Ombimbiliya yakumbulula omapulo ange

OMUENYO WANGE KOHALE:

Natyitilwa ko Baku, mo Azerbaijão. Mokulikwai kuetu tuvevali, ame ndyinkhelo. Tate omu Musulumanu, me omu Judeu. Ovo tate ankho velihole. Iya tate ankho utavela ongeleya ya me, tupu me ankho utavela ya tate. Me ankho ukuateseko Tate tyina vamehiki mohanyi ova Musulumanu vati Ramadã (vakala tyahali mohanyi oyo), iya Tate ankho ukuatesako me tyina valia Opasikwa. Meumbo lietu ankho tuna omukanda utiwa Alcorão nomukuavo utiwa Torá, Nombimbiliya.

Ame ankho ndyimu Musulumanu. Namphila ankho ndyitavela okuti kuna Huku, mahi ankho pena ovipuka nahanoñgonokele nawa. Ankho ndyilipula okuti: ‘Omokonda yatyi Huku atungila ovanthu? Omokonda yatyi omunthu umonale ononkhumbi tyina ena omuenyo, nkhele tyina amankhi ai vali mo ifelunu amonena-mo ononkhumbi apeho?’ Mokonda ovanthu vapopia okuti o Huku weetako ovipuka aviho, pahe ankho ndyilipula okuti: ‘Okuti Huku weetela ovanthu ononkhumbi mokonda utyihole tyokuvetala no nonkhumbi?’

Etyi natuula omanima 12, andyihimbika okulinga omalikuambelo ova Musulumanu, alingwa mokueenda kuononthiki ononthano. Pomuvo opo, ame nomphange yange, Tate etupake mosikola yova Judeu. Povipuka ankho tulongeswa, vimwe oviso vio Torá, nelaka lio Hebreu. Tyina tuehenehimbike okulongeswa, tulinga omalikuambelo ova Judeu. Ngotyo, komuhuka-huka no kokangulohi ankho ndyilikuambela ngova Musulumanu, iya kosikola andyilihonyeka nova Judeu.

Ankho ndyisoka okuti nawike vali upondola okukumbulula omapulo ange. Ankho ndyipula nonthilo kovalongesi kosikola okuti: “Omokonda yatyi Huku atungila ovanthu? Oñgeni Huku atala tate omu Musulumanu? Okuti umutala ngatyina omunthu omuwa, iya opo omokonda yatyi ova Judeu vapopila okuti wasila? Omokonda yatyi Huku emutungila?” Omakumbululo ehehi ankho vampha etupu oku apilukila, nii kaakululukisa.

OÑGENI OMBIMBILIYA YAPILULULA OMUENYO WANGE:

Mo 2002, andyiyekepo okukala nekolelo mu Huku. Etyi tuailukila ko Alemanha, pakala vala osimanu, tate avele unene, ahapopi. Momanima omanyingi, ankho ndyilikuambela opo ombunga yange ikale nekongoko. Mokonda ankho ndyityii okuti Wepondolo Aliho oe vala una epondolo liokuetako omuenyo nokumanako ononkhia, ankho ndyiita opo ahupisevo tate. Mahi, ankho ndyisoka okuti ‘otyo ndyiita katyisilivila ku Huku iya kamafuisapo-ale ehando liomona omututu nga ame.’ Ame ankho ndyityii umwe okuti makumbulula etyi naita. Mahi, tate anyimi.

Pahe ankho ndyisoka okuti Huku kesukile no nonkhumbi mbetu, andyikala tyeihamenwa. Ankho ndyisoka okuti: ‘Ame ndyiya nokulikuambela omapita, ine Huku keko-ale?’ Andyiihamenwa unene, andyiyekepo okulinga omalikuambelo ova Musulumanu. Onongeleya ononkhuavo ankho himbutavela, ngotyo andyisoko okuti kouye kutupu Huku.

Etyi palamba onohanyi epandu, Onombangi mba Jeova aveya meumbo lietu. Opo, ankho nkhele nalumwe tuasokele nawa-nawa konthele Youkristau, ame nomphange yange, ankho tuhanda okuvelekesa okuti etyi valongesa hatyiliko. Atuvepulu okuti: “Omokonda yatyi Ovakristau vafendela Jesus, nekulusu, na Maliya novika-huku ovikuavo, ngwe tyailikwa Movitumino Ekwi?” Onombangi vetulekesa nawa Movihonekwa okuti okufenda ovilolo katyilingwa mefendelo Liovakristau votyotyili, iya vena vala okulikuambela ku Huku. Andyikala tyahuva unene.

Konyima atupulu okuti: “Iya Outatu Ukola? Ankho Huku o Jesus, oñgeni apondola okuya okukala pano pohi, aipawa novanthu?” Tupu avakumbulula Nombimbiliya, avahangununa nawa okuti Jesus ha Huku ko nii kavelifwe. Onombangi mba Jeova avapopi okuti mokonda yotyo, ngwe kavetavela Koutatu Ukola. Andyihuvu unene, andyisoko okuti: ‘Ovakristau ava velikalela.’

Mahi nkhele, ankho nahanda okunoñgonoka omokonda yatyi ovanthu vankhila. Omokonda yatyi Huku ayekelako ononkhumbi. Onombangi avandekesa omukanda Conhecimento Que Conduz à Vida Eterna,a ankho una ovikapitulu vikumbulula omapulo ange. Liwa-liwa avahimbika okundongesa Ombimbiliya.

Kese onthele ankho tulilongesa, ankho ikumbulula omapulo ange Nombimbiliya. Andyinoñgonoka okuti, enyina lia Huku o Jeova. (Salmo 83:18) Otyituwa tyae tyakolela vali unene, oluembia. (1 João 4:8) Watunga ovanthu opo navo vakale nomuenyo ngae. Tupu andyinoñgonoka okuti namphila Huku ayekelako ovivi, mahi uviyele, iya apa katutu mekevimanako, avihakomonaikako vali. Pahe nanoñgonoka okuti ,oumphuki wo Andau na Eva, oo ukahi nokuetela ovanthu ononkhumbi. (Romanos 5:12) Tyimwe povipuka vinumanesa viatuka koumphuki oo, okunkhisa vana tuhole, ngetyi o tate yange. Mahi, Huku makamanako ovivi ovio aviho mouye omupe, iya vokuankhia mavakatutiliswa.—Atos 24:15.

Ombimbiliya yakumbulula omapulo ange. Andyihimbika vali okutavela okuti kuna Huku. Etyi natualako okunoñgonoka nawa Onombangi mba Jeova, andyimono okuti, ovanthu vamwe velihole ouye auho. Onkhalelo velikuatapo kumwe iya velihole, yanthyuvisile unene. (João 13:34, 35) Etyi nanoñgonoka konthele ya Jeova tyampha ondundo yokumulingila, ngotyo andyitokola okukala Ombangi ya Jeova. Nambatisalwa monthiki 8 ya Kupupu yo 2005.

OUWA PATYI NAPOLAKO: Otyili Tyombimbiliya tyapilulula onkhalelo ankho ndyitala omuenyo, pahe ndyiutala nawa. Onkhalelo Ondaka ya Huku ihangununa ovipuka, yandyetela ombembwa komutima. Navasa ehambu nekevelelo liapama, liokukamona vali tate tyina amatutuliswa ngetyi Ondaka ya Huku yalaa.—João 5:28, 29.

Apa tuelinepa na Jonathan papita omanima epandu, iya ndyina ehambu mokonda nanepwa nomunthu una onthilo na Huku. Atuho vevali tuanoñgonoka okuti otyili konthele ya Huku tyapepuka okutyinoñgonoka, iya tupu otyipuka tyimwe tyakolela unene. Otyo onthue tukalela nehambu liokuivisa, nokupopila vakuetu ekevelelo ewa tunalio. Hono pahe ndyityii okuti Onombangi mba Jeova “kavelikalelele” vala, mahi Ovakristau votyotyili.