Lilongesa Ondaka ya Huku
Okuti Ombimbiliya Ipopia Etyi Matyikamoneka Komutwe?
Monthele ei muna omapulo amwe hamwe uhole okulinga, nokulekesa apa movasi omakumbululo Mombimbiliya yove. Onombangi mba Jeova mavakala nehambu liokutomphola noove konthele yomakumbululo oo.
1. Okuti omaulo Ombimbiliya apopia otyili?
Huku Wepondolo aliho oe vala wi nawa etyi matyikamoneka komutwe. (Amós 3:7) Mongeleka, tunde kohale waulile okuti makuya omunthu umwe maihanwa okuti o Mesiya ine Kristu. Mesiya ankho matundu mombuto ya Abraiau omulume wekolelo. Makatumina opo ovanthu aveho vokutavela vakamone omuenyo omuwa uhena ovitateka. (Gênesis 22:18; Isaías 53:4, 5) Omunthu Oo Wokualaua ankho matundu mo Mbelei.—Tanga Miquéias 5:2.
Jesus walekesile okuti o Mesiya. Etyi ankho nkhele kuakamba omanima 700, Ombimbiliya yapopile okuti Mesiya matyitwa nomumphembela, nokutombwa. Maave omuenyo wae opo aevele ononkhali mbovanyingi, nokuihilwa kumwe novahona. (Isaías 7:14; 53:3, 9, 12) Tupu etyi kuakamba omanima 500, Ombimbiliya yati, oe manyingila mo Jelusalei tyavelama kotyimbulu nokulandeswa o 30 onombongo mbovivela. Ovio aviho viafuiswapo.—Tanga Zacarias 9:9; 11:12.
2. Okuti Huku wapopile omivo?
Etyi kuakamba omanima alamba 500, Ombimbiliya yaulile nawa enima Mesiya mamoneka. Omuvo oo ankho onosimano mbomanima, tyilekesa okuti kese “simano” ankho omanima epanduvali. Okuhonyeka onosimano 7 no nosimano 62, tyituuka 69 onosimano mbomanima. Ngotyo, onosimano ombo mbutuuka omanima 483. Onalupi omuwo wahimbika? Ngetyi tyipopia Ombimbiliya, omuwo oo wahimbika etyi omuumbili wa Huku Neemias ehika mo Jelusalei ahimbika okupindulapo epundaumbo. Ehipululo lio va Persia liati otyo tyahimbika mo 455 P.K.E. (Neemias 2:1-5) Jesus wambatisalua akala o Mesiya menima 29 P.K., etyi palamba omanima 483, omuvo waulilue.—Tanga Daniel 9:25.
3. Okuti omaulo Ombimbiliya hono afuiswapo?
Jesus wapopile ovipuka vihuvisa mavikamoneka mononthiki mbuno. Wapopia konthele yonondaka onongwa Mbouhamba wa Huku mambukayovola ovanthu aveho vena ohole na Huku. Ouhamba maukamanako ouye uno wovivi.—Tanga Mateus 24:14, 21, 22.
Omaulo Ombimbiliya apopia nokuayandyuluka ovipuka aviho mavimoneka konthyulilo youye uno. Ombimbiliya ipopia okuti ovanthu mavakevela ovatumini vaeteko ouwa, mahi tyotyili ovo mavanyono oohi. Ononkhumbi mbuetuako novilwa, nondyala, novinimawe, nomauvela, mambuliyawisa. (Lucas 21:11; Revelação 11:18) Ovanthu kamavakakala novituwa oviwa. Momuvo oo wokuepuiya, ovalanduli va Jesus mavakaivisa onondaka onongwa Mbouhamba wa Huku momalongo aeho.—Tanga Mateus 24:3, 7, 8; 2 Timóteo 3:1-5.
4. Oityi matyikapita novanthu komutwe wandyila?
Huku Wepondolo aliho, una ovipuka oviwa apakela ovanthu vekolelo. Jesus Kristu, o Mesiya, navana aholovona opo vakakale keulu, mavakatumina ovanthu pano pohi. Mavakakala ovatumini Vouhamba maukatumina omanima ovityita ekwi. Vokuankhia mavatutiliswa avakakoyeswa opo vakale nomuenyo wahapu. Tupu, Ouhamba maukahakula ovanthu aveho. Ouvela nononkhia kamavikakalako vali.—Tanga Revelação 5:10; 20:6, 12; 21:4, 5.
Opo unoñgonoke vali konthele oyo, tala pomafo 23-25 no 197-201 momukanda ou ukahi apa. Oityi Ombimbiliya Tyili Ilongesa?