Okuti Huku Wesuka no Ove?

OITYI TULILONGESILA KOVIPUKA HUKU ATUNGA?

Ono minutu 60 mbotete mbokalukembe tyina amakutulwa ulinga omapiluluko omanene. Mokonda yatyi? Omokonda ina una okukalela popepi okalukembe kae. Okulinga ngotyo tyikuatesako okalukembe akulu nawa.a

Oityi tyikuatesako ina okutekula nawa okalukembe kae? Omulongesi utiwa Jeannette Crenshaw wetyipopia momukanda umwe okuti: ono selula mbumwe mbutiwa oxitocina “mbukuatesako ina okukala nohole tyina amakutula, iya okalukembe ketyiiva tyina kamakuatwa na ina, na tyina katalwa na ina, na tyina kanyamiswa.” Iya pomuvo opo, pena vali o selula onkhuavo “ikuatesako ina okunoñgonoka okalukembe kae,” iya otyo tyikuatesako okalukembe na ina okulityiliya. Omokonda yatyi otyo tyesukisila?

Onkhalelo okalukembe na ina velityiliya, tyahindwa Nomutungi wetu woluembia Jeova Huku.b Ohamba David waimbuka okuti Huku oe wemupola “meimo” iya elitehelela okuti wapama pomankhanya a me yae. Oe welikuambela okuti: “Ove ukahi nokunthekula tunde etyi natyitwa. Tunde etyi ankho ndyili meimo lya me yange, ove Huku yange.”—Salmo 22:9, 10.

NKHELE SOKA: Inkha Huku watunga ovanthu monkhalelo oyo ihuvisa, ina utekula nawa okalukembe kae, ekeavela etyi tyesukisa, okuti otyo katyilekesa okuti Huku wesuka no onthue atuho mokonda “tuvana va Huku?”—Atos 17:29.

OITYI OMBIMBILIYA ITUPOPILA KONTHELE YA HUKU

Jesus Kristu wii nawa Huku tyipona omunthu omukuavo vali walongesa okuti: “Owiila uvali kaulandwa onopalata onombali mbahasilivila? Mahi, na keke makatokela pohi otyo Tate yenyi ehetyii. Mahi, onohuki mbo komutwe wenyi ambuho mbavalulwa. Moluotyo, muhakalei nowoma, onwe muakolela vali tyipona oviila ovinyingi.”—Mateus 10:29-31.

Ha atuho tusuka nowiila oututu tuhole okumona, alo umwe na tyina ‘kamwe kamakatokela pohi.’ Mahi, Tate yetu keulu utala kese kaila! Alo umwe oviila ovinyingi vitupu vali esilivilo tyipona omunthu wike vala. Otyo tyitulongesa okuti: Katupondola ‘okutesa onkhango,’ Huku wesuka no ove. Tyotyili, wesuka unene no ove!

Ombimbiliya itupopila okuti

• “Omaiho a Jeova atala ponomphangu ambuho, okulava onondingavivi, novaviuki.”—PROVÉRBIOS 15:3.

• “Omaiho a Jeova atala ovaviuki. Iya omakutwi ae atehelela tyina vaita ombatelo.”—SALMO 34:15.

• “Mandyihambukwa nokukuililila nehambu noluembia luove olunene. Mokonda wamona ononkhumbi mbange. Wanoñgonoka emone ndyikahi nokulambela.”—SALMO 31:7.

“ANKHO NDYILITEHELELA OKUTI JEOVA KENTHYOLE”

Okuti tyesukisa umwe okunoñgonoka inkha Huku utuluete ine na ankho wesuka no onthue? Enga. Otyo tyapopia Hannah,c ukala ko Inglaterra. Hannah wati:

“Pana ankho ndyilitehelela okuti Jeova kenthyole, tupu ankho ndyilitehela okuti omalikuambelo ange kaekahi nokukumbululwa. Andyisoko okuti tyafwa omokonda hayumbile onthumbi Huku. Ankho ndyilitehela okuti ngwe wanianga mokonda hisilivila. Andyiletehela okuti Huku kesukile na ame.”

Mahi pahe, Hannah utupu vali onkhango ine Jeova umuhole. Oityi tyemukuatesako okupilulula omalusoke ae? Hannah wati, “katutu-katutu andyipiluluka. Ndyihinangela elongomona limwe neivile omanima amwe konyima, liapopia konthele yotyilikutila tyofeto yeyovo Jesus alinga. Atyinthiki unene komutima, atyinkhalesa nonthumbi yokuti Jeova unthyole. Iya omalikuambelo ankho ndyilinga pahe akumbululwa, pamwe ndyihole okulila unene tyina ndyiimbuka okuti muainyo Huku unthyole unene. Tupu, okulilongesa Ombimbiliya nokuenda komaliongiyo, ndyililongesa vali konthele ya Jeova no ñgeni atuwa, no ñgeni alekesa okuti wesuka no onthue. Tyotyili, pahe ndyityii nawa okuti Jeova utuhole atuho iya wesuka no onthue atuho.”

Etyi Hannah apopia tyitupameka unene. Mahi, opo oñgeni upondola okukala nonthumbi yokuti Huku utwii iya wii onkhalelo tulitehelela? Onthele mailandulako maikumbulula nawa epulo olio.