Okufuena ku Huku Tyinkhuatesako Unene

ETYI natuukisa omanima etyive, anehekulu vali. Pahe ndyina omanima 43, mahi ndyina vala ometulu ike. Etyi ovo tate vaimbuka okuti himakala omulale, avamphe ondundo ndyiundape unene opo nahasoke apa ndyilifwe. Opo nahakale tyahaundapa, andyipake omesa komutwe wondyo yetu opo ndyilandese ovinyango. Ovanthu valamba otyo valanda.

Mahi okuundapa unene katyapilululile natyike. Nkhele ankho ndyimusupi vala, ovipuka vakuetu valinga ame ankho vimphuilisa, ngokupola ovipuka viatulikwa movenda. Ovipuka aviho ngoti ankho vialingilwa vala ovanthu ovalale. Ame ankho ndyilietesila kokankhenda, mahi ovipuka avipiluluka etyi ndyina omanima 14.

Onthiki imwe, ovakai vevali Onombangi mba Jeova avalande ovinyango pomutala wange tupu avandongesa Ombimbiliya. Andyiimbuka okuti nahimbika okunoñgonoka Jeova nehando liae, otyipuka tyakolela vali tyipona apa ndyilifwe. Otyo atyinkhuatesako unene. O Salmo 73:28 aikala otestu ndyihole vali. Onthele yotete yoversikulu oyo yati: “Okufuena ku Huku otyiwa kuame.”

Ombunga yetu ailuka ko Côte d’Ivoire atuende no ko Burkina Faso iya omuenyo wange aupiluluka unene. Oku ankho ndyikala ovanthu vetyiliya okunthalela pomutala ndyilandesila ovinyango. Mahi oku tuailukila, ovanthu ankho tyina vanthala vahuva. Mokonda ovanthu ankho vanthala unene, andyikala mondyuo onosimanu ononyingi. Mahi ankho ndyihinangela ouwa wokufuena ku Jeova. Andyihonekela ko Filiyale Yonombangi mba Jeova, avanthumu omunthu ukahi nawa. Omisionaliu utiwa Nani, eya okunthalelapo nomota.

Omatapalo opotyilongo tyetu, ankho akala nonthata, tyina ombila yamaloko. Ovikando ovinyingi ankho Nani utoka nomota tyina eya okundongesa Ombimbiliya, mahi nongotyo atualako okuya. Onthiki imwe, eliave opo eye okumphola tuende keliongiyo. Otyo ankho tyihangununa okutunda meumbo opo ndyikatalwe novanthu. Tupu, mokonda matuvelama vevali komota kamatyipepuka okuitaha. Nongotyo, andyitavela, andyihinangela onthele yavali yotestu ndyihole unene yati: “Ohamba Tatekulu Jeova Otyiholamo tyange.”

Ovikando ovinyingi, ame na Nani ankho tutokela monthata, mahi mokonda ankho tuhole omaliongiyo, atuhasoyo. Ovanthu ankho ndyivasa Mondyuo Yomaliongiyo vena ehambu iya velikalela unene novanthu ndyivasa kondye vanthala unene! Etyi palamba onohanyi etyive, andyimbatisalwa.

Onthele yatatu yotestu ndyihole yati: “Opo ndyiivise ovilinga viae aviho.” Ame ankho ndyityii okuti movilinga viokuivisa mandyikala novitateka ovinyingi. Nongotyo, ame ndyihinangela otyikando tyotete napita movilinga viokuivisa umbo na umbo. Tyilinge ovana novakulu ankho vanthala unene, vandandula, nokukuela onkhalelo yange yokuenda. Otyo ankho tyinumanesa, mahi etyi nahinangela okuti ovanthu ovo vesukisa Omphangu Yombembwa, atyimphe ondundo yokuundapa vali unene nokukoleleya.

Opo ovipuka vimphepukile, andyikala nomusikaleta utahua nomankhanya. Omunthu ankho ndyiundapa nae movilinga viokuivisa ukunyuna omusikaleta tyina tukahi motyilondeka, tyina tuhika potyilauka nae avelama putyina omusikaleta ukulunguta. Namphila potete ovilinga viokuivisa ankho viepuiya, konyima avindyetela ehambu, alo umwe nakala omukokoli-ndyila mo 1998.

Ame ankho ndyilongesa ovanthu ovanyingi Ombimbiliya, vekuana avambatisalwa. Tupu, umwe ponondenge mbange wetavela otyili. Onthiki imwe namphila ankho ndyina o malaria, andyitambula omukanda watunda ko Côte d’Ivoire. Ame ankho nalongesile Ombimbiliya omunthu umwe ankho ulongeswa kosikola onene ko Burkina Faso iya andyimuave komukuatate opo atualeko nokumulongesa. Omulongwa oo akondoka ko Côte d’Ivoire. Andyihambukwa etyi neiva okuti pahe omuivisi!

Oityi ndyilinga opo ndyilitekule? Eongano limwe alindongesa okunyika ovikutu. Umwe povalongesi wamona ombili yange movilinga iya ati: “Onthue tupondola okukulongesa okulinga ondyapau.” Ngotyo umwe valinga. Ame pahe ndyilinga ondyapau yokukoha ovikutu novipuka ovikuavo viomeumbo. Ovanthu ankho vehole ondyapau yange, ankho vetyipopila vakuavo. Ovanthu vokulanda ankho ndyivetuaila ondyapau yavo nomota yange yomalola etatu.

Mo 2004, andyiyekepo ovilinga viokokoli-ndyila mokonda yomuongo wange wiihama. Mahi nkhele ndyenda apeho movilinga viokuivisa.

Ovanthu ankho vandyimbukila kehambu liange. Ankho ndyina omahunga omanyingi okukala nehambu mokonda okufuena ku Huku otyiwa kuame.—Tyapopiwa na Sarah Maiga.