Okuti Kuna Ongeleya Yatokala Okuyumbwa Onthumbi?

Inkha ongeleya imwe yalingile tyimwe wahahandele tyipondola okukupuiya okuyumba onthumbi monongeleya. Mahi kala nonthumbi yokuti tyilityili kuna ongeleya imwe upondola okuyumba onthumbi. Etyi Jesus ankho ekahi pano pohi, waholovonene otyikundyi tyimwe tyovalanduli vekolelo, evelongesa opo vaendele movitumino via Huku. Alo hono nkhele kuna ovalanduli votyotyili va Kristu, ovanthu vaendela movitumino via Kristu. Opi upondola okuvevasa?

Estelle, wapopiwa monthele yotete, wati: “Nahimbika okunoñgonoka Ombimbiliya etyi nahimbika okulilongesa no Nombangi mba Jeova. Nakalapo vala katutu andyinoñgonoka João 8:32 yokuati: ‘Mamunoñgonoka otyili, iya otyili atyimuyovola.’”

Ray, nae wapopiwa monthele yotete, wati: “Etyi nahimbika okulilongesa Ombimbiliya no Nombangi mba Jeova, nanoñgonoka okuti Huku haeko weetela ovanthu ononkhumbi. Andyipandula okunoñgonoka okuti namphila Huku ena ehunga ewa liokuyekelako ovivi hono, mahi walaa okuti apa katutu mevimaneko.”

Tyotyili, tyipuiya unene okulinga etyi tyaviuka putyina ovanthu ovanyingi vena ovituwa ovivi. Mahi tyitavela okulinga etyi tyaviuka. Ovanthu ovanyingi vahanda okukuatesuako okunoñgonoka Ombimbiliya nokulinga etyi ilongesa. Otyo Onombangi mba Jeova mouye auho valongesila otyali Ombimbiliya ovanthu ovanyingi momaumbo avo. Onosimano ambuho, ovanthu ovanyingi vekahi nokulilongesa etyi Ombimbiliya tyilityili ilongesa. Moluotyo, vekahi nokukala omapanga Omutungi wavo, nokuvasa ehambu enene momuenyo.a

Inkha ulivasa no Nombangi mba Jeova, oityi wehevepulila omokonda yatyi vayumbila onthumbi mongeleya yavo? Ovola okunoñgonoka nawa etyi valongesa, novilinga viavo. Konyima otokola ove muene inkha tyilityili kuna ongeleya imwe upondola okuyumba onthumbi.