Thuša Molebeledi wa Gago wa Thuto ya Puku ya Phuthego
1 Yo mongwe le yo mongwe wa rena o hwetša mehola e mentši Thutong ya Puku ya Phuthego. Kgweding e fetilego re ile ra bolela kamoo molebeledi wa Thuto ya Puku ya Phuthego a phethagatšago tema ya gagwe ka gona. Eupša re ka dira’ng go mo thuša gomme ka go rialo ra ikhola le go hola ba bangwe?
2 E-ba Gona Beke e Nngwe le e Nngwe: Ka ge dihlopha tša thuto ya puku e le tše nyenyane, go ba gona ga gago ke ga bohlokwa. Go dire pakane ya gago go ba gona beke e nngwe le e nngwe. O ka thuša gape le ka go fihla ka nako, ka ge se se thuša molebeledi go thoma seboka ka tsela ya thulaganyo.—1 Ba-Kor. 14:40.
3 Ditlhaloso tše di Agago: Tsela e nngwe yeo ka yona o ka thušago ke ka go lokišeletša gabotse le ka go nea ditlhaloso tše di agago. Ditlhaloso tše di bolelago ka taba e tee gantši e ba tše kaone kudu, gomme se le sona se kgothaletša ba bangwe go nea tlhaloso. Phema go leka go akaretša taba ka moka e lego serapeng. Ge e ba ntlha e lego tabeng e go kgoma pelo, matlafatša poledišano ka go bolela seo tlhalosong ya gago.—1 Pet. 4:10.
4 Ge e ba o neilwe tokelo ya go bala dirapa go holeng sehlopha, phetha kabelo ya gago ka mafolofolo. Go bala gabotse go tlaleletša tabeng ya gore thuto e atlege.—1 Tim. 4:13.
5 Go Nea Bohlatse ka Sehlopha: Diboka tša tirelo ya tšhemo di swarelwa mafelong a mantši a thuto ya puku, gomme go thekga ga gago ditokišetšo tše go thuša molebeledi ge a dutše a etelela pele modirong wa boebangedi. Kgonthišetša gore o tšea karolo ka mehla bodireding bja tšhemo. Lebelela ditokišetšo tše e le dibaka tša go batamela kgaufsi le bana beno le go ba kgothatša.
6 Dipego tša Tirelo ya Tšhemo: Go nea pego ya gago ya tirelo ya tšhemo kapejana mafelelong a kgwedi e nngwe le e nngwe ke tsela e nngwe ya go thuša molebeledi. Mo nee pego ya gago ka go lebanya. Mongwaledi o tla beakanya dipego tša tirelo ya tšhemo tšeo di kgobokeditšwego ke balebeledi ba thuto ya puku.
7 Go dirišana ga gago le molebeledi wa gago wa Thuto ya Puku ya Phuthego go tla lebogwa kudu. Go feta tšohle, o ka kgonthišega gore Jehofa o tla ba ‘le moya wo o o bontšhago.’—Ba-Fil. 4:23, bapiša le NW.