Okuti Upondola Okuyumba Onthumbi Mongeleya Konthele Yovituwa?

Sylvia uundapa mondyuo yokutekula vokualupa wati: “Etyi nekelilongesa kosikola onene, naile novanthu ovanyingi ankho veliti Ovakristau. Mahi, ankho vakemba mo noprova, nokutyinda omapangwe, novihemba vikoleswa. Ongeleya ankho kailingi natyike momuenyo wavo.”

Omulume umwe utiwa Lionel wati: “Ava ndyiundapa navo vakemba iya vati vavela, mahi tyilityili kavavelele. Vapopia okuti vena ongeleya mahi kavaendeko, ongatyina una vala otyipuka tyimwe meumbo mahi ohetyiundapesa.”

Ovanthu ovanyingi kavayeke ongeleya ihongolele omuenyo wavo. Ovanyingi hono “velilekesa ngatyina vena onthilo na Huku, mahi kavayeke ondaka ya Huku ihongolele omuenyo wavo.” (2 Timóteo 3:5) Ononkhalamutwe mbonongeleya mbavo kavaave ongeleka ongwa, tupu kaveveavela onondonga Mbovihonekwa vesukisa opo vakale novituwa oviwa. Otyo ovanyingi vetavelela okuti Huku kesuku nonkhalelo vatyinda omuenyo wavo.

OITYI OMBIMBILIYA ILONGESA?

Ombimbiliya ipopia okuti Huku una omutima iya ovituwa vietu vipondola okumuhambukiswa ine okumunumanesa unene. Etyi ova Isilayeli vatyitukilapo Huku, “avemuihamesa komutima.” (Salmo 78:40) Mahi, kukala ‘ehambu enene keulu’ tyina omunthu umwe ayekapo okulinga ovivi. (Lucas 15:7) Tyina omunthu umwe apanda ovituwa oviwa via Tate yetu keulu, ohole yae na Huku mailiyawisa, aimuavela ondundo yokukala nohole netyi Huku ehole, nokuyala etyi Huku eyele.—Amós 5:15.

ONOMBANGI MBA JEOVA VALINGA ÑGENI?

O Jornale imwe yapopia konthele Yonombangi mba Jeova okuti, “vakuatesako ovanthu okukala noupanga omuwa mombunga, vaundapa nombili pala okukuatesako vakuavo, iya ovatyitua tyilongo ovakuatyili.” Tupu yati: “Valandula onondonga mbavilapo konthele yovituwa. Vetavela okuti okupuena omakaya nepangwe, nokunwa unene, nomawela omavi, nomaundalelapo, novalume okulala poyavo, ovituwa vipondola okunyona oupanga wavo na Huku.”

Oñgeni okulilongesa konthele yovituwa via Huku tyikuatesako Onombangi? Sylvia wapopiwa konthyimbi, wati: “Mondyuo yokutekula vokuakulupa, ovanthu vavaka unene. Naame ñgeno nahongiliyua okuvaka. Mahi okunoñgonoka oñgeni Jeovaa elitehela konthele yotyo, tyankhuatesako okulinga etyi tyaviuka. Nahambukwa iya ndyina ombembwa momutima.” Sylvia una onthumbi yokuti okutyinda omuenyo welikuata netyi alongeswa mongeleya tyakalesa nawa omuenyo wae.