Letlolo La Dipotšišo

◼ Mehola ya go kopanela le phuthego yeo e abetšwego tšhemo yeo re dulago go yona ke efe?

Ka tokišetšo ya phuthego, re hwetša kgothatšo yeo e re ‘išago leratong le medirong e mebotse.’ (Ba-Heb. 10:24, 25) Phuthegong re ithuta therešo gomme re hlamelwa go phethagatša kabelo ya rena ya go dira barutiwa. (Mat. 28:19, 20) Le gona re matlafaletšwa go kgotlelela diteko ka potego gomme re na le balebeledi ba lerato bakeng sa go re thuša go lebeletšana ka katlego le dikgateletšo tše boima le dipelaelo. Ka gona, go molaleng gore phuthego ke ya bohlokwa kudu bakeng sa phologo ya rena ya moya. Lega go le bjalo, na go na le mehola ya go kopanela le phuthego yeo e abetšwego tšhemo yeo re dulago go yona?

Maemo a batho a fapa-fapane, gomme dilo tše bjalo ka mošomo wa boiphedišo, molekane yo a sa dumelego le dinamelwa di ka kgoma phetho ya mafelelo ya motho tabeng ye. Lega go le bjalo, ge motho a kopanela le phuthego yeo e abetšwego tšhemo yeo a dulago go yona, go na le mehola e kgonthišeditšwego bobedi ya moya le e mengwe. Bagolo ba ka kgona go ikopanya le bagoeledi ka moka kapejana kudu mabakeng a tšhoganyetšo. Matlolo a Dipotšišo a nakong e fetilego a ile a gatelela mehola e mengwe e mmalwa.—August 1991 (CD-ROM May 1991), April 1976 la Seisemane (CD-ROM March 1976) le la February 1967 la Seisemane (CD-ROM January 1967).

Ka tlwaelo, go bonolo go kopanela dibokeng tše di lego kgaufsi, di re nea sebaka sa go fihla nako e sa le gona bakeng sa go bolela le ba bangwe, go hlokomela dilo tša bohlokwa le go kopanela kopelong ya go bula le thapelo. Ge batho ba sa tšwago go thoma go kopanela ba dula tikologong ya gabo rena, gantši re ba boemong bjo bobotse bja go ba fihlelela, go swara dithuto tša Beibele le bona le go ba hlahla go ya dibokeng tšeo go lego bonolo go bona go ya go tšona.

Re tloga re kgodišegile gore dihlogo tša malapa di tla naganela taba ye ka thapelo, di leka-lekanye dintlha tše di akaretšwago bakeng sa go tseba se se kaone bophelong bja bona bjo bobotse bja moya le bja nama bja malapa a tšona.—1 Tim. 5:8.