Kunola Luso Lathu mu Ulaliki—Thandizani Ophunzila Kukhala ndi Cizolowezi Cabwino Cophunzila Baibulo

Cifukwa Cake Kuli Kofunika: Kuti ophunzila Baibulo akule mwa kuuzimu, afunika kuphunzila mfundo zozama osati cabe mfundo zoyambilila za m’Mau a Mulungu. (Aheb. 5:12–6:1) Kuphunzila kumafuna khama. Kumaphatikizapo kugwilizanitsa zimene tikuphunzila ndi zimene tikudziŵa, komanso kuona mmene tingazigwilitsile nchito. (Miy. 2:1-6) Ngati ophunzila Baibulo amafufuza zinthu paokha, amaphunzila kuyankha mafunso a m’Baibulo pogwilitsila nchito zofalitsa zathu. Kuyesetsa kwao kugwilitsila nchito zimene akuphunzila, kudzawathandiza kulimbana ndi ziyeso zimene angakumane nazo monga Akristu.—Luka 6: 47, 48.

Mmene Tingacitile:

Fotokozani ubwino wopempha thandizo la Yehova musanayambe phunzilo lililonse.—Yoh. 14:26; 1 Akor. 2:10.
Mukangoyambitsa phunzilo, limbikitsani wophunzila wanu kuti azikonzekela phunzilo la Baibulo kukali nthawi. Muonetseni buku lanu ndipo m’phunzitseni mmene mumalembela mzele kunsi kwa yankho kapena mfundo yofunika.
Thandizani wophunzila Baibulo wanu kuyankha m’mau akeake, osati kucita kuŵelenga yankho la funso lililonse m’buku lake.
Limbikitsani wophunzila Baibulo wanu kuŵelenga Mau a Mulungu tsiku lililonse. Muonetseni ndandanda ya kuŵelenga Baibulo pa jw.org kapena Nsanja ya Olonda ya August 1, 2009, tsamba 15, yoonetsa mmene angacitile zimenezi. Kukhala ndi cizolowezi coŵelenga Baibulo tsiku ndi tsiku kumafuna kulimbikila. Komabe, kucita zimenezo n’kopindulitsa kwambili.—Sal. 1:2, 3.
Onetsani wophunzila wanu mmene angapezele mayankho a mafunso a m’Baibulo, pogwilitsila nchito Watchtower Laibulale kapena LAIBULALE ya pa INTANETI ya Watchtower kapena Buku Lofufuzila Nkhani. Muthandizeni kudziŵa kalembedwe kacidule ka mabuku amene timaseŵenzetsa pa misonkhano ya mpingo.

Yesani Kucita Izi Mwezi Uno:

Mukatsiliza kuphunzila nkhani iliyonse kapena kamutu kalikonse, funsani wophunzila Baibulo wanu kuti afotokoze mwacidule zimene waphunzila. Ngati mulibe phunzilo, yesezani kufotokoza mwacidule zimene inu mwaŵelenga m’Baibulo kapena ndime ya mu Nsanja ya Mlonda kuti muone ngati mwamvetsa zimene mwaŵelenga.