ZIMENE ACHINYAMATA AMAFUNSA

Kodi Baibulo Lingandithandize Bwanji?—Gawo 3: Zimene Mungachite Kuti Kuwerenga Baibulo Kuzikuthandizani Kwambiri

Mukatsegula Baibulo mudzaona kuti lili ndi mawu ambirimbiri. Zimenezitu zisamakuchititseni mantha n’kumaopa kuliwerenga. M’malomwake, muziliona ngati tebulo lomwe lili ndi zakudya zambirimbiri zomwe simungakwanitse kudya zonse pa nthawi imodzi koma mungasankhe kudya zokhazo zomwe mungazikwanitse pa nthawiyo.

Kuti Baibulo lizikuthandizani kwambiri mukamaliwerenga, muziika maganizo anu onse pa zomwe mukuwerengazo. Nkhaniyi, ikuthandizani kuti muzichita zimenezi.

Nkhaniyi ikufotokoza

Chifukwa chake muyenera kuika maganizo anu onse pa zomwe mukuwerenga m’Baibulo

Mukamawerenga Baibulo mwakhama nthawi zonse, m’pamene mumapindula kwambiri. Taganizirani chitsanzo chotsatirachi: Mukaika masamba a tiyi m’madzi otentha kwa nthawi yochepa, kakomedwe kake kangakhale kosiyana ngati mutadikira kaye kuti masambawo akhaleko kwa kanthawi m’madzi otenthawo chifukwa tiyi wake angakhale wokoma kwambiri.

Kapu ya tiyi yajambulidwa mzera pakati. Mbali ina ili ndi tiyi wa masamba ochepa, pomwe mbali ina ili ndi tiyi wa masamba okwanira bwino.

N’chimodzimodzinso ndi kuwerenga Baibulo. M’malo mongowerenga mofulumira n’cholinga choti mumalize, muzipeza nthawi yoganizira zomwe mukuwerengazo. Zimenezi ndi zomwe munthu amene analemba Salimo 119 ankachita. Iye ananena kuti: “Ndimasinkhasinkha chilamulocho tsiku lonse.”—Salimo 119:97.

N’zoona kuti simuchita kufunika tsiku lonse lathunthu kuti muzingowerenga komanso kuganizira za Baibulo basi. Koma mfundo ndi yakuti munthu amene analemba salimoyu ankapeza nthawi yoganizira Mawu a Mulungu. Zimenezi zinamuthandiza kuti azisankha zochita mwanzeru.—Salimo 119:98-100.

“Mayi anga anandiuza kuti, ‘Umakhala ndi masiku 7 pa mlungu ndipo pa masiku amenewa umakhala ndi zinthu zako zambiri zoti uchite. Kodi sungapezeko nthawi yoti uzimupatsa Yehova? Zimenezitu ndi zabwino.’”—Melanie.

Kuganizira mfundo za m’Baibulo kudzakuthandizani kuti muzisankha zinthu mwanzeru. Mwachitsanzo, mukamasankha anthu oti muzicheza nawo kapena mukamayesedwa kuti muchite zinthu zoipa.

Zomwe mungachite kuti muzipindula kwambiri mukamawerenga Baibulo

Muzikhala ndi cholinga. Mtsikana wina dzina lake Julia, ananena kuti: “Mumafunika kukonza ndandanda yowerengera Baibulo, kudziwa zomwe mukufuna kuwerenga, nthawi yoti muwerengere komanso malo amene mukufuna kuwerengera.”

Mtsikana akulemba ndandanda yake yowerengera Baibulo pakalendala.

Muzipeza malo opanda zosokoneza. Mtsikana wina dzina lake Gianna, ananena kuti: “Muzipeza malo opanda phokoso komanso muziuza anthu a m’banja lanu za ndandanda yanu yowerengera Baibulo kuti asamakusokonezeni pamene mukuwerenga.”

Ngati mukugwiritsa ntchito foni kapena chipangizo china, muzitchera kuti pasamabwere mauthenga omwe angakusokonezeni. Mukhozanso kumawerenga Baibulo lopulinta. Kafukufuku amasonyeza kuti kuwerenga buku lochita kupulinta kumathandiza kuti uzimva mosavuta zimene ukuwerengazo. Koma zimakhala zovuta kuti maganizo ako azikhala pa zimene ukuwerengazo ngati ukugwiritsa ntchito chipangizo chamakono.

“Ndimaona kuti kuwerengera pafoni kumakhala kosokoneza. Foni yanga imabweretsa mauthenga kapena batire limatha moto kapenanso intaneti imavuta. Pamene kugwiritsa ntchito buku lopulinta kulibe mavuto amenewa koma ndimangofunika kuti pamalo omwe ndikuwerengerapo paziwala mokwanira.”—Elena.

Muziyamba ndi pemphero. Muzipempha Yehova kuti akuthandizeni kumvetsa, kukumbukira komanso kuti mfundo zimene mukufuna kuwerenga m’Baibulo zikuthandizeni pa moyo wanu.—Yakobo 1:5.

Kuti muzichita zinthu zogwirizana ndi pemphero lanu, muzifufuza mozama zomwe mukuwerengazo. Kodi mungachite bwanji zimenezi? Ngati mukugwiritsa ntchito pulogalamu ya JW Library kapena mukuwerenga Baibulo la pa intaneti, mungadine pavesilo kuti mupeze mfundo zina zowonjezera komanso nkhani zokhudza vesilo.

Muzidzifunsa mafunso. Mwachitsanzo: ‘Kodi ndikuphunzira chiyani zokhudza Yehova pa nkhani imene ndikuwerengayi? Kodi nkhaniyi ikusonyeza khalidwe liti la Yehova limene ndingatsanzire?’ (Aefeso 5:1) ‘Kodi ndi zinthu ziti zimene ndikuphunzira munkhaniyi zimene ndingazigwiritse ntchito pa moyo wanga?’ (Salimo 119:105) ‘Kodi zimene ndikuwerengazi ndingazigwiritse ntchito pothandiza ena m’njira ziti?’—Aroma 1:11.

Muzidzifunsanso kuti: ‘Kodi zimene ndawerengazi zikugwirizana bwanji ndi mfundo yaikulu ya m’Baibulo?’ Funso limeneli ndi lofunika kwambiri. N’chifukwa chiyani? N’chifukwa chakuti zonse zimene timawerenga m’Baibulo kuyambira Genesis mpaka Chivumbulutso n’zogwirizana mwa njira inayake ndi mfundo yaikulu ya m’Baibulo, yofotokoza zimene Yehova adzachite pofuna kuyeretsa dzina lake pogwiritsa ntchito Ufumu wakumwamba komanso kutsimikizira kuti iyeyo ndi woyenera kulamulira komanso amalamulira m’njira yabwino kwambiri.

Zimene achinyamata anzanu amanena

“Ngati mumakonda kuwerenga nkhani zofotokoza mbiri yakale, muziwerenga nkhani za m’Baibulo zokhudza nthawi imene zinthuzo zinachitika kapenanso zokhudza mitundu ya anthu akale. Ngati mumakonda kuphunzira zokhudza makhalidwe a anthu, muziphunzira za anthu monga Davide. Aliyense angapeze zinazake zimene angaphunzire m’Baibulo. Zimangotengera zimene iweyo ungakonde kuphunzira.”—Judah.

“Ndikamawerenga nkhani inayake m’Baibulo, ndimakonda kuganizira za munthu aliyense amene ndikuwerenga nkhani yake kaya ankachita zoipa kapena zabwino. Kenako ndimadzifunsa kuti, ‘Kodi n’chiyani chimene chinachitikira munthu ameneyu? Kodi khalidwe lake linali lotani, nanga zinthu zinamuyendera bwanji chifukwa cha khalidwe lakelo?’ Kenako ndimadzifunsa kuti, ‘Kodi nkhaniyi ingandithandize bwanji?’”—Mackenzie.

“Ndimayesa kufufuza zokhudza nkhani yonse imene ndikuwerenga m’Baibulo. Mwachitsanzo, ndimadzifunsa mafunso monga: Kodi inalembedwa liti? Ndi ndani amene anailemba, nanga cholinga chachikulu cha buku la m’Baibulo limeneli n’chiyani? Nkhani zambiri zingagwirenso ntchito masiku ano koma kufufuza mozama kumandithandiza kumvetsa bwino mmene zochitika za munkhaniyo zinakhudzira anthu amene analipo pa nthawiyo.”—Elle.

Ndikamawerenga Baibulo, ndimaganizira mmene ndingafotokozere zimene ndikuwerengazo kwa munthu wina. Kodi ndingamuthandize bwanji kumvetsa nkhaniyi? Ndingagwiritse ntchito chitsanzo chiti kuti amvetse mfundo yaikulu munkhaniyi? Kuganizira mayankho a mafunso amenewa kumandithandiza kumvetsa bwino zomwe ndikuwerengazo. Ndaona kuti kuphunzitsa ena ndi njiradi yabwino yophunzirira zinthu.”—Owen.