Na Le Kile La Leka Go Nea Bohlatse Mantšiboa?
1 Ka moka ga rena re hwetša lethabo ka go ba ba tšweletšago modirong wa rena. Ka lehlakoreng le lengwe, ge re sa kgone go bona mafelelo a kgahlišago, modiro e ka ba o lapišago le o sa kgotsofatšego. Modiro o thata o nago le morero ke o putsago go motho ka noši, gomme ke tšhegofatšo. (Bapiša le Mmoledi 3:10-13.) Re ka diriša molao wo wa motheo modirong wa rena wa boboledi. Re tseba go tšwa phihlelong gore ge re e-ya ka ntlo le ntlo gomme re kgona go boledišana le batho ka Beibele, re boela gae re lapologile moyeng. Re ikwa gore re tloga re phethile se sengwe.
2 Mafelong a mangwe go thomile go ba thata kudu go hwetša batho gae diiring tše itšego tša letšatši. Dipego di bontšha gore mafelong a mantši batho ba fetago tekanyo ya 50 lekgolong ga ba gona gae ge re etela nakong ya mesong ya letšatši. Diphuthego tše dintši di ile tša swaragana le bothata bjo ka go dira dithulaganyo tša go nea bohlatse mantšiboa, gomme di bile le katlego e botse. Bagoeledi ba bega gore ge ba etela nakong ya thapama ya letšatši, batho ba bantši ba ba ba le gae, gomme ka kakaretšo batho ba ba ba iketlile kudu gomme ba e-na le tshekamelo e kgolo ya go theetša molaetša wa Mmušo. Na le ile la leka go nea bohlatse mantšiboa tšhemong ya gabo lena?—Bapiša le Mareka 1:32-34.
3 Bagolo Rulaganyetšang go Nea Bohlatse Mantšiboa: Mafelong a mangwe diboka tša tirelo ya tšhemo karolong ya mafelelo ya thapama goba karolong ya pele ya mantšiboa di ile tša thekgwa gabotse. Go ka naganelwa bagoeledi bao e lego bafsa bao ba tšwago sekolong thapama le batho ba bagolo bao ba feditšego modiro wa bona wa boiphedišo ka morago letšatšing. Bagoeledi ba bangwe bao ba sa kgonego go ya tirelong ya tšhemo mafelo-bekeng ba hwetša gore go nea bohlatse mantšiboa gare ga beke ke tsela e šomago go bona bakeng sa gore ba be le karolo ka mehla modirong wa boboledi.
4 Go na le mediro e fapa-fapanego yeo le ka kopanelago go yona ge go newa bohlatse mantšiboa. Le ka nea bohlatse ka ntlo le ntlo ka dimakasine goba la diriša mpho ya puku ya kgwedi. Mantšiboa ke nako e botse ya go etela batho bao ba bego ba se gona gae ge bagoeledi ba be ba etela pejana mosegare goba mafelo-bekeng. Mo gongwe go ka ba go e-na le tšhemo e botse bakeng sa go nea bohlatse setarateng, yeo e le dumelelago go ikopanya le batho ba e-tla gae go tšwa modirong. Ba bantši ba hwetša gore mantšiboa ke nako e kaone kudu ya go dira maeto a go boela go bao ba bontšhitšego kgahlego.
5 E-bang ba Elago Hloko le ba Bohlale: Go tšwela ka ntle ka morago ga ge šwahlane e swere goba ka morago ga mafsifsana go ka ba kotsi mafelong a mangwe. E ka ba bohlale go sepela ka babedi ka babedi goba ka dihlotswana ditarateng tšeo di bonegilwego gabotse gomme la etela magae goba meago ya difolete feela moo go nago le kgonthišetšo ya gore le tla lotega. Ge le kokota mojako, emang moo le ka bonwago gomme le itsebiše ka mo go kwagalago. E-bang bao ba nago le temogo. Ge le hlokomela gore le etetše ka nako yeo e sa swanelago, go etša nakong ya ge lapa le e-ja, ithapeleng go etela ka nako e nngwe. Gantši go kaone kudu go dira gore go nea bohlatse ga lena go dirwe diiring tša pele tša mantšiboa, go e na le go dira diketelo tša bošego ge beng ba dintlo mo gongwe ba tla ba ba itokišeletša go ya malaong.
6 Mantšiboa a matelele a selemo ke ao a swanetšego kudu bakeng sa go nea bohlatse mantšiboa. Ge re dutše re nea Modimo “tirelo e kgethwa mosegare le bošego,” Jehofa o tla šegofatša maiteko a rena e le ka kgonthe.—Kut. 7:15, NW.