O ka Šuthiša Dithaba!

GO YA ka pego, May 29, 1953 e bile letšatši la mathomo leo ka lona motho a ilego a ema godimo ga tlhora ya thaba e telele kudu lefaseng—e lego Mount Everest, ye e lego dimithara tše 8 848 ka godimo ga tekanyetšo ya lewatle. Ba thekgilwe ke banna ba fetago 450, Edmund Hillary wa New Zealand le Tenzing Norgay, e lego mo-Sherpa wa Nepal, ba ile ba fenya ka katlego maemo a kotsi a lehlwa le thedimošago, lehlwa le fahlago le go hlaelela ga moya (oxygen) gore ba fihle tlhoreng ya pakane ya bona ya bophagamo bja dikhilomithara tše 8,8.

Go namelela ditlhoreng tša dithaba tše telele kudu ka kgonthe ke bokgoni bjo kgethegilego. Lega go le bjalo seo se ka se ke sa swana le seo Jesu a se hlaloseditšego barutiwa ba gagwe: “Ke le botša therešo, ge nkabe tumelo ya lena e be e lekana le peu ya lehloko le be le ka botša thaba ye gore, ‘Tloga mo o ye kua’, gomme e be e tla šutha; go be go ka se be le se se le palelago.” Akanya o sa namele thaba eupja o e šuthiša!—Mateo 17:20, The Jerusalem Bible.

Ke’ng seo se hlohleleditšego Jesu gore a botse barutiwa ba gagwe se? Ba be ba sa tšwa go palelwa ke go fodiša mošemane yo a nago le batemona. Jesu o ile a gatelela lebaka leo ka lona ba ilego ba palelwa: Ba be ba hloka tumelo e oketšegilego. (Mateo 17:14-20) O ile a bapiša tumelo le peu ya lehloko, e lego selo seo ba bego ba se tseba gabotse. Gaešita lege peu ya lehloko e le gare ga dipeu tše ‘nyenyane kudu,’ ka morago ga gore e gole ka dikgwedi tše sego kae e tla ba e le sehlare. (Mateo 13:31, 32) Ka gona, Jesu o be a gatelela bokgoni bjo bogolo bjoo tumelo e nyenyane e ka bago le bjona ge e ba e hlagolelwa le go fepja ka tshwanelo—seo se bonalago se sa kgonege se tla kgonega.

Eupja ka morago ga go hlagolela tumelo e bjalo, ke mohuta ofe wa dithaba woo barutiwa ba Jesu ba bego ba tla kgona go o šuthiša? Go fo etša ge thaba ya kgonthe e ka ba e kgolo kudu, mathata a swanago le thaba a ka thibela tšwelopele ya rena tirelong ya Jehofa. ‘Dithaba’ tšeo mo gongwe e ka ba eng gomme re ka di ‘šuthiša’ bjang?

Moapostola Paulo ke mohlala wa Mokriste yo a ilego a lebeletšana le mathata a mantši. Go 2 Ba-Korinthe 6:4-10 le 2 Ba-Korinthe 11:23-28, o ka bala ka go ba ga gagwe le phihlelo ya go hloka, go bethwa, go golegwa, go robegelwa ke lesela-watle le dikotsi tše dingwe tše dintši. Go oketša go dilo tše, go be go e-na le “phatša nameng” ya seswantšhetšo, mo gongwe e be e le bothata bjo itšego bja mahlo. (2 Ba-Korinthe 12:7; Ditiro 14:15) O be a kgona bjang go fenya mathata a magolo bjalo a swanago le thaba gomme a phetha thato ya Modimo bakeng sa gagwe ka katlego? Paulo o ngwadile gore, “Ke kxôna tsohle ka Eo a mphaxo matla.” Se e be e le “xore matla a maxolo e bê a Modimo, e sexo a rena.” (Ba-Filipi 4:13; 2 Ba-Korinthe 4:7) Ka gona, Paulo o be a bota ka mo go feletšego go kgona ga Jehofa go mo matlafatša nakong e šoro. O be a ena le tumelo.

Go Šuthiša Dithaba Lehono

Na o kganyoga go oketša tirelo ya gago go Jehofa? Go swana le ba makgolo a dikete bao ba tladitšego palo e golago ya bagoeledi ba nako e tletšego (babulamadibogo), le wena mo gongwe o ka ba o bona go akgofa ga dinako gomme mo gongwe o ka ba o naganišiša e le ka kgonthe ka go oketša bodiredi bja gago. Lega go le bjalo, na o lebeletšane le bothata bjo bo bonalago e le bjo bogolo go swana le thaba e kgolo? Ge e ba go le bjalo, na o ka šuthiša dithaba? Ba dikete-kete ba dirile bjalo maitekong a bona a go oketša tirelo ya bona go Jehofa. Mo ke diphihlelo tša bona tše sego kae feela.

Kgaetšedi o mongwe o mofsa yo a bego a feditše sekolo gomme a hweditše maemo a godimo klaseng ya bona o be a kganyoga go bula madibogo eupja go hloka modiro e be e le bothata bja gagwe. O a laodiša:

“Dikgopolo tša-ka ka noši tšeo di fošagetšego le dipelaelo tša-ka mabapi le go bula madibogo ga-ka e ile ya ba bothata bjo ke bego ke swanetše go bo fenya. Ka ge ke be ke kgomegile kudu mabapi le go hwetša mošomo pele ga ge ke thoma go bula madibogo, ke be ke sa bote Jehofa ka mo go feletšego le go kgona ga gagwe go nea se se nyakegago go bao ba etišago borapedi bja gagwe pele. Ke ile ka dula ke nagana gore, ‘Sa pele ke tla hwetša mošomo gomme ka morago ke tla tlatša fomo ya bobulamadibogo.’ Ke be ke sa bule madibogo; gomme ge e le gabotse ke be ke senya nako e bohlokwa. Lega go le bjalo, o mongwe wa bagolo ba phuthego o ile a bontšha gore ge ke leta nako e telele pele ga ge nka thoma go bula madibogo, ke moo mešomo ya nako e tletšego e tlago go lebelelega e le e kaone, ka ge go be go se na selo lege e le sefe seo se bego se nthibela gore ke e amogele.”

O ile a dira’ng? “Ke ile ka rapela Jehofa go tšwa pelong gore moya wa gagwe o mokgethwa o hlahle ditiro tša-ka le kgopolo ya-ka.” Ka morago ga go fetša sekolong kgaetšedi yo o ile a bula madibogo ka nakwana gomme ka morago o ile a tsenela bodiredi bja bobulamadibogo bja ka mehla. Kapejana ka morago ga moo o ile a hwetša modiro o swanelago wa boiphedišo wo o bego o dumelelana le thulaganyo ya gagwe ya bobulamadibogo.

Mogolo o mongwe yo mosadi wa gagwe a bego a le tirelong ya bobulamadibogo gomme a e-na le bana ba babedi bao a bego a swanetše go ba godiša, o ile a nagana gore o swanetše go dira se se oketšegilego go feta go fo thekga lapa la gagwe ka tša ditšhelete. Go batho ba bangwe ba ba elago dilo hloko, mabaka ao a bego a mo thibela gore a tsenele tirelo ya bobulamadibogo a be a bonala e le a magolo kudu eupja o be a kganyoga go oketša bodiredi bja gagwe. Ke’ng seo se bego se swanetše go fetoga?

O bolela gore, “Ke nagana gore bothata bjo bogolo bjo ke bego ke swanetše go bo fenya ge e le gabotse e be e le nna ka noši. Bodiredi bja tšhemo e be e le selo seo ka mehla ke bego ke se thabela gomme ge ke bolela le bao ba lego bodireding bja nako e tletšego le go bona ditšhegofatšo tša bona, ke ile ka hwetša moya o mobotse wo ba bego ba o bontšha e le o goketšago. Ke be ke ipona ke le bodireding bja nako e tletšego ka letšatši le lengwe. Bothata ka kgopolo ya-ka e be e le gore bobulamadibogo e ile ya ba selo seo ke bego ke fo nagana ka sona. Eupja le ka mohla ke be ke sa ka ka inea letšatši leo ka lona ke bego ke tla rata go fihlelela pakane yeo.”

Ka morago ga go akanya ka seo ka thapelo, ngwanabo rena yoo o ile a thoma go direla pakane ya gagwe ya tirelo ya nako e tletšego. o ile a ya go mohlokomedi wa gagwe mošomong, a hlalosa maikemišetšo a gagwe gomme a kgopela gore a dumelelwe gore a šome diiri tše sego kae bekeng e nngwe le e nngwe. Ge e le mabapi le molao wa khamphani, mohuta wa thulaganyo yeo a bego a e nyaka o be o se wa ka wa ba gona pele.

O tšwela pele ka gore: “Mohlokomedi wa-ka o ile a phetha poledišano ka go bolela gore go na le kgonagalo e kgolo ya gore nka se hwetše thulaganyo yeo ke bego ke e kgopela. Ke be ke kgodišegile ka mo go feletšego gore ge e ba phetho ya seo e ithekgile ka yena a nnoši, gona karabo e be e tla ba aowa. Ka gona tumelelo e be e ka ba gona feela ka thekgo ya Jehofa. Beke le seripa ka morago, baokamedi ba ile ba dumelela thulaganyo ya-ka e mpsha. Ka morago ga go leboga mohlokomedi wa-ka, ke ile ka ya koloing ya-ka, ka e otlela ka feta dintlo tše sego kae, ka ema ka thoko gomme ka leboga Jehofa. Ee, pakane ya-ka ya tirelo ya nako e tletšego e be e ka ba selo sa kgonthe.”

Kgaetšedi yo a nyetšwego o ile a “šuthiša” thaba ya gagwe bjang? O a anega: “Ke na le bana ba bane le monna yo a sa dumelego. Ge ke be ke thoma go nagana ka bobulamadibogo, ke be ke e-na le mathata a mantšinyana. Bjo bongwe bja mathata ke gore monna wa-ka o be a se na mošomo ka lebakanyana ka ge mošomo wa gagwe o be o šongwa ka dihla gomme ke be ke šoma ka nakwana gore ke thuse ka melato. Ka gona ke ile ka ipotša gore gaešita lege ke be ke e-na le kganyogo, ke be nka se kgone go bula madibogo ka baka la maemo a-ka. Lega go le bjalo, mo ke moo ke bego ke swanetše go fetola kgopolo ya-ka. Ke ile ka lemoga gore ge e ba ke be ke dula ke gopola gore nka se kgone, gona le ka mohla ke be nka se leke. Potšišo e bohlokwa e latelago yeo ke bego ke swanetše go e araba e be e le e rego, Ke be ke tla hwetša matla a go bula madibogo kae? Ke ile ka hwetša karabo go Ba-Filipi 4:13. Ga se feela gore ke ile ka rapela Jehofa mabapi le taba yeo eupja ke ile ka thoma go ithekga ka yena ka mo go oketšegilego. Le gona ke ile ka gata megato e holago yeo e lebišago go fihleleleng ga-ka pakane ya-ka ka go ba le thulaganyo e botse le go ingwadiša ke le mmulamadibogo wa go thuša. Ge nako e dutše e e-ya, Jehofa o ile a tšwela pele a mpulela tsela gore ke tsene tirelong ya bobulamadibogo. Monna wa-ka o ile a kgona go boela mošomong gomme ke ile ka kgona go fokotša modiro wa-ka wa nakwana gore ke šome letšatši le tee ka beke. Ka moragonyana ga se, ke ile ka ba mmulamadibogo wa ka mehla.”

Go oketša go seo, tokelo ya go ba gona Sekolong sa Tirelo sa Babulamadibogo e ile ya mmulegela, e lego seo se ilego sa ipontšha e le thušo e kgolo bodireding bja gagwe. O bolela gore, “Ke nyaka feela go botša motho lege e le ofe yo a akanyago ka go bula madibogo gore a rapele Jehofa gomme a bee seo diatleng tša gagwe. Ka morago o katane gomme o tla go šegofatša bakeng sa go leka.”—Psalme 37:5.

Na diphihlelo tše ga di go thuše gore o bone kamoo tumelo ge e dirišwa e ka thušago Mokriste gore a fenye mathata ao a swanago le thaba? Ka gona, ge e ba o kganyoga go bula madibogo, gona hlahloba maemo a gago. Boledišana le ba bangwe bao ba bulago madibogo gomme o ithute go tšwa diphihlelong tša bona. Gata megato e holago yeo e lebišago go fihleleleng ga gago pakane ya gago. Go feta tsohle, rapela Jehofa mabapi le kganyogo ya gago; gomme ka morago o ithekge ka yena gore a šegofatše maiteko a gago. Ee, le wena o ka šuthiša dithaba!