Mungakonze Mphamvu Yanu ya Kukumbukira

“Ndimakonda kuiŵala.” Kodi munanenapo zimenezo? Ngati zili choncho, musataye mtima. Njira zingapo zapafupi ndi kuyesetsa pang’ono zingadzetse kuwongokera kodabwitsa. Musachepetse ubongo wanu. Mphamvu zake nzodabwitsa.

KODI ndi motani mmene ubongo umagwirira ntchito zake zodabwitsa? M’zaka zaposachedwa ubongo wasanthulidwa kuposa ndi kale lonse. Koma pamene chidziŵitso chikukula, zimene tikudziŵa ponena za mmene ubongo umakwaniritsira zinthu zimene umachita nzochepa kwambiri.

Sizikudziŵika bwino mmene timaphunzirira ndi kukumbukirira zinthu, koma ofufuza akuyesayesa kuvumbula chinsinsi chimenechi. Zina zophatikizidwa pa kuphunzira ndi kukumbukira ndizo maselo a minyewa pafupifupi mamiliyoni zikwi 10 mpaka mamiliyoni zikwi 100, mu ubongo. Koma palinso mfundo zolunzanitsa minyewayo kuchulukitsa nthaŵizi pafupifupi zikwi khumi. Lingaliro lina nlakuti pamene mfundo zimenezi, kapena ma synapse, amalimbitsidwa mwa kugwiritsiridwa ntchito, kuphunzira kumachitika.

Pamene tikalamba, mphamvu ya malingaliro imachepa; timachita zinthu mochedwa. Maselo a ubongo samadzikonzanso, ndipo achikulire mwachionekere amatayikidwa ena a iwo nthaŵi zonse. Koma malinga ndi mmene timagwiritsirira ntchito ubongo wathu, tingasunge mphamvu ya malingaliro athu kwa nthaŵi yaitalipo.

Mkhalidwe wathu wa maganizo umayambukira ubongo wathu. Malingaliro otsimikiza, ndi achimwemwe amawongolera magwiridwe a ntchito a ubongo pa msinkhu uliwonse. Kupsinjika maganizo pang’ono kungakhale kwa phindu, koma kosatha, ndi kopambanitsa kumaletsa ubongo kugwira ntchito bwino. Maseŵero olimbitsa thupi angathandizire kuthetsa kupsinjika kwa maganizo.

Ngakhale kuti zimenezi nzolimbikitsa, tingamaiŵalebe zinthu zofunika, mosasamala kanthu za msinkhu wathu. Kodi tingawongolere? Mbali imodzi imene anthu ambiri amavutika nayo ndiyo kukumbukira maina a anthu amene timakumana nawo.

Kukumbukira Maina a Anthu

Njira zingapo zapafupi zingakuthandizeni kukumbukira maina mosavuta. Kufunitsitsa kudziŵa munthuyo kumathandiza. Dzina la munthu nlofunika kwa iye. Kaŵirikaŵiri sitimatha kukumbukira dzina chifukwa chakuti sitinalimvetse poyamba. Motero pamene akutchula dzina, limvetsetseni dzinalo. Pemphani munthuyo kulitchulanso ngati nkofunika kapena ngakhale kutchula malembedwe ake. Ligwiritsireni ntchito mobwerezabwereza m’makambitsirano anu. Pamene mutsazikana, m’tchuleni dzina. Mudzadabwa mmene mfundo zochepa zimenezi zidzakuthadizirani.

Njira ina imene ingawonjezere kwambiri mphamvu yanu ya kukumbukira maina ndiyo ya kugwirizanitsa dzina la munthu ndi chinthu chinachake chimene mungapange chithunzi chake m’malingaliro anu. Ngati m’maganizo mwanu mungapange chithunzi cha chochitikacho, chingakhale bwino kwambiri.

Mwachitsanzo, munthu wina anali ndi vuto la kukumbukira dzina lothera la munthu wina amene anadziŵana naye mwawamba, limene linali Chimtengo. Motero pamene anaona munthuyu, anaganizira za tanthauzo la liwu lakuti “chimtengo,” “mtengo waukulu kwambiri.” Anaganizira za mwamunayo kuti ali mu mtengowo, akumadula nthambi zake. Nthaŵi zonse zinali kugwira ntchito; dzina la Chimtengo linali kubwera mwamsanga m’maganizo ake.

Maina ambiri angakhale alibe tanthauzo kwa inu, motero mudzafunika kuikapo liwu lina limene limafanana ndi dzinalo. Sizili ndi kanthu ngati liwu limene mwaikapo silikufanana ndendende m’matchulidwe ndi dzinalo. Mphamvu yanu ya kukumbukira idzachita bwinopo kukukumbutsani dzinalo chifukwa cha zimene mwaligwirizanitsa nalo. Pamene mupanga mawu anuanu ndi zithunzithunzi, chinthucho chimakumbukika bwino kwambiri.

Mwachitsanzo, mwadziŵitsidwa kwa a Penelope Kachewere. Mungayikepo liwu lakuti peni mbatata-chewere. Mungapange chithunzi cha peni imene mwana wasomeka ku mbatata ya kachewere.

Muyenera kuyeseza zimenezi mwakhama kwa kanthaŵi, koma zimagwiradi ntchito. Harry Lorayne akufotokoza njira imeneyi m’buku lake lakuti How to Develop a Super-Power Memory, ndipo aigwiritsira ntchito pa zochitika zambiri zapoyera. Iye akuti: “Nthaŵi zambiri ndadziŵitsidwa kwa anthu zana limodzi kapena mazana aŵiri m’mphindi khumi ndi zisanu kapena zochepera pamenepo, osaiŵalapo dzina ndi limodzi lomwe!”

Mmene Mungaloŵezere Mpambo wa Zinthu Pamtima

Kodi ndi motani mmene mungakonzere mphamvu yanu ya kukumbukira mpambo wa zinthu zosiyanasiyana? Njira yosavuta imatchedwa link system (njira yogwirizanitsa zinthu). Imagwira ntchito motere: Umapanga chithunzithunzi m’maganizo cha chinthu chilichonse chimene chili pampambowo ndiyeno nkumagwirizanitsa chithunzi cha chinthu choyamba ndi chithunzi cha chinthu chachiŵiri, ndiyeno chitaninso chimodzimodzi pa chachiŵiri ndi chachitatu, tero basi.

Mwachitsanzo, mukufuna kukagula zinthu zisanu kumsika: mkaka, buledi, gulobu, anyenzi, ndi ice cream. Yambani mwa kugwirizanitsa mkaka ndi buledi. Yerekezerani kuti mukuthira mkaka kuchokera m’lofu yabuledi. Pamene kuli kwakuti zimenezo zingakhale zoseketsa, zidzathandiza kuloŵeza zinthuzo m’mtima mwanu. Ndiponso, yesani kuikamo machitidwe ake m’chithunzi cha m’maganizocho mmene inu muli kuthira mkaka.

Mutagwirizanitsa mkaka ndi buledi, pitirizani ndi chinthu chotsatira, gulobu yanyale. Mungagwirizanitse lofu yabuledi ndi gulobu mwa kuganizira kuti mukuyesa kusomeka lofu yabuledi pamphako pomwe mumasomeka gulobu. Ndiyeno gwirizanitsani gulobu yanyale ndi anyenzi mukumaganizira kuti mukusenda gulobu yaikulu yanyale ndi kumalira pamene mukuchita zimenezo. Komabe, zili bwino ngati mwazigwirizanitsa nokha. Kodi mungagwirizanitse zinthu ziŵiri zothera, anyenzi ndi ice cream? Mwinamwake mungaganizire kuti mulikudya ice cream yaanyenzi!

Onani ngati mungakumbukire mpambowo. Ndiyeno yesani mphamvu yanu ya kukumbukira ndi mpambo wanuwanu. Upangeni kukhala wautali mmene mungafunire. Kumbukirani, kupanga zimene mwagwirizanitsa kukhala zokumbukika mosavuta, mungazipange kukhala zoseketsa kapena ngakhale zachilendo kapena zosayenderana. Yesani kuganizira mmene mukuzichitira, ndipo zisinthanitseni.

Ena angatsutse kuti njira imeneyi imatenga nthaŵi kuposa kungoloŵeza mpambowo pamtima. Komabe, imatenga nthaŵi kufotokoza kuposa kuigwiritsira ntchito. Pamene mungoiyeseza, mudzayamba kumagwirizanitsa zinthu mwamsanga, ndipo kukumbukira kwanu, limodzinso ndi liŵiro la kuphunzira zinthu, zidzakhala bwino kwambiri kuposa ngati mukuyesa kuphunzira popanda njira iliyonse. Pamene anthu 15 anapemphedwa kukumbukira mpambo wa zinthu 15 zosiyanasiyana popanda njira iliyonse, avareji ya zinthu zimene anakumbukira inali 8.5. Atagwiritsira ntchito njira yogwirizanitsa zinthu m’maganizo pa mpambo wina, gulu limodzimodzilo linachita avareji ya 14.3. Inde, ngati mukumbukira kunyamula mpambo wolembedwa wa zinthu zimenezi pamene mupita kukagula zinthu, pamenepo mungakumbukire zinthu zonse 15—kupeza 100 peresenti!

Kukumbukira Zimene Mumaŵerenga

M’nyengo ino ya chidziŵitso chochuluka, mbali ina imene ambiri a ife tikufuna thandizo ndiyo ya kuphunzira bwinobwino. Kuphunzira nkofunika kusukulu, m’malonda, kaamba ka ubwino waumwini, ndi pokonzekera kulankhula kwa anthu. Ndiponso, Mkristu ayenera kuika pambali nthaŵi ya phunziro laumwini la Baibulo.—Yohane 17:3.

‘Koma ndimavutika kukumbukira zimene ndaphunzira,’ munganene motero. Kodi nchiyani chimene chiyenera kuchitidwa? Kudziŵa kugwiritsira ntchito bwino nthaŵi ya phunziro kungakuthandizeni kukumbukira zimene mumaŵerenga. Nazi njira zina.

Pamene mukuphunzira, mufunikira kulinganiza bwino zinthu. Khalani ndi mabuku, zolembera, ndi mapepala pafupi. Yesani kuchitira phunziro m’malo abwino okhala ndi zocheutsa zazing’ono ndi kuunika kwabwino. Zimani wailesi ndi wailesi yakanema.

Khalani ndi nthaŵi yoikika ya phunziro. Kwa ena, kuchita phunziro tsiku lililonse kwa nthaŵi zazifupi kumathandiza kwambiri kuposa kugwiritsira ntchito nthaŵi yaikulu paphunziro limodzi. Kuli bwino kugaŵa nthaŵi yanu m’zigawo. M’malo mochita phunziro mosalekeza kwa maola aŵiri, kungakhale bwino kugaŵa nthaŵiyo m’magawo a mphindi kuyambira 25 mpaka 40 chigawo chilichonse, ndi mphindi zingapo za kupuma pakati. Kufufuza kwasonyeza kuti zimenezi zimachititsa munthu kukumbukira zinthu kwambiri.

Sankhani zimene mudzaŵerenga panthaŵi yanu ya phunziro. Zimenezi zimathandizira kusumika maganizo. Musanayambe kuŵerenga buku, khalani ndi mphindi zingapo zolisanthula lonse. Yang’anani mutu wake. Santhulani mpambo wa zamkati mwake umene umasonyeza zimene zili m’bukumo mwachidule. Ndiyeno ŵerengani mawu oyamba. Pano cholinga cha wolemba ndi mmene akuonera zinthu zimatchulidwa.

Musanayambe kuŵerenga mutu, usanthuleni wonse. Yang’anani mitu yaing’ono, zithunzithunzi, matchati, mawu ake a chidule, ndi ndime yoyamba ndi yomaliza. Yang’anani pa ziganizo zoyamba za ndime iliyonse. Ziganizo zimenezi kaŵirikaŵiri zimakhala ndi mfundo zazikulu zimene nkhani yazikidwapo. Khalani ndi chithunzi chonse. Dzifunseni kuti: ‘Kodi nchiyani chimene wolemba anafuna kusonyeza? Kodi ndingapindulemo nchiyani m’nkhaniyi? Kodi mfundo zake zazikulu ndi ziti?’

Kusumika maganizo nkofunika. Muyenera kudziloŵetsamo kotheratu. Chinsinsi chake ndicho kupanga nthaŵi ya phunziro lanu kukhala yokondweretsa kumlingo womwe mungakhoze. Kulitsani chikhumbo mwa kuganizira za mbali za chidziŵitsocho zimene mungagwiritsire ntchito. Ziikeni m’chithunzithunzi. Gwiritsirani ntchito mphamvu ya kununkhiza, kulaŵa, ndi kukhudza moyerekezera ngati nkhani yake ikukhudza zimenezi.

Pamene mwamvetsa chifuno cha nkhaniyo, mungayambe kulemba manotsi. Kulemba bwino manotsi kungafulumize kumvetsa ndi kukumbukira kwanu chidziŵitsocho. Manotsi safunikira kukhala ziganizo zonse zathunthu koma ayenera kukhala mawu aakulu kapena magulu a mawu amene adzakuthandizirani kukumbukira mfundo zazikulu.

Kumvetsa chidziŵitso sikumatanthauza kwenikweni kuti zonse mudzazikumbukira mtsogolo. Choonadi ndicho chakuti m’maola 24 a kuphunzira, chidziŵitso chokwanira 80 peresenti chimaiŵalika, kwakanthaŵi. Zimenezo zikumveka kukhala zolefula, koma chidziŵitso china kapena mbali yaikulu ya 80 peresentiyo chingapezedwenso mwa kubwereramo m’nkhaniyo. Pambuyo pa gawo lililonse la phunziro, bwereranimo kwa mphindi zingapo. Ngati nkotheka, bwereranimonso tsiku lotsatira, ndiyeno mlungu wotsatira, ndiyeno mwezi wotsatira. Kugwiritsira ntchito kwanu mfundo zimenezi kungakuthandizeni kupindula kwambiri ndi nthaŵi yanu yamtengo wapatali ya phunziro ndi kukumbukira zimene mwaŵerenga.

Motero musachepetse ubongo wanu. Mphamvu ya kukumbukira zinthu ingawongokere. Wasayansi wina ananena za ubongo kukhala “chinthu chocholoŵana koposa chimene tapeza m’chilengedwe chathu chonse pakali pano.” Uwo umasonyeza nzeru zowopsa ndi mphamvu za Mlengi wake, Yehova.—Salmo 139:14.

[Chithunzi patsamba 15]

Kuti mukumbukire mpambo wa zinthu, gwiritsirani ntchito “link system” (njira yogwirizanitsa zinthu): Pangani zithunzithunzi m’maganizo za zinthuzo chimodzi ndi chimodzi. Ndiyeno gwirizanitsani chithunzi cha chinthu choyamba ndi chithunzi cha chinthu chachiŵiri, tero basi

Mpambo wa zogula:

1. Mkaka 1 ndi 2 zagwirizanitsidwa

2. Buledi 2 ndi 3 zagwirizanitsidwa

3. Gulobu yanyale 3 ndi 4 zagwirizanitsidwa

4. Anyenzi 4 ndi 5 zagwirizanitsidwa

5. Ice Cream