelong ya Modimo. Ba ile ba diriša bokgoni bja bona, dithoto tša bona, matla a bona a mmele ka mo go tletšego go direng thato ya gagwe. Ka lehlakoreng le lengwe go be go e-na le bao ba bego ba nagana gore seo e bego e le sa bohlokwa kudu e be e le go mediša seo ba bego ba se bitša semelo sa Bokriste, e le gore ba swanelegele go ba le karolo Mmušong le Kriste.

Gaešita lege boikarabelo bja Mokriste o mongwe le o mongwe wa therešo bja go nea bohlatse go ba bangwe ka Mmušo wa Modimo bo ile bja bolelwa gantši ke Ngwanabo rena Russell, bo ile bja gatelelwa kudu ka morago ga Ntwa ya I ya Lefase. Sehlogo se se rego “Semelo Goba Kgwerano—Ke Eng e Swanetšego?” ka go Morokami (wa Seisemane) wa May 1, 1926 ke mohlala o kgahlišago. Se ile sa ahla-ahla ka go se dika-dike mafelelo ao a gobatšago ao a bakwago ke seo se bego se bitšwa go aga semelo gomme ka morago sa gatelela bohlokwa bja go phetha boikarabelo bja motho go Modimo ka mediro.

Pejana, Morokami (wa Seisemane) wa July 1, 1920 o be o ile wa hlalosa boporofeta bja Jesu bjo bogolo mabapi le ‘pontšho ya go ba gona ga gagwe le bofelo bja lefase.’ (Mat. 24:3, KJ) O ile wa lebiša tlhokomelo modirong wa go bolela wo o swanetšego go dirwa bakeng sa go phethagatša Mateo 24:14 gomme wa hlalosa molaetša wo o swanetšego go goeletšwa, wa re: “Ditaba tše di lokilego mo di mabapi le bofelo bja taolo ya kgale ya dilo le go hlongwa ga mmušo wa Mesia.” Morokami o hlalositše gore motheong wa moo Jesu a boletšego se tswalanong le dibopego tše dingwe tša pontšho, modiro wo o tla swanelwa ke go phethwa “magareng ga nako ya ntwa e kgolo ya lefase [Ntwa ya I ya Lefase] le nako ya ‘masetla-pelo a magolo’ ao a boletšwego ke Mong wa rena go Mateo 24:21, 22.” Modiro woo o be o akgofile. Ke bomang bao ba bego ba tla o dira?

Ge e le gabotse boikarabelo bjo bo be bo le godimo ga ditho tša “kereke,” phuthego ya Bokriste bja therešo. Lega go le bjalo, ka 1932 ba ile ba eletšwa ka tokollo ya August 1 ya Morokami (ka Seisemane) gore ba kgothaletše “sehlopha sa Jonadaba” gore se be le karolo gotee le bona modirong ka go dumelelana le moya wa Kutollo 22:17. Sehlopha sa Jonadaba—seo kholofelo ya sona e lego bophelo bjo bo sa felego lefaseng la Paradeise—se ile sa arabela gabotse, gomme bontši bja bona ba arabela ka mafolofolo.

Bohlokwa bjo bogolo bja modiro wo bo ile bja gatelelwa ka matla: Morokami (wa Seisemane) o boletše ka 1921 gore, “Ke gabohlokwa kudu go ba le karolo tirelong ya Morena go fo swana lege go le bohlokwa go ba gona dibokeng.” O boletše ka 1922 gore, “O mongwe le o mongwe e swanetše go ba mmoledi wa ebangedi.” O itše ka 1949, “Jehofa o dirile boboledi modiro wa bohlokwa kudu woo mang le mang wa rena a ka o dirago lefaseng le.” Boipolelo bja moapostola Paulo go 1 Ba-Korinthe 9:16 bo ile bja tsopolwa leboelela: “Ke kwa kè xapeletšwa; ’me nka ba wa madi-mabe xe nka lesa xo bolêla Ebangedi.” Lengwalo le le be le dirišwa go o mongwe le o mongwe wa Dihlatse tša Jehofa.

Ke ba Bakae Bao ba Dirago Boboledi? Go Fihla Bokgoleng Bofe? Ka Baka La’ng?

Na ba bangwe ba be ba gapeletšwa go kopanela modirong wo ka go ganetšana le seo ba se ratago? Morokami o arabile tokollong ya wona ya August 1, 1919 (ka Seisemane) gore, “Aowa, ga go na motho yo a gapeletšwago go dira selo lege e le sefe. Ke tirelo ya boithapi ka mo go kwalago, yeo e dirwago ka lerato la go rata Morena le ka tsela ya gagwe ya toko. Jehofa ga a gapeletše motho le gatee.” Mabapi le selo seo se tutuetšago tirelo e bjalo, Morokami (wa Seisemane) wa September 1, 1922 o boletše gape gore: “Motho yo a tlogago a leboga ka pelong ya gagwe gomme a lemoga seo Modimo a mo diretšego sona o tla rata go dira selo se sengwe le yena; le gona ge tebogo ya gagwe ya go leboga botho bja Modimo go yena e oketšega, lerato la gagwe e tla ba le legolo; gomme ge lerato la gagwe e le le legolo, kganyogo ya gagwe ya go mo hlankela e tla gola.” Go ile gwa hlaloswa gore lerato la go rata Modimo le bontšhwa ka go boloka melao ya gagwe, gomme o mongwe wa melao yeo ke go bolela ditaba tše di thabišago tša Mmušo wa Modimo.—Jes. 61:1, 2; 1 Joh. 5:3.

Bao ba amogetšego modiro wo ga se ba ka ba goketšwa ke kgopolo lege e le efe ya boikgogomošo bja lefase. Ba ile ba botšwa ka go se dika-dike gore ge ba e-ya ka ntlo le ntlo goba ba sepediša dipuku sekhutlong sa setarata, ba tla lebelelwa e le “mašilo, bao ba fokolago, badiidi,” gore ba tla “hloiwa, ba hlomarwe” le gore ba tla balelwa legorong la “bao e sego ba bohlokwa go ya ka pono ya lefase.” (NW) Eupja ba a tseba gore Jesu le barutiwa ba gagwe ba pele ba ile ba swarwa ka tsela e swanago.—Joh. 15:18-20, NW; 1 Ba-Kor. 1:18-31.

Na Dihlatse tša Jehofa di nagana gore di hwetša phologo ka tsela e itšego ka modiro wa tšona wa go bolela? Le gatee! Puku ya Go ba Batee Borapeding bja Modimo o Nnoši wa Therešo yeo e bego e dutše e dirišwa ga e sa le go tloga ka 1983 (ka Seisemane) go thuša barutwana go tšwela pele kgolong ya Bokriste, e hlalosa taba ye. E re: “Sehlabelo sa Jesu le gona se re buletše sebaka sa bophelo bjo bo sa felego . . . Wo ga se wona moputso woo re o šomelago. Go sa šetšwe bogolo bjo re bo dirago tirelong ya Jehofa, ruri le ka mohla re ka se ke ra kgona go tšweletša selo seo se ka dirago gore Modimo a re kolote bophelo. Bophelo bjo bo sa felego ke ‘neô ya kxauxêlô ya Modimo . . . ka Jesu Kriste Mong’a rena.’ (Ba-Roma 6:23; Ba-Ef. 2:8-10) Lega go le bjalo, ge e ba re dumela neong yeo le go leboga mokgwa woo ka wona e dirilwego gore e kgonege, gona re tla bonagatša se. Ka go lemoga kamoo Jehofa a dirišitšego Jesu ka tsela e tlabago go phetha thato ya Gagwe le kamoo e lego gabohlokwa ka gona go rena ka moka gore re latele mehlala ya Jesu e le ka kgonthe, gona re tla dira bodiredi bja Bokriste gore e be e nngwe ya dilo tše bohlokwa kudu bophelong bja rena.”

Na go ka bolelwa gore Dihlatse ka moka tša Jehofa ke bagoeledi ba Mmušo wa Modimo? Ee! Seo ke se se bolelwago ke go ba o mongwe wa Dihlatse tša Jehofa. Lebakeng le le fetago seripa-gare sa ngwaga-kgolo se se fetilego, go be go e-na le ba bangwe bao ba ilego ba nagana gore go be go sa nyakege gore ba be le karolo bodireding bja tšhemo, go tšwa phatlalatša le ka ntlo le ntlo. Eupja lehono ga go le o tee wa Dihlatse tša Jehofa yo a ipolelago gore ga a akaretšwe tirelong e bjalo ka baka la boemo ka phuthegong ya lefelong leo goba mokgatlong wa lefase ka bophara. Batho ba banna le ba basadi gotee le ba banyenyane le ba bagolo ba tšea karolo. Ba e lebelela e le tokelo e bohlokwa-hlokwa, e le tirelo e kgethwa. Ba bantši ba e dira go sa šetšwe malwetši a šoro. Ge e le ka motho lege e le ofe yo a golofetšego mmeleng go ka ya ka ntlo le ntlo, ba hwetša ditsela tše dingwe tša go fihlelela batho le go ba nea bohlatse ka noši.

Mehleng e fetilego, ka dinako tše dingwe go be go e-na le tshekamelo ya go dumelela batho ba bafsa go ba le karolo tirelong ya tšhemo e sa le ka pela kudu. Eupja nywaga-someng ya morago bjale go ile gwa gatelelwa kudu go swanelega ga bona pele ba ka laletšwa. Seo se bolela’ng? Ga se bolele gore ba swanetše go kgona go hlalosa se sengwe le se sengwe ka Beibeleng. Eupja, go etša ge puku ya Go Rulaganyetšwa go Dira Bodiredi bja Rena e hlalosa, ba swanetše go tseba le go dumela dithuto tša motheo tša Beibele. Gape ba swanetše go ba ba phela maphelo a hlwekilego ka go dumelelana le ditekanyetšo tša Beibele. O mongwe le o mongwe o swanetše go rata e le ka kgonthe go ba yo mongwe wa Dihlatse tša Jehofa.

Ga go a letelwa gore Dihlatse ka moka tša Jehofa di tla dira boboledi ka tekanyo e swanago. Maemo a batho ka o tee ka o tee a a fapana. Nywaga, boemo bja tša maphelo, boikarabelo bja lapa le bogolo bja tebogo ka moka ga tšona ke mabaka. Se se be se dutše se lemogwa ka mehla. Se se ile sa gatelelwa ka go Morokami tokollong ya wona ya December 1, 1950 (ka Seisemane) ge o be o ahla-ahla ‘mmu o botse’ wa papišong ya Jesu ya mobjadi go Luka 8:4-15. Kingdom Ministry School Course yeo e rulaganyeditšwego bagolo ka 1972 e ile ya seka-seka go nyakega ga ‘go rata Jehofa ka moya wa motho ka moka’ gomme ya hlalosa gore “sa bohlokwa kudu ga se bogolo bja seo motho a se dirago ge se bapišwa le seo o mongwe a se dirago, eupja go dira seo motho a se kgonago.” (Mar. 14:6-8) Lega go le bjalo, ge e be e kgothaletša go itlhahloba ka kgopolo e feletšego, e bontšhitše gape gore lerato le bjalo le bolela “gore sebopego se sengwe le se sengwe sa go ba gona ga motho se a akaretšwa go hlankeleng Modimo ka go rata; ga go na modiro, matla goba kganyogo bophelong yeo e sa akaretšwego.” Matla a rena ka moka a monagano, le moya wa rena ka moka di swanetše go tutueletšwa go dira thato ya Modimo. Puku yeo e ile ya gatelela gore “Modimo o nyaka e sego feela go ba le karolo eupja tirelo ya pelo ka moka.”—Mar. 12:30.

Ka bomadimabe, tshekamelo ya batho bao ba sa phethagalago ke go ya lehlakoreng le le feteletšego, go gatelela selo se sengwe mola ba hlokomologa se sengwe. Ka gona morago kua ka 1906, Ngwanabo rena Russell o ile a hwetša e le mo go nyakegago go lemoša gore boikgafo ga bo bolele go dira ba bangwe dihlabelo. Ga bo bolele go palelwa ga motho ke go fepa mosadi wa gagwe ka mo go leka-lekanego, bana bao ba ithekgilego ka yena, goba batswadi bao ba tšofetšego e le gore motho a kgone go bolela go ba bangwe ka bolokologi. Nako le nako ga e sa le go tloga ka nako yeo, dikgopotšo tše di swanago di ile tša tšwelela ka dipukung tša Watch Tower.

Ganyenyane-ganyenyane ka thušo ya Lentšu la Modimo, mokgatlo ka moka o ile wa tsoma go fihlelela teka-tekano ya Bokriste—wa bontšha phišego bakeng sa tirelo ya Modimo mola o dutše o nea tlhokomelo e swanetšego dibopegong ka moka tša go ba Mokriste wa kgonthe. Gaešita lege “go aga semelo” go be go theilwe kwešišong e fošagetšego, Morokami o ile wa bontšha gore dienywa tša moya le boitshwaro bja Bokriste ga se tša swanela go nyatšwa. Ka 1942, Morokami (wa Seisemane) o ile wa bolela ka go lebanya kudu gore: “Ba bangwe ba phethile ka go hloka bohlale gore ge e ba ba be ba e-ba le karolo modirong wa go nea bohlatse ka ntlo le ntlo, ba be ba ka phegelela tsela lege e le efe yeo ba bego ba ka kgotsofatša dikganyogo tša bona ka yona ka ntle le go otlwa. Motho o swanetše go gopola gore go fo ba le karolo modirong wa go nea bohlatse ga se sona selo feela se se nyakegago.”—1 Ba-Kor. 9:27.

Go Beakanya Dilo Tšeo di Tlago Pele ka Tshwanelo

Dihlatse tša Jehofa di thomile go lemoga gore ‘go tsoma Mmušo pele le go loka ga Modimo’ ke taba ya go beakanya dilo tša tšona tšeo di tlago pele ka tshwanelo. Go akaretša go nea thuto ya motho ka noši ya Lentšu la Modimo le go ba gona ka mehla dibokeng tša phuthego sebaka se se swanetšego bophelong bja motho, gomme dilo tše dingwe di se ke tša dumelelwa go tšea boemo bja pele. Go akaretša go dira diphetho tšeo di bontšhago kganyogo ya kgonthe ya go dumelelana le tšeo di nyakegago tša Mmušo wa Modimo, bjalo ka ge di hlalositšwe ka Beibeleng. Seo se akaretša go diriša melao ya motheo ya Beibele e le motheo bakeng sa diphetho tšeo di akaretšago bophelo bja lapa, boitapološo, thuto ya lefase, mošomo wa tša boiphedišo, mediro ya kgwebo le ditswalano le magagabo motho.

Go tsoma Mmušo pele go bolela mo go fetišago go ba le karolo e itšego kgweding e nngwe le e nngwe o bolela le ba bangwe ka morero wa Modimo. Go bolela go etiša dikgahlego tša Mmušo pele bophelong bja motho ka moka mola a dutše a hlokomela boikarabelo bjo bongwe bja Mangwalo ka mo go swanetšego.

Go na le ditsela tše dintši tšeo ka tšona Dihlatse tšeo di ineetšego tša Jehofa di godišago dikgahlego tša Mmušo.

Tokelo ya Tirelo ya Bethele

Ba bangwe ba šoma e le ditho tša lapa la lefase ka moka la Bethele. Se ke sehlopha sa bašomi ba badiredi ba nako e tletšego bao ba ithapetšego go dira selo lege e le sefe seo ba ka se abelwago bakeng sa go lokišetša le go gatiša dipuku tša Beibele, go hlokomela modiro o nyakegago wa ka ofising le go dira ditirelo tša go thuša bao ba dirago mediro e bjalo. Wo ga se modiro woo go wona ba hwetšago bophagamo bja motho ka noši goba dithoto tša dilo tše di bonagalago. Kganyogo ya bona ke go godiša Jehofa, gomme ba kgotsofatšwa ke ditokišetšo tšeo ba di direlwago ka dijo, madulo, tšhelete e nyenyane ya pušetšo bakeng sa ditshenyagalelo tša motho ka noši. Ka mohlala, ka baka la tsela ya bophelo ya lapa la Bethele, bahlankedi ba mebušo ya lefase kua United States ba ba lebelela e le ditho tša sehlopha sa bodumedi tšeo di dirilego keno ya bodiidi. Bao ba lego Bethele ba hwetša lethabo la go kgona go diriša maphelo a bona ka mo go tletšego tirelong ya Jehofa le go direng modiro wo o holago dipalo tše kgolo tša banababo bona ba Bakriste le batho bao ba sa tšwago go thabela, ka dinako tše dingwe e le ba ditšhaba-tšhaba. Go swana le tše dingwe tša Dihlatse tša Jehofa, le bona ba ba le karolo ka mehla bodireding bja tšhemo.

Lapa la pele la Bethele (goba lapa la Bible House ka ge a be a tsebja bjalo) le ile la hlongwa kua Allegheny, Pennsylvania. Ka 1896, sehlopha sa bašomi e be e le ba 12. Ka 1992 go be go e-na le ditho tša ka godimo ga 12 900 tša lapa la Bethele, di šoma dinageng tše 99. Go oketša moo, ge go be go se na madulo a lekanego meagong ya Mokgatlo, baithapi ba bangwe ba makgolo ba be ba sepela go ya le go boa magaeng a Bethele le difeketoring letšatšing le lengwe le le lengwe e le gore ba be le karolo modirong. Ba ile ba go lebelela e le tokelo go ba le karolo modirong o dirwago. Ge go nyakega thušo, Dihlatse tše dingwe tše dikete di ithapela go tlogela mešomo ya tšona ya tša boiphedišo le mediro e mengwe ka mabaka a fapa-fapanego a nako bakeng sa go thuša go aga meago yeo e nyakwago ke Mokgatlo bakeng sa go tlo e diriša mabapi le boboledi bja lefase ka moka bja ditaba tše di lokilego tša Mmušo wa Modimo.

Ditho tše dintši tša lapa la lefase ka bophara la Bethele di o dirile modiro wa tšona wa bophelo ka moka. Frederick W. Franz yo a bilego mopresidente wa bone wa Mokgatlo wa Watch Tower ka 1977, ka nako yeo o be a šetše a bile setho sa lapa la Bethele kua New York ka nywaga e 57, gomme o tšwetše pele tirelong ya Bethele ka nywaga e mengwe e 15 go fihla lehung la gagwe ka 1992. Heinrich Dwenger o thomile tirelo ya gagwe ya Bethele kua Jeremane ka 1911, ka morago ga moo a šoma ka boipoetšo kae le kae mo a bego a abelwa gona; gomme ka 1983, e lego ngwaga wo a hwilego ka wona o be a sa dutše a thabela tirelo ya gagwe e le setho sa lapa la Bethele kua Thun, Switzerland. George Phillips yo a tšwago Scotland o ile a amogela kabelo ya go ya ofising ya lekala Afrika Borwa ka 1924 (ge e be e hlokometše modiro wa boboledi go tloga Cape Town go ya Kenya) gomme a tšwela pele a šoma Afrika Borwa go fihla lehung la gagwe ka 1982 (e lego nako yeo ka yona diofisi tše šupago tša lekala la Mokgatlo le Dihlatse tše 160 000 di bego di šoma ka mafolofolo lefelong leo). Dikgaetšedi tša Bakriste tše bjalo ka Kathryn Bogard, Grace DeCecca, Irma Friend, Alice Berner le Mary Hannan le tšona di ile tša neela maphelo a tšona a ge e le batho ba bagolo tirelong ya Bethele, di dira bjalo go fihla lehung. Ditho tše dingwe tše dintši tša lapa la Bethele di be di dutše di šoma ka mo go swanago ka nywaga e 10, 30, 50, 70 le e fetago yeo.g

Balebeledi Bao ba Ikgafago ba Basepedi

Lefaseng ka bophara, go na le balebeledi ba ka bago 3 900 ba tikologo le ba selete, bao le bona ba hlokomelago dikabelo tša bona kae le kae mo ba nyakegago gona gotee le basadi ba bona, gantši dinageng tša gabo bona. Ba bantši ba bona ba tlogetše magae gomme bjale ba huduga bekeng e nngwe le e nngwe goba dibekeng tše dingwe le tše dingwe tše mmalwa gore ba hlankele diphuthego tšeo ba di abetšwego. Ga ba hwetše mogolo eupja ba leboga kudu dijo le marobalo tšeo ba di hwetšago moo ba hlankelago gona, gotee le tokišetšo e lekanetšego bakeng sa ditshenyagalelo tša motho ka noši. Kua United States, moo balebeledi ba 499 ba tikologo le ba selete ba bego ba hlankela gona ka 1992, bagolo ba ba basepedi ba na le palo-gare ya nywaga e 54, gomme ba bangwe ba bona ba be ba dutše ba šoma boemong bjo ka nywaga e 30, 40 goba go feta moo. Dinageng tše dintši, balebeledi ba ba sepela ka dikoloi. Tšhemo e lego ka tikologong ya Pacific gantši e nyaka gore go dirišwe difofane le diketswana tša papatšo. Mafelong a mantši balebeledi ba tikologo ba fihlelela diphuthego tša kgole ba nametše dipere goba ba sepela ka maoto.

Babulamadibogo ba Kgotsofatša Senyakwa sa Bohlokwa

Gore go thongwe boboledi bja ditaba tše di lokilego mafelong ao go ona go se nago Dihlatse, goba go nea thušo yeo e ka bago e nyakega ka mo go kgethegilego tikologong, Sehlopha se Bušago se ka rulaganyetša go romela babulamadibogo ba ba kgethegilego. Ba ke baebangedi ba nako e tletšego bao ba gafago bonyenyane diiri tše 140 kgweding e nngwe le e nngwe bodireding bja tšhemo. Ba itira bao ba hwetšagalago bakeng sa go šoma lefelong lege e le lefe moo ba nyakegago gona nageng ya gabo bona, goba mabakeng a mangwe, dinageng tša kgaufsi. Ka ge dinyakwa bakeng sa tirelo ya bona di ba tlogela ba e-na le nako e nyenyane ya mošomo wa boiphedišo goba ba se na yona bakeng sa go hlokomela dinyakwa tša dilo tše di bonagalago, ba newa tšhelete e nyenyane ya ditshenyagalelo bakeng a madulo le dinyakwa tše dingwe. Ka 1992 go be go e-na le babulamadibogo bao ba fetago 14 500 ba ba kgethegilego dikarolong tše di fapa-fapanego tša lefase.

Ge babulamadibogo ba pele ba kgethegilego ba be ba rongwa ka 1937, ba ile ba thoma modiro wa go bapalela beng ba dintlo dipolelo tše di gatišitšwego tša Beibele mejakong ya bona gomme ba diriša direkoto e le motheo wa dipoledišano tša Beibele maetong a go boela. Se se be se dirwa metseng e megolo mo go bego go šetše go e-na le diphuthego. Ka morago ga nywaga e sego kae, babulamadibogo ba ba kgethegilego ba ile ba thoma go romelwa ka mo go kgethegilego mafelong ao a se nago diphuthego goba moo diphuthego di bego di nyaka thušo e kgolo. Ka baka la modiro wa bona o atlegago, go ile gwa bopja diphuthego tše makgolo tše difsa.

Go e na le go akaretša tšhemo gomme ba fetela pele, ba be ba šoma lefelo le itšego gantši, ba latelela bohle bao ba thabelago gomme ba swara dithuto tša Beibele. Go ile gwa rulaganywa diboka bakeng sa batho bao ba thabelago. Ka gona kua Lesotho, e lego ka borwa bja Afrika, mmulamadibogo yo a kgethegilego bekeng ya gagwe ya pele o ile a laletša motho o mongwe le o mongwe yo a gahlanego le yena gore a tle go bona kamoo Dihlatse tša Jehofa di swarago Sekolo sa Bodiredi sa Pušo ya Modimo ka gona. Yena le lapa la gagwe ba ile ba swara lenaneo ka moka. Ka morago o ile a laletša bohle Thutong ya Morokami. Ka morago ga ge go rata go tseba ga mathomo go kgotsofaditšwe, ba 30 ba ile ba tšwela pele ba e-ba gona Thutong ya Morokami, gomme palo-gare ya bao ba bago gona sekolong e be e le 20. Dinageng tšeo go tšona baromiwa bao ba tlwaeditšwego Gilead ba dirilego mo gogolo go thoma boboledi bja ditaba tše di lokilego, ka dinako tše dingwe go be go e-ba le kgolo e akgofago ge Dihlatse tša tikologo yeo di be di thoma go swanelegela tirelo ya bobulamadibogo bjo bo kgethegilego, ka gobane ba gantši ba be ba ka kgona go šoma ka mo go atlegago kudu gare ga batho ba lefelong leo.

Go oketša go bašomi ba ba mafolofolo, go na le Dihlatse tše oketšegilego tše dikete tše magolo tša Jehofa tšeo le tšona di etišago dikgahlego tša Mmušo pele. Tše di akaretša batho ba banyenyane le ba bagolo, banna le basadi, ba ba lego lenyalong le bao ba sego lenyalong. Babulamadibogo ba ka mehla ba diriša tekanyetšo ya diiri tše 90 kgweding e nngwe le e nngwe bodireding bja tšhemo; babulamadibogo ba go thuša bonyenyane ba diriša diiri tše 60. Ba itirela phetho ya mo ba nyakago go bolela gona. Bontši bja bona ba šoma le diphuthego tšeo di hlomilwego, ba bangwe ba hudugela mafelong ao a lego lekatana. Ba hlokomela dinyakwa tša bona ka noši tša nama ka go šoma mošomo o itšego wa boiphedišo, goba ditho tša malapa a gabo bona di ka ba thuša ka go nea tšeo ba di hlokago. Ka 1992, ba ba fetago 914 500 ba bile le karolo tirelong e bjalo e le babulamadibogo ba ka mehla goba ba go thuša, bonyenyane lebakeng la karolo ya ngwaga.

Dikolo Tšeo di Nago le Merero e Kgethegilego

Go hlama baithapi bakeng sa mehuta e itšego ya tirelo, go lokišeditšwe dikolo tše di kgethegilego. Ka mohlala, ga e sa le go tloga ka 1943, Sekolo sa Gilead se tlwaeditše badiredi ba dikete bao ba nago le phihlelo bakeng sa modiro wa boromiwa, gomme dialoga di ile tša romelwa dikarolong ka moka tša lefase. Ka 1987 Sekolo sa Tlwaetšo ya Bodiredi se ile sa thoma go šoma bakeng sa go thuša go kgotsofatša dinyakwa tše kgethegilego, go akaretša go hlokomela diphuthego le boikarabelo bjo bongwe. Thulaganyo ya gore sekolo se swarelwe mafelong a fapa-fapanego e ile ya fokotša go sepela ga barutwana go ya lefelong la motheo gotee le go nyakega ga go ithuta leleme le lengwe e le gore ba holwe ke sekolo. Bohle bao ba laleletšwago go ya sekolong se ke bagolo goba bahlanka ba bodiredi bao ba ipontšhitšego gore ba tsoma Mmušo pele e le ka kgonthe. Ba bantši ba itirile ba ba hwetšagalago bakeng sa go šoma dinageng tše dingwe. Moya wa bona o swana le wa moporofeta Jesaya yo a itšego: “Ke nna é, nthomê.”—Jes. 6:8.

Gore go kaonefatšwe katlego ya bao ba šetšego ba šoma e le babulamadibogo ba ka mehla le ba ba kgethegilego, go ile gwa dirišwa Sekolo sa Tirelo ya Bobulamadibogo go tloga ka 1977. Mo go kgonegago, sekolo se be se rulaganywa tikologong e nngwe le e nngwe lefaseng ka moka. Babulamadibogo ka moka ba be ba laleletšwa go holwa ke thuto ye ya dibeke tše pedi. Ka mo go tšwelago pele ga e sa le go tloga nakong yeo, babulamadibogo bao ba feditšego ngwaga wa bona wa pele tirelong ba be ba dutše ba newa tlwaetšo e swanago. Go theoša go fihla ka 1992, babulamadibogo ba ka bago 100 000 ba ile ba tlwaetšwa sekolong se kua United States e nnoši; bao ba fihlago go 10 000 ba be ba tlwaetšwa ngwageng o mongwe le o mongwe. Ba bangwe ba 55 000 ba ile ba tlwaetšwa kua Japane, ba 38 000 kua Mexico, ba 25 000 kua Brazil le ba 25 000 kua Italy. Go okeletša thutong ye, ka mehla babulamadibogo ba ba le seboka se se kgethegilego le molebeledi wa tikologo nakong ya diketelo tša gabedi ka ngwaga phuthegong e nngwe le e nngwe le lenaneo le le kgethegilego la tlwaetšo ka bobedi molebeledi wa tikologo le molebeledi wa selete ka nako ya kopano ya ngwaga le ngwaga ya tikologo. Ka gona, bao ba bopago lešaba le legolo la bagoeledi ba Mmušo bao ba šomago e le babulamadibogo ga se feela gore ke bašomi bao ba ratago eupja gape ke badiredi bao ba tlwaeditšwego gabotse.

Go Šoma mo go Nyakegago Thušo e Kgolo Gona

Dihlatse tše dikete tše dintši tša Jehofa—tšeo tše dingwe tša tšona e lego babulamadibogo gomme tše dingwe e se bona—di itirile tše di hwetšagalago bakeng sa go šoma e sego feela setšhabeng sa gabo tšona eupja le mafelong a mangwe mo go nyakegago bagoeledi ba ditaba tše di lokilego. Ngwageng o mongwe le o mongwe ba dikete ba fetša lebaka la dibeke goba dikgwedi, go ya ka seo bona ka noši ba ka kgonago go se rulaganya, mafelong ao gantši a lego kgole le magae a gabo bona e le gore ba nee bohlatse go batho bao ba sa etelwego ke Dihlatse tša Jehofa ka mehla. Ba bangwe ba dikete ba tlogile mafelong a gabo bona gomme ba dula lefelong le lengwe e le gore ba nee thušo e bjalo ka lebaka le le oketšegilego. Ba bantši ba ba ke banyalani goba malapa ao a nago le bana. Gantši go huduga ga bona go be go akaretša go ya lefelong la kgaufsinyana, eupja ba bangwe ba ile ba huduga gantši nywageng e mentši. Bontši bja Dihlatse tše tše mafolofolo di bile di tsenetše tirelo ya dinageng dišele—tše dingwe ka nywaga e sego kae, tše dingwe di e tsenetše sa ruri. Di šoma mošomo lege e le ofe wa boiphedišo wo o nyakegago bakeng sa go hlokomela dinyakwa tša tšona, gomme di huduga ka ditshenyagalelo tša tšona ka noši. Kganyogo ya tšona e kgolo ke go ba le karolo ka mo go tletšego kamoo maemo a tšona a di dumelelago ka gona go gašeng molaetša wa Mmušo.

Ge hlogo ya lapa e se Hlatse, mo gongwe a ka huduša lapa la gagwe ka baka la mošomo. Eupja ditho tša lapa tšeo e lego Dihlatse di ka lebelela se e le sebaka sa go gaša molaetša wa Mmušo. Go bile bjalo ka Dihlatse tše pedi tšeo di tšwago United States tšeo di ilego tša ikhwetša di le kampeng ya tša meago sethokgweng sa Suriname nywageng ya mafelelo ya bo-1970. Ba be ba tsoga ka 4:00 a.m. gabedi ka beke, ba namela pese ya khamphani bakeng sa leeto le le sego bonolo la iri e tee go ya motsaneng, gomme ba fetša letšatši ba bolela. Go se go ye kae ba be ba swarela batho bao ba swerwego ke tlala ya therešo dithuto tše 30 tša Beibele bekeng e nngwe le e nngwe. Lehono go na le phuthego karolong yeo ye e bego e sa fihlelelwe ya sethokgwa sa pula e ntši.

Go Diriša Sebaka se Sengwe le se Sengwe se se Swanetšego Bakeng sa go Nea Bohlatse

Ee, ga se Dihlatse ka moka tša Jehofa tšeo di hudugelago dinageng tše dingwe, goba gaešita le ditoropong tše dingwe bakeng sa go phetha bodiredi bja tšona. Maemo a tšona a ka ba a sa di dumelele go bula madibogo. Lega go le bjalo, di lemoga gabotse keletšo ya Beibele ya go dira “boiteko bja pelo ka moka” le go ba le ‘mo gontši mo di ka go dirago modirong wa Morena.’ (2 Pet. 1:5-8, NW; 1 Ba-Kor. 15:58, NW) Di bontšha gore di tsoma Mmušo pele ge di etiša dikgahlego tša wona pele ga modiro wa tša boiphedišo le boitapološo. Bao dipelo tša bona di tletšego tebogo ya go leboga Mmušo ba ba le karolo ka mehla bodireding bja tšhemo go fihla bokgoleng bjoo maemo a bona a ba dumelelago, gomme ba bantši ba bona ba fetoša maemo a bona e le gore ba kgone go ba le karolo ka mo go tletšego. Ba dula ba phafogetše go diriša dibaka tše di swanetšego bakeng sa go nea bohlatse go ba bangwe ka Mmušo.

Ka mohlala, John Furgala yo a bego a e-na le kgwebo ya dilo tša tšhipi kua Guayaquil, Ecuador, o ile a bea dipuku tšeo di gogelago tša Beibele ka lebenkeleng la gagwe. Mola mothuši wa gagwe a be a tlatša otara, John o be a nea bohlatse go moreki.

Kua Nigeria Hlatse e mafolofolo yeo e bego e fepa lapa la yona ka go šoma e le ra-dikonteraka tša mohlagase le yona e be e ikemišeditše go diriša gabotse dibaka tša yona tša go kopana le batho e le gore e nee bohlatse. Ka ge e be e e-na le kgwebo, e ile ya rulaganya lenaneo la modiro. Mesong e mengwe le e mengwe pele ga mošomo wa letšatši e be e kopanya mosadi wa yona, bana, bašomedi le bao ba tlwaeletšwago modiro bakeng sa go ahla-ahla temana ya Beibele ya letšatši, gotee le diphihlelo tšeo di tšwago ka go Yearbook of Jehovah’s Witnesses. Mathomong a ngwaga o mongwe le o mongwe e be e nea barekedi ba yona kopi ya almanaka ya Mokgatlo wa Watch Tower gotee le dimakasine tše pedi. Ka baka leo, ba bangwe ba bašomedi ba yona le barekedi ba bangwe ba ile ba e tlatša borapeding bja go rapela Jehofa.

Go na le Dihlatse tše dintši tša Jehofa tšeo di nago le moya o swanago. Go sa šetšwe seo di se dirago, di tsoma ka go se kgaotše dibaka tša go abelana le ba bangwe ditaba tše di lokilego.

Lešaba le Legolo la Baebangedi Bao ba Thabilego ba Nako e Tletšego

Ge nywaga e dutše e e-ya, phišego ya Dihlatse tša Jehofa ya go bolela ditaba tše di lokilego ga se ya fokotšega. Gaešita lege beng ba bantši ba dintlo ba di boditše ka go tia kudu gore ga ba thabele, go na le dipalo tše dikgolo tša bao ba lebogago gore Dihlatse di ba thuša go kwešiša Beibele. Boikemišetšo bja Dihlatse tša Jehofa ke go tšwela pele di bolela go fihlela ge Jehofa ka noši a nea pontšho e lego molaleng ya gore modiro wo o phethilwe.

Go e na le go nyefiša, mokgatlo wa lefase ka bophara wa Dihlatse tša Jehofa ge e le gabotse o katološitše modiro wa wona wa go bolela. Ka 1982 pego ya ngwaga le ngwaga ya lefase ka moka e bontšhitše gore go dirišitšwe diiri tše 384 856 662 bodireding bja tšhemo. Nywaga e lesome ka morago (ka 1992) go dirišitšwe diiri tše 1 024 910 434 modirong wo. Ke’ng seo se bakilego koketšego yeo e kgolo modirong?

Ke therešo gore palo ya Dihlatse tša Jehofa e oketšegile. Eupja e sego ka tekanyo e swanago le ya diiri. Lebakeng leo, ge palo ya Dihlatse e be e oketšegile ka 80 lekgolong, palo ya babulamadibogo e ile ya hlatlogela go 250 lekgolong. Ka palo-gare kgweding e nngwe le e nngwe, mo e nyakilego go ba o tee go Dihlatse tše dingwe le tše dingwe tše šupago tša Jehofa lefaseng ka bophara o be a le sebopegong se itšego sa modiro wa boboledi wa nako e tletšego.

Ke bomang bao ba bego ba tšea karolo tirelong e bjalo ya bobulamadibogo? Ka mohlala, kua Repabliking ya Korea Dihlatse tše dintši ke basadi ba malapa bao ba sa šomego. Boikarabelo bja lapa bo ka ba bo sa dumelele bohle gore ba bule madibogo ka mehla, eupja palo e kgolo e ile ya diriša maikhutšo a matelele a marega a sekolo e le dibaka tša tirelo ya bobulamadibogo bja go thuša. Ka baka leo, 53 lekgolong ya palo-moka ya Dihlatse kua Repabliking ya Korea e be e le sebopegong se itšego sa tirelo ya nako e tletšego ka January 1990.

Nywageng ya pele, e bile moya wa phišego wa bobulamadibogo wa Dihlatse tša Philippines wo o dirilego gore di kgone go fihlelela dihlakahlaka tše makgolo tšeo di nago le baagi kua Philippines ka molaetša wa Mmušo. Phišego yeo e bile yeo e bonagalago kudu le go feta ga e sa le go tloga ka nako yeo. Ka 1992, bagoeledi ba 22 205 ka go ya ka palo-gare, ba be ba tšea karolo bodireding bja tšhemo e le babulamadibogo kua Philippines kgweding e nngwe le e nngwe. Gare ga bona go be go e-na le bafsa ba bantši bao ba bego ba kgethile go ‘gopola Mmopi wa bona’ le go diriša matla a bona a bofsa tirelong ya gagwe. (Mmo. 12:1) Ka morago ga nywaga e lesome tirelong ya bobulamadibogo, o mongwe wa bafsa ba bjalo o itše: “Ke ithutile go se fele pelo, go phela bophelo bjo bonolo, go ithekga ka Jehofa le go ikokobetša. Ke therešo gore ke bile le mathata le go šegama, eupja tše ka moka ga se selo ge di bapišwa le ditšhegofatšo tšeo di tlišitšwego ke go bula madibogo.”

Ka April le May tša 1989, Morokami o ile wa tšweletša go pepentšhwa ga Babele o Mogolo yeo e lego bodumedi bja maaka ka dibopego tša bjona tše dintši lefaseng ka bophara. Dihlogo di ile tša gatišwa sammaletee ka maleme a 39 gomme tša abja ka kudu. Kua Japane, moo palo ya Dihlatse tšeo di bulago madibogo gantši e bego e feta 40 lekgolong, tlhora e mpsha ya babulamadibogo ba go thuša ba 41 055 ba ile ba ngwadiša bakeng sa go thuša modirong ka April yeo. Kua Osaka Prefecture, Takatsuki City, Phuthegong ya Otsuka, bagoeledi ba 73 ba ba 77 bao ba kolobeditšwego ba be ba le sebopegong se itšego sa tirelo ya bobulamadibogo kgweding yeo. Ka April 8, ge bagoeledi ka moka ba Japane ba be ba kgothaletšwa go ba le karolo go abeng molaetša wo o bohlokwa, diphuthego tše makgolo, go swana le Phuthego ya Ushioda, kua Yokohama City di ile tša rulaganyetša tirelo ya letšatši ka moka ya setarateng le ya ntlo le ntlo, go tloga ka 7:00 a.m. go fihla ka 8:00 p.m., e le gore go fihlelelwe o mongwe le o mongwe yo a ka fihlelelwago lefelong leo.

Go etša ge go le bjalo gohle, Dihlatse tša Jehofa kua Mexico di a šoma bakeng sa go hlokomela dinyakwa tša tšona tša dilo tše di bonagalago. Lega go le bjalo, kgweding e nngwe le e nngwe ka 1992, palo-gare ya Dihlatse tše 50 095 tša Jehofa moo le tšona di ile tša rulaganya ditaba tša tšona bakeng sa go tsenela tirelo ya bobulamadibogo gore di thuše batho bao ba swerwego ke tlala ya therešo gore ba ithute ka Mmušo wa Modimo. Malapeng a mangwe bohle ka lapeng ba ile ba dirišana e le gore sehlopha ka moka goba bonyenyane ba bangwe ba bona ba kgone go bula madibogo. Ba thabela bodiredi bjo bo enywago. Ka 1992, Dihlatse tša Jehofa kua Mexico di be di swara dithuto tše di fetago 502 017 tša ka mehla tša Beibele tša legae le batho ka o tee ka o tee le dihlopha tša malapa.

Bagolo bao ba hlankelago dinyakwa tša diphuthego tša Dihlatse tša Jehofa ba na le boikarabelo bjo boima. Bontši bja bagolo kua Nigeria ke banna ba malapa, gomme go bjalo le ka bagolo le mafelong a mangwe a mantši. Lega go le bjalo, go okeletša tabeng ya go lokišetša go swara diboka tša phuthego goba go ba le karolo go tšona gotee le go dira bodiši bjo bo nyakegago bja mohlape wa Modimo, ba bangwe ba banna ba ba bile ba bula madibogo. Se se kgonega bjang? Go rulaganya nako ka kelohloko le tirišano ya lapa gantši ke mabaka a bohlokwa.

Lefaseng ka bophara ke mo go lego molaleng gore Dihlatse tša Jehofa di tšeetše godimo keletšo ya Jesu ya go ‘tsoma mmušo pele.’ (Mat. 6:33) Seo di se dirago ke pontšho e tšwago pelong ya lerato la tšona go Jehofa le go leboga ga tšona bogoši bja gagwe. Go swana le mopsalme Dafida, di re: “Ke tlo Xo xodiša, Wene Modimo wa-ka, Wene O lexo Kxoši. Ke tlo rêta leina la xaxo ka mehla le neng le neng.”—Ps. 145:1.

[Mengwalo ya tlase]

[Seswantšho go letlakala 292]

Go gatelelwa ka mo go oketšegilego ga boikarabelo bja go nea bohlatse

[Seswantšho go letlakala 293]

Ba lebelela go nea bohlatse ka ntlo le ntlo e le tokelo e bohlokwa-hlokwa

[Seswantšho go letlakala 294]

Go kwešiša seo tirelo ya pelo ka moka e lego sona

[Seswantšho go letlakala 295]

Seo “go tsoma mmušo pele” go se bolelago e le ka kgonthe

[Seswantšho go letlakala 301]

Dihlatse tše mafolofolo di etiša dikgahlego tša Mmušo pele ga mošomo wa tša boiphedišo le boitapološo

[Lepokisi/Seswantšho go letlakala 288]

“Ba Senyane ba Kae?”

Segopotšong sa lehu la Kriste ka 1928, pampišana yeo e ilego ya newa bohle bao ba bego ba le gona e be e e-na le sehlogo se se rego “Where Are the Nine?” Tlhaloso ya yona ya Luka 17:11-19 e ile ya kgoma pelo ya Claude Goodman gomme ya mo tutueletša go tsenela modiro wa go bapatša dipuku tša bodumedi, goba go bula madibogo le go kgotlelela tirelong yeo.

[Diswantšho go letlakala 296, 297]

Tirelo ya Bethele

Ka 1992, go be go e-na le ba 12 974 bao ba bago le karolo tirelong ya Bethele dinageng tše 99

[Diswantšho]

Thuto ya motho ka noši ke ya bohlokwa go ditho tša lapa la Bethele

Sepania

Legaeng le lengwe le le lengwe la Bethele, letšatši le thoma ka go ahla-ahlwa ga temana ya Beibele

Finland

Modiro ke wo o fapa-fapanego, eupja ka moka ga wona o direlwa go thekga go goeletšwa ga Mmušo wa Modimo

Fora

Papua New Guinea

United States

Jeremane

Philippines

Mexico

Brithania

Nigeria

Japane

Brazil

Netherlands

Afrika Borwa

[Lepokisi/Diswantšho go letlakala 298]

Ba Sego Kae Bao bHS.1,a Nago le Dipego tše Telele tša Tirelo ya Bethele

F. W. Franz—United States (1920-92)

Heinrich Dwenger—Jeremane (mo e ka bago nywaga e 15 ya 1911-33), Hungary (1933-35), Czechoslovakia (1936-39), ka morago Switzerland (1939-83)

George Phillips—Afrika Borwa (1924-66, 1976-82)

Bana ba motho ba banenyana (Kathryn Bogard le Grace DeCecca) bao ba gafilego palo-moka e kopantšwego ya nywaga e 136 tirelong ya Bethele—United States

[Seswantšho go letlakala 300]

Sekolo sa Tirelo ya Bobulamadibogo (ka ge go bontšhitšwe mo kua Japane) se neile bašomi ba masome a dikete ba mafolofolo tlwaetšo e kgethegilego

[Graph on page 303]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Babulamadibogo ba a Oketšega!

Babulamadibogo

Bagoeledi

Phesente ya Koketšego ga e sa le go Tloga ka 1982

250%

200%

150%

100%

50%

1982 1984 1986 1988 1990 1992

[Seswantšho go letlakala 284]

Kgaetšedi Early o ile a sepela go phatša karolo e kgolo ya New Zealand ka paesekele bakeng sa go abelana molaetša wa Mmušo le ba bangwe

[Seswantšho go letlakala 285]

Ka nywaga e 76—a sa nyalwa, a nyetšwe gomme ka morago e le mohlologadi—Malinda Keefer o ile a ikgafa bodireding bja nako e tletšego

[Diswantšho go letlakala 286]

Kharabane e lekanetšego e ile ya nea babulamadibogo ba bangwe ba pele madulo ge ba dutše ba tloga lefelong le lengwe ba e-ya go le lengwe

Canada

India

[Diswantšho go letlakala 286]

Frank Rice (yo a emego ka go le letona), Clem Deschamp (yo a dutšego ka pele ga Frank, le mosadi wa Clem e lego Jean kgaufsi le bona) le sehlopha kua Java go akaretša le Dihlatse-gotee le bona le batho bao ba sa tšwago go thabela

[Diswantšho go letlakala 288]

Bophelo bja Claude Goodman bja bodiredi bja nako e tletšego bo ile bja mo lebiša tirelong kua India le dinageng tše dingwe tše šupago

[Seswantšho go letlakala 289]

Ge Ben Brickell a be a phetše gabotse mmeleng, o ile a thabela go diriša bophelo bjo bobotse bja mmele tirelong ya Jehofa; mathata a magolo a tša maphelo nywageng ya ka morago ga se a mo dira gore a tlogele

[Seswantšho go letlakala 290]

Kathe Palm o ile a nea bohlatse mašemong a mehuta ka moka, go tloga meagong ya diofisi motseng o mogolo go ya kampeng e lego kgole ya moepong le polaseng ya dinku kua Chile

[Seswantšho go letlakala 291]

Boikemišetšo bja Martin le Gertrud Poetzinger bo hlalositšwe ka mantšu a: ‘Selo se tee seo ke se dirago ke se—go tsoma Mmušo pele’