Kunola Luso Lathu mu Ulaliki—Kuonetsa Mocitila Phunzilo la Baibulo Pogwilitsila Nchito Buku la Zimene Baibo Imaphunzitsa

Cifukwa Cake Kuli Kofunika: Anthu ambili sadziŵa zimene timatanthauza tikamanena kuti timaphunzila Baibulo kwaulele ndi anthu panyumba zao. Iwo angamaganize kuti mwina afunika kupezeka pa gulu la ophunzila Baibulo kapena kucita kosi inayake. M’malo mongowauza kuti timaphunzila Baibulo, bwanji osawaonetsa mocitila phunzilo? M’mphindi zocepa cabe, muli pakhomo, mungaonetse munthu kuti phunzilo la Baibulo n’losavuta ndipo n’losangalatsa.

Mmene Mungacitile:

Mukazidziŵikitsa, funsani mwininyumba ngati amadela nkhawa za mmene zinthu zidzakhalila mtsogolo.
Kenako nenani kuti anthu ambili ali ndi nkhawa zofanana ndi zimenezo, ndipo muonetseni tsamba losonyeza nkhani za m’buku lakuti Zimene Baibo Imaphunzitsa. Fotokozani kuti buku limeneli lili ndi nkhani zosavuta kumva zosonyeza zimene Baibo imaphunzitsa zokhudza tsogolo ndi nkhani zina, ndiyeno m’funseni nkhani imene yamucititsa cidwi.
Mpatseni buku ndi kumuonetsa nkhani imene wasankha. Kenako fotokozani kuti mafunso amene ali kuciyambi kwa nkhani, adzayankhidwa m’ndime zotsatilazi.
Pemphani mwiniyumba kuti aŵelenge ndime yoyamba ngati angakonde. Ndiyeno funsani funso la m’ndime imeneyo, ndi kupezela pamodzi yankho lake. Ŵelengani ndi kukambilana malemba amene sanagwidwe mau omwe ndi ogwilizana ndi yankho. Muonetseni mmene mwalembela mzele kunsi kwa yankho m’buku lanu.
Kambilanani ndime yotsatila, koma pa nthawiyi pemphani mwininyumba kuti ayese kuyankha funso m’mau akeake.
Muyamikileni ndipo pangani makonzedwe oti mukabweleleko kukamaliza nkhani imeneyo.
Ngati n’kotheka, muonetseni vidiyo ya mutu wakuti Kodi Phunzilo la Baibulo Limacitika Bwanji?

Yesani Kucita Izi Mwezi Uno:

Pemphelani kwa Yehova kuti adalitse kuyesayesa kwanu kuti muyambitse phunzilo la Baibulo.—Afil. 2:13.
Mukadzapita mu ulaliki tsiku lina, mukayese kukhazikitsa phunzilo la Baibulo pogwilitsila nchito buku la Zimene Baibo Imaphunzitsa, kapena kuonetsa vidiyo yakuti Kodi Phunzilo la Baibulo Limacitika Bwanji?