12 Panga Evi Molingi

OTYO OTYITYI?

Tyina tuli nokupopia okupanga tyimwe, katuli-ko nokupopia ovipuka vina wahanda ñgeno ukala navio. Tuli nokupopia otyipuka ulisoka umwe nawa, oti monthiki yo ngandi mandyilingi tyo ngandi no tyo ngandi, pahe olikuatehila umwe ulinge ngo omu wetyisokela.

Vimwe upondola okupanga, mavityindi ononthiki mbumwe, pamwe hamwe onosimanu mbumwe umwe. Ovikwavo vipondola avityindi onohanyi mbumwe, pamwe avityindi umwe enima like oo evali. Evi viokutyinda enima, upondola okuvilinga katutu-katutu.

OITYI OTYIPUKA OTYO TYESUKISILA?

Ove tyina ulinga etyi wapanga okulinga, otyilingi umwe ngo omu wetyipangele, uliyumba vali onthumbi, uhambukwa; tupu mulikuata-po vali nomapanga ove.

Uliyumba vali onthumbi: Tyina ulinga otyipuka tyimwe wapangele, tyikupa vali ondundo yokupanga otyikwavo otyinene vali. Tupu tyina vakwenyi vamekuhongiliya ulinge otyipuka tyimwe tyapenga, ­motyivili okuanya.

Omapanga: Ovanthu vetyihole tyokukala novanthu vana vetyii etyi vahanda okulinga, avatutumba umwe opo vetyimone. Ine mupanga tyimwe nepanga liove amulikuatehila mutyimone, mamulikuate-po vali.

Ehambu: Tyina upanga okulinga tyimwe otyilingi umwe, uhambukwa.

“Ame ndyipanga umwe nawa ovipuka viange ndyihanda okulinga, mokonda opo ndyityivila vali okusoka komutwe. Tyina pahe ulinga umwe etyi wapangele, otyilingi umwe nawa ngo omu wetyisokelele, uhambukwa!” — Christopher.

ONONDUNGE MBO MBIMBILIYA: “Ou utala-tala komphepo, kakunu, ou utala-tala komakaka, kakateya.” — Eclesiastes 11:4.

OITYI UPONDOLA OKULINGA?

Linga ovipuka evi utyivile okupanga nawa ovipuka viove ovilingi umwe.

Soka kovipuka wahanda okulinga. Nga wasoka, pahe otale evi molingi tete nevi mavilandulako, ngatyo wenda natyo otyo.

Soka etyi molingi utyivile. Nga wasoka otyipuka wahanda okulinga, pahe olingi ngetyi:

• Soka onthiki otyipuka tyatyo otyo tyina okupwa.

• Soka kovipuka mosukisa okulinga, nevi mosuku navio.

• Soka kovipuka vipondola okukutyika, pahe osoko oñgeni molingi viehekutyike.

Kwata ovilinga. Wahakevelele onthiki moti: ‘Haa ovipuka aviho pahe vielifwilapo nawa, pahe mandyihimbika.’ Onthiki oyo kamaiya. Apeho una okusoka kotyipuka upondola okulinga uhimbike, otyilingi umwe. Etyi walinga-ko tyihoneka wahalimbueko.

ONONDUNGE MBO MBIMBILIYA: “Omunthu wombili upanga ovipuka aviende umwe nawa.” — Provérbios 21:5.