Okonda Kuothera Dzuŵa—Tetezani Khungu Lanu!

YOSIMBIDWA NDI MTOLANKHANI WA GALAMUKANI! KU BRAZIL

KODI mumakonda kukachitira tchuthi kunyanja? Bwanji nanga kukwera mapiri? Ndiye kuti ndinu m’modzi mwa mamiliyoni amene amasangalala ndi kuchita zinthu panja. Komabe, chenjezo n’lakuti: Izi nthaŵi zambiri zimawonjezera kukhala padzuŵa. Kodi pali kuipa kulikonse kwa zimenezi? Ngati kulipo, mungadziteteze motani?

“Pathupi lanu mbali yaikulu kwambiri komanso mbali imene imakhala panja nthaŵi zambiri ndi khungu,” analemba motero Dr.  W. Mitchell Sams, Jr. Khungu lanu limathandiza kusunga madzi m’thupi kuti asathe ndikuti mudzimva kutenthera bwino. Limakuthandizani kuti muzitha kumva kuzizira, kutentha, kupweteka, kugwedera, komanso kumva malo okakala ndi osalala. Khungu lanu limathandiza kwambiri popanga vitameni D, imene ili yofunika kwambiri polimbitsa mafupa. Kupangidwa kwa vitameni D imeneyi kumachitika mothandizidwa ndi dzuŵa.

Komabe, khungu limawonongeka kwambiri mukamakhala padzuŵa nthaŵi yaitali. Mphamvu ya dzuŵa imene imafika pa dziko lapansi ili m’mitundu iŵiri; yosaoneka ndi maso ndi yooneka (Infrared and visible), komanso mtundu wina wotchedwa Ultraviolet wokhala ndi mitundu iŵiri A ndi B. (UVA ndi UVB). Mwayi wake, mphamvu ya dzuŵa ya mitundu ya cosmic rays, gamma rays ndi X rays siimafika pansi pano. Mlengalenga gawo la mpweya wotchedwa ozoni limatchingira mphamvu ya dzuŵa ya mtundu wa Ultraviolet C (UVC) ndipo mphamvu ya mtundu wa UVA ndi UVB imachepetsedwa zedi. Kuipa kwake, m’malo ena gawo la mpweya wa ozoni limeneli likuwonongeka. Asayansi ambiri akuti vuto limeneli likuchitika chifukwa cha mpweya wopezeka m’firiji umene umapangitsa kuti muzizizira ndiponso chifukwa cha mafuta amene amatulutsa utsi akamapangitsa zinthu kugwira ntchito. Mulimonse mmene ziliri, kukhala padzuŵa kwanthaŵi yaitali kumawononga kwambiri thanzi lanu.

Kuŵonjezera pa kusintha mtundu wa khungu lanu, mphamvu ya dzuŵa yamtundu wa ultraviolet rays ingayambitse madontho akuda pakhungu panu ndipo angachuluke n’kuumitsa khungu lanu. Ultraviolet ingafooketsenso maselo apakhungu panu, n’kukukalambitsani mudakali mwana, komanso makwinya owopedwa aja. Vuto lalikulu n’lakuti, kukhala nthaŵi yaitali padzuŵa lotentha ndi ultraviolet kungasokoneze mphamvu yoteteza matenda m’thupi mwanu ndipo zingayambitse matenda a pakhungu kapena kansa ya pakhungu. Kuwonjezera apo, khungu lowonongeka kapena lamatenda limakhudza maonekedwe anu, ndipo nthaŵi zambiri zimapangitsa manyazi ngakhalenso nkhaŵa.

Kodi Mungachite Chiyani?

Tsiku lililonse khungu lanu limafunika kuliteteza ku dzuŵa monga momwe limafunikira kutero nthaŵi zinazake zimene mwakhala padzuŵa kwambiri. Kodi chimene mungachite n’chiyani? Kuwonjezera pakuvala zovala zodzitetezera ndi kuchepetsa nthaŵi imene mumakhala padzuŵa, mungatsatire malangizo akatswiri amene anavomereza ubwino wogwiritsa ntchito mafuta oteteza khungu kudzuŵa. Kodi mungasankhe bwanji mafuta abwino oteteza khungu lanu kudzuŵa? Onani manambala osonyeza mlingo wakuteteza wotchedwa Sun protection factor (SPF) kosonyezedwa ndi opanga mafutawo. Ngati nambala ya SPF ili yaikulu, ndiye kuti mafutawo amatetezanso kwambiri. Anthu oyera amafunikira mafuta oteteza khungu kudzuŵa okhala ndi nambala yaikulu ya SPF kusiyana ndi anthu akuda. Choyenera kudziŵa n’chakuti: SPF amateteza ku mphamvu ya UVB yokha basi. Choncho, sankhani mafuta amene amateteza khungu ku mitundu yosiyanasiyana ya mphamvu za dzuŵa, komanso amene amateteza mphamvu ya UVA.

Ana, makamaka akhungu loyera, sachedwa kumva kutentha kwa dzuŵa. Ndiponso, buku la Fotoproteção (kudziteteza ku dzuŵa) linati, ana amakhala padzuŵa nthaŵi yaitali kusiyana ndi akulu. Kukhala ndi njira zotetezera khungu la mwana wanu ku dzuŵa, kwa zaka 18 zoyambirira za moyo wake kungamuteteze kwambiri kumatenda a kansa yapakhungu, limatero buku la Fotoproteção.

Dzuŵa ndi lofunika kwambiri pa moyo wadziko lapansi. Ndipo ndani sasangalala ndi nyengo yabwino ya dzuŵa? Komano musapusitsidwe ndi zithunzi zofala zosonyeza khungu loyera kukhala chitsanzo cha kukongola ndi unyamata! Tetezani thanzi lanu—tetezani khungu lanu mwa kusakhalitsa padzuŵa.

[Bokosi patsamba 17]

Tetezani Khungu Lanu!

1. Tetezani khungu lanu ku dzuŵa makamaka kuyambira 10:00 a.m mpaka 4:00 p.m., pamene dzuŵa limakhala likuswa mtengo.

2. Ngakhale masiku a mitambo, dzolani mafuta amene amateteza khungu ku UVA ndi UVB ndi amene ali ndi mankhwala oteteza ku mphamvu ya dzuŵa okhala ndi nambala yokwana 15 kapena kuposera.

3. Dzolaninso mafuta oteteza khungu ku dzuŵa pakatha maola aŵiri muli panja, makamaka ngati mukusambira kapena kuchita thukuta.

4. Valani zovala zotetezera, zolukidwa mothinitsa. Za mtundu wodera zimateteza bwino kwambiriko.

5. Valani chipeŵa chakhonde la masentimita pafupifupi khumi ndi magalasi a dzuŵa otetezera ku Ultraviolet.

6. Khalani pamthunzi pamene kuli kotheka kutero.

7. Peŵani zinthu zonyezimira, monga madzi, mchenga, ndi chipale chofeŵa, zimene zimapereka mphamvu ya dzuŵa yambiri imene ili yoipa.

[Mawu a Chithunzi]

(Kuchokera m’buku la Skin Savvy, lofalitsidwa ndi sukulu yamaphunziro apamwamba a khungu yotchedwa American Academy of Dermatology)

[Zithunzi patsamba 17]

Tetezani thanzi lanu ndi maonekedwe anu—tetezani khungu lanu

Chisamaliro chochuluka n’chofunika m’madera amene dzuŵa limanyezimira