Siovaa Uhambukwa Tyina uti “Amem”
SIOVAA upanda efendelo lietu iya “utehelela nawa” kese tyipuka tupopia opo tumuhilivike, alo umwe oupuka oututu. (Mal. 3:16) Mongeleka, soka kondaka imwe tuapopia-le ovikando ovinyingi. Ondaka “amem.” Okuti Siovaa uhambukwa tyina tupopia ondaka oyo? Enga! Opo tunoñgonoke omokonda yatyi, matulilongesa oityi ondaka oyo ihangununa, no ñgeni yuundapeswa mo Mbimbiliya.
“OVANTHU AVEHO MAVAKAKUMBULULA OKUTI ‘AMEM!’”
Ondaka “amem” ihangununa okuti “otyo umwe.” Ondaka oyo yatunda mo Hebeleu ihangununa okuti “okukala omukuatyili” ine “omunthu uyumbwa onthumbi.” Pamwe ankho ipopiwa pokutetulula ovitateka. Tyina omunthu amaane, konyima ankho upopia okuti “amem” opo alekese okuti etyi apopia otyili umwe. Tupu ankho una okutavela ovitateka vitundilila ku etyi aana. (Núm. 5:22) Tyina omunthu ankho amaanena mounyingi, ankho tyimuavela ondundo yokulinga etyi apopia. — Nee. 5:13.
Mu Deuteronômio 27 tuvasamo onkhalelo imwe ankho kohale vaundapesa ondaka “amem.” Etyi ova Isilayeli vanyingila Motyilongo Valaelwe ankho vena okuliongiyila pokati konomphunda onombali, omphunda Ebal nomphunda Gerizim, opo vatehelele Ovitumino vya Huku. Tyihekutehelela vala Ovitumino, tupu ankho vena okuvitavela. Iya etyi vapopilwa ovitateka vitundilila kokuhetavela Ovitumino, aveho avakumbulula okuti “amem.” Ondaka oyo vapopia yalekesile nawa okuti vetavelele Ovitumino vya Huku. (Deu. 27:15-26) Pahe soka vala oñgeni tyehiwilue okutala ovalume, novakai, novana vakumbululila kumwe. (Jos. 8:30-35) Tuna onthumbi yokuti vatuaileko okuhinangela onondaka vapopile monthiki oyo. Ova Isilayeli vatuaileko okulinga ngetyi valaele. Ombimbiliya yati: “Ova Isilayeli vatuaileko okuumbila Siovaa pomuvo wa Josue, no pomuwo wovakulu vatualako nomuenyo konyima yononkhia mba Josue. Ovakulu ovo ankho vei nawa ovipuka aviho Jeova alingilile ova Isilayeli.” — Jos. 24:31.
Tupu Sesusi wapopile ondaka “amem” opo alekese okuti etyi apopia ankho otyili. Ankho kapopi ondaka “amem” (Molunyaneka yapitiyua okuti “tyili-tyili”) opo akumbulule, mahi ankho wiipopia tyina ahimbika okulongesa otyipuka tyimwe tyakolela. Pamwe ankho wiipopia ovikando vivali. (Mat. 5:18; Suau 1:51) Mokulinga ngotyo, Sesusi ankho ukalesa ovanthu nonthumbi yokuti etyi apopia otyili umwe. Ankho upondola okupopia nonthumbi mokonda Huku wemuavela epondolo opo afuisepo omilao viae. — 2 Kol. 1:20; Ehol. 3:14.
“OVANTHU AVAKUMBULULA OKUTI ‘AMEM!’ IYA AVAHILIVIKA SIOVAA”
Tupu ova Isilayeli ankho vapopia ondaka “amem” tyina vahilivika, nokulikuambela ku Siovaa. (Nee. 8:6; Sal. 41:13) Tyina ankho vakumbulula okuti “amem” konyima yelikuambelo, ankho valekesa okuti etyi tyapopiwa melikuambelo vetyitavela. Okulinga ngotyo, ankho tyiavela aveho omphitilo yokuhilivika Siovaa. Otyo tyamonekele etyi Ohamba Daviti atyinda Otyikasa Tyomphango ko Selusalei. Mokueenda kotyipito, Daviti apopi onkhalelo ankho elitehelela melikuambelo. Onondaka apopia melikuambelo olio, mbuvasiwa mu 1 Crônicas 16:8-36. Mokonda elikuambelo liehikile komitima viovanthu, aveho “avakumbulula okuti ‘Amem!’ iya avahilivika Siovaa.” Okukumbulula kokulike tyayawisile kehambu liavo.
Ovakilisitau vo potyita tyo tete navo ankho vati “amem” tyina vahilivika Siovaa. Ovahoneki vo Mbimbiliya vapopile ondaka oyo momikanda vahonekelele ovakuatate vavo. (Loma 1:25; 16:27; 1 Pet. 4:11) Omukanda Eholololo upopia okuti alo umwe onoandyu mbuhilivika Siovaa mokupopia okuti: “Amem! Hilivikei Siovaa.” (Ehol. 19:1, 4) Ovakilisitau vo potyita tyo tete ankho vena otyituwa tyokukumbulula okuti “amem” tyina ankho valinga omalikuambelo momaliongiyo. (1 Kol. 14:16) Mahi otyo katyilekesa okuti ankho vena okukumbulula vala ngatyina otyiso.
OMOKONDA YATYI TYAKOLELA OKUTI “AMEM”?
Pahe tuelilongesa oñgeni ovaumbili va Siovaa kohale ankho vaundapesa ondaka “amem.” Iya otyo tyetukuatesako okunoñgonoka okuti okukumbulula okuti “amem” tyakolela unene pokumanuhula elikuambelo. Tyina tupopia ondaka oyo pokumanuhula elikuambelo lietu, tulekesa okuti tuapopia etyi tyikahi momutima wetu. Tupu tyina tukumbulula okuti “amem” (alo umwe momutima) melikuambelo liounyingi, tulekesa okuti tuetavela etyi tyapopiwa. Matulilongesa vali omokonda yatyi tyakolela okuti “amem.”
Onthue tutehelela nawa tyina tufenda Siovaa. Tyina tulikuambela, ngotyo tukahi nokuumbila Siovaa. Mahi etyi tupopia hatyoko vala tyihambukiswa Siovaa, mokonda ovipuka tulinga mokueenda kuelikuambelo navio viakolela unene kwe. Ehando tuna liokukumbulula nomutima auho okuti “amem,” malitukuatesako okutehelela nawa.
Ondaka “amem” ituwaneka. Tyina omukuatate umwe elikuambela mounyingi, aveho mewaneno vemutehelela nawa. (Ovil. 1:14; 12:5) Ngotyo, tyina tukumbulula kumwe okuti “amem,” tulikuata vali okapandi novakuatate vetu. Tyilinge tukumbululila peulu ine o momutima, okupopia okuti “amem” tyilunda Siovaa okulinga ngetyi tyaitwa melikuambelo.
Tyina tuti “amem” tuhambukiswa Siovaa
Tuhilivika Siovaa: Siovaa utala alo umwe oupuka oututu tumulingila. (Luka 21:2, 3) Utala etyi tyikahi momutima wetu. Alo umwe inkha tutehelela eliongiyo motelefone, tupondola okukala nonthumbi yokuti Siovaa utyimona tyina tuti “amem.” Tyina tukumbulula ngotyo, tuhilivika Siovaa kumwe novakuatate veli Mondyuo Yomaliongiyo.
Okuti “amem” ngoti otyipuka otyitutu vala, mahi tyakolela unene. Omukanda umwe wapopia okuti tyina ovaumbili va Siovaa vapopia ondaka oyo, valekesa okuti “vena onthumbi, vetavela elikuambelo iya tupu valekesa okuti vena ekevelelo.” Tupondola okukala nonthumbi yokuti Siovaa uhambukwa tyina tuti “amem.” — Sal. 19:14.