Valume​—Pamekei Omaumbo Enyi

OÑGENI omulume ena okutekula omukai wae? Ovanthu ovanyingi vapopia okuti etyi omulume ahanda, okukuatesako ombunga yae opo ikale nolumono olunyingi. Mahi, ovakai vamwe, namphila ovahona, mahi nkhele vena otyiho. Mongeleka, omukai umwe utiwa o Rosa ukala ko Espanha, wapopia konthele yomulume wae, okuti: “Kondye yeumbo omulume wange ankho ulilekesa ngoti omunthu omuwa, mahi meumbo ankho omukalavi.” Joy ukala ko Nigeria wati: “Tyina ankho tuehelivilile nomulume wange, ankho umphopila okuti: ‘Ove una okulinga atyiho ndyikupopila mokonda ndyimulume wove.’”

Oñgeni omulume ena okufuisapo otyilinga tyae noluembia? Oityi omulume ena okulinga opo eumbo liae lipame, alikala “omphangu yokupululukilwa”?​—Rute 1:9, okatoi.

OITYI OMBIMBILIYA IPOPIA KONTHELE YOUTUMINI WOMULUME

Namphila komaiho a Huku omulume nomukai aveho vakolela, mahi Ombimbiliya ipopia okuti omulume una otyilinga tyae mombunga. Tupu omukai una otyilinga tyae. Romanos 7:2 ipopia okuti omukai ‘utuminwa nomulume wae.’ Omaongano omanyingi apopia okuti omulume kapondola okutumina omukai wae. Mahi Huku waavela omulume otyilinga tyokuhongolela omukai wae. (1 Coríntios 11:3) Omulume wanepa, una okuhongolela otyikumba tyae.

Ankho wanepa, oñgeni mofuisipo otyilinga wapeua na Huku? Ombimbiliya yati: “Tualeiko okukala nohole novakai venyi, ngetyi Kristu ehole ewaneno.” (Efésios 5:25) Namphila Jesus Kristu ankho ahanepele, mahi ongeleka yae ipondola okukukuatesako okutekula nawa omukai wove. Tala oñgeni ongeleka yae ipondola okukukuatesako.

JESUS ONGELEKA​—IMWE ONGWA PALA OVALUME

Jesus ankho uhanda okupameka nokukuatesako vakuavo. Jesus walaele ovanthu aveho ankho valemenwa novitateka viavo muene okuti: “Endyuei kuame, . . . iya ame mandyimupameka.” (Mateus 11:28, 29) Jesus ankho apeho ukuatesako ovanthu vena ovitateka, iya ankho uveavela ondundo na vakale noupanga omuwa na Jeova. Tyotyili, ovanthu ovanyingi vakalele omapanga a Jesus, avakala nonthumbi yokuti mevetepulula omulemo!

Oñgeni vokuanepa vapondola okuhetekela Jesus. Tala oñgeni mopepukisa omulemo womukai wove. Ovakai vamwe vanepwa vasoka nga Rosa, wapopia okuti: “Ankho ndyilinga vala ngoti ndyimupika womulume wange.” Mahi, omulume umwe utiwa o Kweku utekula nawa omukai wae, wati: “Ovikando ovinyingi ndyipula omukai wange oñgeni ndyipondola okumukuatesako movipuka vimwe. Mokonda omukai wange ndyimuhole, muene ndyilihinda okumukuatesako movilinga vio meumbo.”

Jesus ankho usuka na vakuavo iya ankho una okankhenda. Omukai umwe omuhepi, wakalele nouvela umwe omuvi mokueenda kuomanima 12. Etyi eiva okuti Jesus una epondolo liokulinga omahuviso, “elipopila okuti: ‘Inkha ndyiyama vala kotyikutu tyae, mandyiveluka.’” Etyi ankho asoka otyili. Afuene pu Jesus, ayame kotyikutu tyae, iya aveluka. Tyafuile vamwe vasokele okuti etyi omukai oo ankho alinga katyaviukile, mahi Jesus ankho utyeete okuti omukai una ankho wehulilua.a Jesus wemupopilile noluembia okuti: “Mona wange, . . . veluka kouvela wove omuvi.” Jesus kapopile natyike tyikundisa omukai oo, mahi waimbukile okuti omuvei. Ngotyo, Jesus walekesile etyi atuwa, walekesile okuti una okankhenda.​—Marcos 5:25-34.

Oñgeni ovalume vapondola okuhetekela Jesus. Tyina​—omukai wove eheliviite nawa, suka nae, okala noumphua-lundo. Ovola okutala ovipuka ngetyi evitala, nokunoñgonoka etyi ahanda. Mongeleka, Ricardo wati: “Tyina namatale okuti omukai wange wanumana, ndyilinga ononkhono opo ndyilityilike okupopia ovipuka vimunumanesa vali unene.”

Jesus ankho utomphola novalongwa vae. Jesus ankho utomphola unene nomapanga ae. Wapopile okuti: “Ovipuka aviho neiva ku Tate yange, nemupopila vio.” (João 15:15) Tyotyili, pamwe Jesus ankho uhanda okukala aike, na atutulule kovipuka vimwe, nokulinga omalikuambelo. Mahi, ovikando ovinyingi, Jesus ankho upopila ovalongwa vae etyi asoka. Jesus waipaelwe ngatyina omunthu walinga onkhali onene. Puetyi eheneipawe, motyinthiki tyatyo, wapopilile ovalongwa vae okuti ankho “weihamenua unene.” (Mateus 26:38) Namphila ankho pamwe ovalongwa vae valinga ovipuka vimunumanesa, mahi Jesus kayekelepo okutomphola navo.​—Mateus 26:40, 41.

Oñgeni ovalume vapondola okuhetekela Jesus. Popila omukai wove etyi usoka, noñgeni ulitehelela. Ovakai vamwe hamwe veliyava okuti ovalume vavo tyina veli povanthu vahipulula navo, mahi tyina veli meumbo kavahipulula navo. Mahi, tala oñgeni Ana akala tyina omulume wae emupopila etyi asoka, wati: “Ndyilitehela okuti omulume wange unthyole, iya ndyipanga liae.”

Wahasoke okuti opo omukai wove ehekulinge-linge vali otyipuka tyimwe, una okumunianga. Omukai umwe wati: “Tyina omulume wange anumanena, palamba ononthiki mbumwe otyo anianga. Tyina amalingi ngotyo, tyindyihama unene, andyilitehela okuti hisilivila.” Mahi, Edwin, wovola okuhetekela Jesus. Wati: “Tyina nanumana, nkhele hipopi, mahi ndyiovola omuvo ukahi nawa pala okuhipulula konthele yotyitateka, noñgeni tuna okutyitetulula.”

Joy, wapopiua konthyimbi, wamona okuti omulume wae wapiluluka tunde etyi ahimbika okulilongesa Ombimbiliya no Nombangi mba Jeova. Joy wati: “Pahe ukahi nawa, iya ukahi nokulinga ononkhono mbokukala noluembia nga Jesus.” Ovalinepi ovanyingi, vakuatesuako nondongeso Yombimbiliya. Okuti nove uhanda okukuatesuako Nombimbiliya? Upondola okuita ko Nombangi mba Jeova opo vekulongese Ombimbiliya otyali.