Oñgeni Matulongesa Ovaivisi Ovape Okuivisa
1. Oñgeni welitehela otyikando yotete wahimbika ovilinga viokuivisa?
1 Uhinangela onthiki yotete wahimbika ovilinga viokuivisa umbo na umbo? Hamwe, ove wavelele unene owoma. Inkha ankho ukahi nokuundapa nomulongesi wove Wombimbiliya, ine omuivisi omukuavo, tyotyili ankho wahambukua moluetyi watunda nae. Mokonda pahe wakala omunongo movilinga ovio, wafuapo pala okukuatesako ovape okuivisa.
2. Oityi ovaivisi ovape vesukisa okulilongesa?
2 Ovalongwa ovape vesukisa okulilongesa oñgeni tyihimbikwa etompho nomunthu, okuundapesa Ombimbiliya tyina ekahi nokupopia nomunthu, okukatalelapo ovanthu, nokuhimbika okulongesa ovanthu Ombimbiliya. Tupu, ovo vena okulilongesa oñgeni mavaivisa mononkhalelo mbelikalela, ngetyi okuava oumbangi monondyila, no ponomphangu mbovitanda. Ove upondola okuvekuatesako opo vaundape vali nawa kononthele ombo mokuava ongeleka, nonondonga.
3. Oñgeni tupondola okuvatela vakuetu nongeleka yetu?
3 Longesa Nongeleka: Jesus walekesile ovalongwa vae oñgeni vena okuivisa. (Luc. 8:1; 1 Ped. 2:21) Tyina ukaundapa nomuivisi omupe, pongiya onondaka mbapepuka opo omuivisi ekuhetekele, tupu upondola okuundapesa onondaka mbokuhimbika etompho mbuvahiwa momikanda vietu. Momaumbo evali mulamba popia ove tete opo omuivisi ekutehelele etyi ukahi nokupopia. Ove upondola okupula omuivisi etyi atala konthele yetyi wapopia. Otyo matyimukuatesako okutala esilivilo liokuundapa navakuavo movilinga viokuivisa nokutavela liwa onondonga apewa tyina nae amapopi meumbo ekuavo.
4. Oñgeni matukuatesako omuivisi omupe tyina tuamamane okumutehelela?
4 Okuava Onondonga: Tupu, Jesus waavelele ovalongwa vae onondonga konthele yoñgeni mavaivisa. (Mat. 10:5-14) Ove upondola okuvatela omuivisi omupe monkhalelo oyo. Tyina ekahi nokupopia, tehelela nawa. Iya tyina muatunda meumbo olio, kala omukuatyili pokumupandula, namphila ove wamona okuti kononthele mbumue wesukisa okulinga vali nawa. Mahi, uhemuavele liwa onondonga, kevelela utale inkha mapitulula otyiponyo otyo meumbo ekuavo. Hamwe oe ankho wavela vala owoma. Tupu, tuhinangela okuti ovaivisi aveho vetupu ounongo wike, pena ononkhalelo ononyingi mbokulinga ovipuka.—1 Cor. 12:4-7.
5. Oityi tupondola okupopia tyina tukahi nokuava ombatelo?
5 Ovikando vimue omuivisi omupe mekuiti ombatelo. Mahi, inkha kaitile, upondola okumukuatesako. Oñgeni upondola okutyilinga monkhalelo yaviuka? Ovaivisi vamue ovanongo vapondola vala okupula okuti: “Ndyipondola okukuavela onondonga mbumwe?” ine, “Oñgeni ovilinga viove vikahi nokuenda?” Tupu upondola okupopia okuti, “Etyi ankho ndyimuivisi omupe, otyipuka ankho tyemphuia unene . . . , mahi otyipuka tyankhuatesako. . . . ” Ovikando vimue otyiwa okutala amuho momukanda Raciocínio. Opo uhemusoyese popia vala onthele ike yoñgeni apondola okupopia novanthu tyina ekahi nokuivisa.
6. Konthele yovilinga viokuivisa oñgeni ‘otyivela tyilipikua notyivela otyikuavo’?
6 Otyivela Tyilipikwa Notyivela Otyikuavo: Timoteo, omuivisi omunongo, waavelelue ondundo na Paulu opo atualeko nokulongesa nokukula mopaspilitu. (1 Tim. 4:13, 15) Namphila palambale omanima omanyi tunde onthiki yotete watunda movilinga viokuivisa, ove watualako okuyawisa ounongo wove. Welilongesila kovaivisi vakuenyi watunda navo, alo vana ankho vena ounongo uhehi movilinga ovio, pahe wafuapo opo uvatele vakuenyi nohole, haunene ovape opo vakale ovaivisi ovanongo.—Pro. 27:17.