Oñgeni Tupondola Okukala Ovanthu Ovakuatyili Nokuayumbwa Onthumbi

OVIPUKA patyi vivali ankho viakolela movilinga via Jesus? Tete, Jesus kaovolele okupilulula omaongano opulitika, mahi wakuatesileko ovanthu okupilulula omitima. Mongeleka tala etyi atoneka okupopia Melongomona liae Liokomphunda. Etyi nkhele ehenepopie okuti ovalongwa vae vesukisa okukala ngomongwa notyimimi, wapopila ovateheleli vae okuti, vena ehambu liotyotyili ovo vana “vaimbuka omasuka-suka avo opamphepo.” Ayawisako okuti: “Vomutima wapoleya, . . . no vokuasukuka omutima, . . . no vana-mbembwa, vena ehambu. (Mateus 5:1-11) Jesus wakuatesileko ovalanduli vae okutala okuti vesukisa okupilulula omalusoke avo novituwa, opo vilikuate novitumino via Huku konthele yotyiwa notyivi nokuumbila Huku nomutima auho.

Vali, etyi Jesus amona ovanthu vekahi nokumona ononkhumbi, okankhenda kae kemulunda okupepula emone liavo. Anthi, kaovolele okumanako ononkhumbi ambuho mbovanthu. (Mateus 20:30-34) Wahakulile ovavei, mahi omauvela nkhele atualako alo hono. (Lucas 6:17-19) Wakuatesileko vana ankho valingwa onya, mahi okulingwa onya na hono nkhele tyitualako. Waavelele okulia ovanthu, mahi ondyala nkhele itualako okuipaa ovanthu ovanyingi.—Marcos 6:41-44.

Wapilulula Omitima Viovanthu Nokuokeya Emone Liavo

Omokonda yatyi Jesus esukile vali unene nokupilulula omitima viovanthu nokuokeya ononkhumbi, mahi ahapilulula omaongano ine okumanako ononkhumbi? Jesus ankho utyii okuti Huku makaundapesa Ouhamba wae komutwe opo amaneko omautumini aeho ovanthu naatyiho tyieta ononkhumbi. (Lucas 4:43; 8:1) Anthi, etyi ovalongwa vaita Jesus opo akale vali omuvo omunyingi okuhakula ovavei, Jesus wevepopila okuti: “Tuendei komphangu onkhuavo, pomaumbo opopepi, opo ndyikaivise, mokonda otyo neila.” (Marcos 1:32-38) Jesus waokeya emone liovanthu ovanyingi, mahi kwe ankho tyakolela vali okuivisa nokulongesa ondaka ya Huku.

Onombangi mba Jeova hono valinga ononkhono mbokutualako novilinga viokuivisa, okuhetekela Jesus. Vaokeya ononkhumbi mbovanthu mokuvekuatesako muetyi vesukisa. Mahi Onombangi kavalingi ononkhono mbokumanako onya ilingwa mouye. Vetavela okuti apa katutu Ouhamba wa Huku maukamanako atyiho tyieta ononkhumbi. (Mateus 6:10) Nga Jesus, valinga ononkhono mbokupilulula omitima viovanthu mahi kavapilulula omaongano opulitika. Otyo tyaviuka, mokonda tyieta ovitateka ovinene ha pulitika, mahi ovituwa viovanthu.

Ovanthu Vayumbwa Onthumbi

Tupu, Onombangi mba Jeova vetavela okuti mokonda Ovakristau, vesukisa okukala ovanthu ovawa. Moluotyo, vapanda nokuhumba ovatumini. Nomikanda viavo novilinga viavo viokuivisa, valunda ovomunthele yavo okutavela ovitumino. Mahi, tyina ovatumini vevetuma okulinga etyi tyehelikuatele novitumino via Huku, “vetavela ku Huku, tyipona kovanthu.”—Atos 5:29; Romanos 13:1-7.

Onombangi mba Jeova vatalelapo ovanthu potyilongo tyavo okuvelongesa Ombimbiliya otyali. Mokonda yokulongesa ngotyo, ovanthu ovanyingi vekahi nokupilulula omitima viavo. Kese nima, ovanthu vekahi nokukuatesuako okuyekapo ovituwa ovivi, okupuena, nounkholwa, nokuyekapo okunwa ovihemba vikoleswa, nomawela omavi, nomaundalelapo. Ovo vakala ovanthu vayumbwa onthumbi mokonda velilongesa okuundapesa ovitumino Viombimbiliya momuenyo wavo.

Tupu, okulongesa Ombimbiliya tyikuatesako onombunga okukala unene nonthilo navakuavo, nokukuatesako ovalinepi, novohe, novana okutomphola nawa. Otyo tyipameka oupanga wombunga. Iya tyina onombunga mbapama, otyilongo tyipama.

Konyima yokuatala ononthele ombu tuapopia momukanda ou, oityi ove usoka? Okuti okuhonyeka ongeleya nopulutika Ombimbiliya ityitavela? Au, kaityitavela. Mahi okuti Ovakristau votyotyili vesukisa okukala ovanthu vayumbwa onthumbi? Enga. Oñgeni vetyilinga? Mokulandula otyitumino tya Jesus tyokukala ngomongwa notyimimi tyouye.

Vana valinga ononkhono mbokulandula ehongolelo lia Kristu velietela ouwa ovo muene no nombunga mbavo no potyilongo vakala. Onombangi mba Jeova potyilongo tyove mavakala nehambu liokutomphola noove konthele yovilinga viavo viokulongesa Ombimbiliya, vekahi nokulinga potyilongo tyenyi.a

[Onondaka Poutoi]

[Ehangununo liolutalatu pefo 7]

Jesus kapilululile omaongano opulitika, mahi wapilulula omitima viovanthu

[Ehangununo liolutalatu pefo 8]

Onombangi mba Jeova vesukisa okukala ovanthu vayumbwa onthumbi