PHUNZILO 10
Kodi Misonkhano ya Mboni za Yehova Ingakupindulileni Motani?
Kodi munayamba mwaitanilidwa ku msonkhano wa Mboni za Yehova? Ngati mukalibe kusonkhanapo nawo, mungadodome kupitako kwa nthawi yoyamba. Mungadzifunse kuti: ‘Kodi cimacitika n’ciyani ku misonkhano imeneyi? N’cifukwa ciyani ili yofunika? Ndipo n’cifukwa ciyani niyenela kupitako?’ M’phunzilo lino, muona kuti kusonkhana pamodzi na anthu ena kungakuthandizeni kumuyandikila Mulungu, komanso kungakupindulileni kwambili.
1. Kodi cifukwa cacikulu cimene Mboni za Yehova zimasonkhanila pamodzi n’ciyani?
Onani cifukwa cacikulu cosonkhanila pamodzi cimene wolemba Baibo wina anachula. Iye anati: “Pamsonkhano, ndidzatamanda Yehova.” (Salimo 26:12) A Mboni za Yehova nawonso amakondwela ngako kusonkhana capamodzi. Kuzungulila dziko lonse lapansi, iwo amasonkhana wiki iliyonse kuti atamande Mulungu, kuimba nyimbo, na kupemphela. Kangapo m’caka, amakumananso pa misonkhano ikulu-ikulu kuti alambile Mulungu.
2. Kodi mudzaphunzila ciyani ku misonkhano yathu?
Pa misonkhano yathu timaphunzila zocokela m’Mawu a Mulungu, ‘kuwafotokozela ndi kumveketsa tanthauzo lake.’ (Ŵelengani Nehemiah 8:8.) Kumeneko, mudzaphunzila za Yehova na makhalidwe ake abwino. Pamene muphunzila zimene Mulungu wacita cifukwa cokukondani, inunso mudzayamba kumukonda kwambili. Mudzadziŵanso mmene angakuthandizileni kuti mukhale na moyo wokhutilitsa.—Yesaya 48:17, 18.
3. Kodi mungapindule bwanji poceza na anthu ena ku misonkhano?
Yehova amatilangiza kuti “tiganizilane kuti tilimbikitsane pa cikondi ndi nchito zabwino. Tisaleke kusonkhana pamodzi.” (Aheberi 10:24, 25) Ku misonkhano yathu, mudzapeza anthu amene amakondana zenizeni. Amenenso amafunitsitsa kuphunzila zambili ponena za Mulungu, monga inu. Mudzamva kuti poceza amakambilana mfundo zolimbikitsana zocokela m’Baibo. (Ŵelengani Aroma 1:11, 12.) Mudzadziŵananso na anthu ena, okwatila komanso osakwatila, amene akukhalabe acimwemwe ngakhale akukumana na mavuto osiyana-siyana. Izi ndiye zifukwa zina zimene Yehova amafunila kuti tizisonkhana pamodzi nthawi zonse.
KUMBANI MOZAMILAPO
Dziŵani mmene misonkhano ya Mboni za Yehova imacitikila, na cifukwa cake muyenela kuyesetsa kumapezekapo.
4. Misonkhano ya Mboni za Yehova
Akhristu oyambilila anali kukumana nthawi zonse kuti alambile Yehova. (Aroma 16:3-5) Ŵelengani Akolose 3:16, na kukambilana funso ili:
Kodi Akhristu oyambilila anali kum’lambila bwanji Yehova?
Masiku ano, a Mboni za Yehova nawonso amasonkhana pamodzi nthawi zonse pamalo awo olambilila. Kuti muone mmene misonkhano yawo imacitikila, tambani VIDIYO. Pambuyo pake onani cithunzi ca msonkhano wa mpingo, na kukambilana mafunso aya.
Kodi mwaona kufanana kotani pa zimene zimacitika pa Nyumba ya Ufumu, na zimene mwaŵelenga pa Akolose 3:16?
Pa zimene mwaona mu vidiyo kapena pa cithunzici, n’ciyani cina cimene cakusangalatsani?
Ŵelengani 2 Akorinto 9:7, na kukambilana funso ili:
N’cifukwa ciyani misonkhano ya Mboni za Yehova ni yaulele?
Pamodzi na mphunzitsi wanu, onani zimene zidzaphunzilidwa pa msonkhano wotsatila.
Kodi ni mbali iti ya msonkhano imene idzakusangalatsani kwambili kapena kukuthandizani?
Kodi mudziŵa?
Pa jw.org, mungapeze malo na nthawi zocitila misonkhano padziko lonse.
Ku misonkhano yathu kumakhala nkhani zokambidwa, zitsanzo za ulaliki, na mavidiyo. Timayambila nyimbo na pemphelo, kumalizilanso nyimbo na pemphelo
Pa mbali zina za pulogilamu, omvetsela amapemphedwa kupelekapo ndemanga
Aliyense ni wolandilidwa—mabanja, mbeta, okalamba, ngakhale ana
Misonkhano yathu ni yaulele. Mboni za Yehova sizilipilitsa poloŵa kapena kupititsamo mbale ya zopeleka
5. Kupezeka pa misonkhano kumafuna kulimbika
Ganizilani citsanzo ca makolo a Yesu pamodzi na ana awo monga banja. Kuti akapezeke ku msonkhano wa pacaka, anali kuyenda mtunda wa makilomita 100 kudutsa m’mapili, kucokela ku Nazareti kupita ku Yerusalemu. Ŵelengani Luka 2:39-42, na kukambilana mafunso aya:
Kodi muganiza ulendo wa ku Yerusalemu umenewu unali wopepuka?
N’cifukwa ciyani inunso muyenela kulimbikila kuti muzipezekako ku misonkhano?
Kodi m’pake kucita kuivutikila misonkhano? Cifukwa ciyani?
Baibo imanena kuti kusonkhana pamodzi kuti tilambile Mulungu n’kofunika kwambili. Ŵelengani Aheberi 10:24, 25, na kukambilana funso ili:
N’cifukwa ciyani tiyenela kupezeka ku misonkhano nthawi zonse?
ANTHU ENA AMAKAMBA KUTI: “N’kosafunikila kucita kupita ku misonkhano. Ukhoza kumangoŵelenga Baibo kunyumba.”
Ni lemba liti, kapena citsanzo ca m’Baibo, cimene cionetsa zimene Yehova amafuna?
CIDULE CAKE
Kupezeka ku misonkhano kudzakuthandizani kudziŵa zambili za Yehova, kulimbitsa ubwenzi wanu na iye, komanso kum’lambila pamodzi na ŵena.
Mafunso Obweleza
N’cifukwa ciyani Yehova amatilimbikitsa kuti tizisonkhana pamodzi?
Kodi mudzaphunzila ciyani ku misonkhano ya Mboni za Yehova?
Kodi mungathandizikenso m’njila zina ziti popezeka ku misonkhano?
FUFUZANI
Bwanji ngati mumadodoma zakuti mukapezeke ku msonkhano? Onani mmene munthu wina amene anali kumva motelo anayambila kukonda misonkhano.
Onani zimene mnyamata wina anali kucita kuti azikondwela nayo misonkhano komanso kuti apitilize kupezekako.
Onani mmene ena amaionela nkhani yosonkhana.
“N’cifukwa Ciani Mufunika Kupezeka ku Misonkhano ku Nyumba ya Ufumu?” (Nkhani ya pawebusaiti)
Onani mmene mmodzi wa m’gulu la zigaŵenga anasinthila umoyo wake atapezeka ku msonkhano wa Mboni za Yehova.
“Kulikonse Kumene Ndinali Kupita Ndinali Kukhala ndi Mfuti Yanga” (Nsanja ya Mlonda, July 1, 2014)