Pokulikwambela Popia Atyiho

1-2. (a) Oityi tyipondola okutulingisisa pokulikwambela atuhapopi atyiho? (b) Oityi tutila Siovaa utehelela nawa omalikwambelo etu?

OKUTI hamwe pokulikwambela uwana vala tyike, kupopi-ale etyi tyili kohi yomutima wove? Ulinga vala okandyaulula? Ine otyo uhole okulinga have vala. Mokonda yovilinga ovinyingi, tupondola pahe pokulikwambela atulingi vala okandyaulula. Tupu tyipondola okutupwiya okupopila Siovaa atyiho, ine tusoka okuti, katwatele-mo mokutomphola nae.

² Ombimbiliya ipopia okuti elikwambelo Siovaa ahanda haliokupopia onondaka ononene mbokulihiviswa, mahi uhanda elikwambelo liokutunda komutima womunthu ulipaka koututu, upopia etyi tyili momutima. Siovaa ‘utehelela etyi onondalawa vaita.’ (Ovii. 10:17) Tyina tulikwambela ku Siovaa, ututehelela umwe nawa, mokonda wesuka noonthwe. — Ovii. 139:​1-3.

3. Omapulo patyi matukumbulula monthele ei?

³ Tupondola atupulu okuti: Olkuti tupondola umwe okupopila atyiho Siovaa pokulikwambela? Oityi matulingi, tumupopile umwe atyiho tyili momutima? Okuti okutanga omalikwambelo eli m’Ombimbiliya tyitukwatesako tyina tuti pokulikwambela? Ine katutyivili okupopia atyiho pokulikwambela, oityi tusukisa okulinga? Omapulo oo matwekumbulula monthele ei.

WAHATILE OWOMA OKULIKWAMBELA KU SIOVAA

4. Oityi matyitukwatesako okulikwambela tyihalingi otyinkhe? (Oviimbo 119:145)

⁴ Siovaa epanga likahi nawa, utuhandela vala oviwa. Mokonda yotyipuka otyo, pokulikwambela kwe katutili owoma, tupopia umwe atyiho tyili komutima. Omuhoneki w’Oviimbo 119 wali epanga lya Siovaa. Mahi no ngootyo wakondyele novitateka, watendeleyilwe, wapopilwe omapita. (Ovii. 119:​23, 69, 78) Tupu pamwe ankho usoya mokonda yokupengesa. (Ovii. 119:5) Mahi no ngootyo pokulikwambela ankho utupu otyinkhe, upopila umwe Siovaa atyiho tyili komutima. — Tanga Oviimbo 119:145.

5. Oityi tutila tyina twamapengesa twahalingei otyinkhe tyokulikwambela? Otyo tutyeeleka natyi?

⁵ Na vana umwe valinga ononkhali, Siovaa uhanda velikwambele kwe. (Isa. 55:​6, 7) Ine tumona okuti twalinga otyipuka tyapenga, twahayekei omalusoke apenga etutyike okulikwambela ku Siovaa. Tusokei komunthu wavombela motyiteta tyimwe otyinene. Ukati ñgaa weete ovanthu, okuti mati nahaulule onkhwo matyindingi navi? Au! Noonthwe pamwe tuvomba, tulinga onkhali, mahi no ngootyo tupondola okulikwambela ku Siovaa, tyihena otyinkhe, atumupopila umwe atyiho tyili komutima. — Ovii. 119:​25, 176.

POPIA ETYI TYILI KOMUTIMA POKULIKWAMBELA

6-7. Ine tusoka kweetyi Siovaa ekahi matulikwambela ñgeni? Popia-po tyalingile umwe. (Tala okatoi.)

⁶ Tyina tulikwambela ku Siovaa atumupopila evi tuli nokusoka, neevi vitutokotesa omutwe, atumupopila evi vili kohi yomutima wetu, oupanga wetu nae upama vali. Pahe oityi matulingi, opo tyina tulikwambela tupopie umwe etyi tyili kohi yomutima?

⁷ Soka kweetyi Siovaa ekahi.a Tyina tusoka etyi Siovaa ekahi, ovituwa viae, opo matyitupepukila okumupopila umwe atyiho tyili momutima wetu. (Ovii. 145:​8, 9, 18) Tutalei etyi tyapopia umwe utiwa o Kristine ankho ulingwa onya na he. Wapopia wati: “Mokonda ankho ndyilingwa onya na tate, okuti Siovaa o tate, unthyole tyimphwiya unene okutyitavela. Tupu pamwe ankho ndyisoka okuti mokonda yokupengesa, hatelemo-ale mokulingwa olwembia na Siovaa.” Oityi tyemukwatesileko? Wapopia vali wati: “Etyi nasoka kolwembia olunene lwa Huku andyityimono okuti Siovaa naina unthyole. Ndyityii okuti kamandyeke-po, wankhwata menkhanya, ya ngandyipengesa ñgo mankhwatesako mokonda unthyole. Otyo pokulikwambela kwe ndyimupopilila umwe evi vianthokotesa omutwe neevi vianthyambukiswa.”

8-9. Oityi tusukisila okusoka evi matwiiti tyina twehenelikwambele? Popia-po tyalingile umwe.

⁸ Soka etyi mopopi. Tyina wehenelikwambele upondola okulilinga omapulo aa: ‘Ovitateka patyi ndyili nokukondya navio pehepano? Pena omunthu ndyisukisa okweevela? Pena etyi tyanthumbukila ononthiki ombu ndyisukisa okukwateswako na Huku?’ (2 Oha. 19:​15-19) Tupu tupondola okusoka kelikwambelo Sesusi etulongesa, atusoko evi tupondola okwiita viyemba kenyina lya Siovaa, Nouhamba wae, nonomphango mbae. — Mat. 6:​9, 10.

⁹ Omphange umwe utiwa o Aliska etyi eiva okuti omulume wae kamakala-ko vali ononthiki ononyingi, mokonda una ouvela utiwa o Câncer, atyimupwiya okulikwambela. Wapopia wati: “Mokonda ankho neihamenwa unene, tyemphwiyile unene okusoka umwe nawa evi mandyiiti pokulikwambela.” Oityi tyemukwatesileko? Wapopia vali wati: “Tyina nehenelikwambele ndyisoka umwe nawa andyitulu omutima, opo nahapopie vala evi ndyili nokukondya navio. Opo ndyipopia umwe aviho vili komutima.”

10. Omokonda yatyi twesukisila okulikwambela apeho? (Tala omalutalatu.)

¹⁰ Likwambela apeho. Tupondola okulikwambela ku Siovaa tyihasete, mahi okukala ehimbwe nokulikwambela opo tutyivila okupopila Siovaa atyiho tyili komutima wetu.b Omulume womphange Aliska utiwa o Eliya wati: “Monthiki ndyilikwambela ehimbwe, otyo tyokwoovola omuvo wokulikwambela tyapameka oupanga wange na Huku. Siovaa wapwa elundo, unthehelela umwe nawa, naapa ndyikala omuvo omunyingi nokulikwambela.” Linga ñgaa: Tyina uti pokulikwambela enda apa pahaviele, pehena ou mekutalula, apa upondola okulikwambelela peulu. Tupu tyokulikwambela tyilinge umwe otyinthyiliya tyove.

TANGA OMALIKWAMBELO OVANTHU VAPOPIWA M’OMBIMBILIYA

11. Ouwa patyi tupola-ko tyina tutanga omalikwambelo eli m’Ombimbiliya? (Tala okakasa kati: “Okuti Noove Otyo Una-tyo Etyi?”)

¹¹ Tyimwe tyipondola okutukwatesako, okutanga omalikwambelo ovanthu vapopiwa m’Ombimbiliya ngaa eli momukanda Oviimbo. Tyina weetanga omono otyipuka ovafendi va Huku vemupopila umwe atyiho tyili komutima, opo noove pokulikwambela mopopila Siovaa atyiho tyili komutima. Tupu momono onondaka onongwa vapopia pokuhilivika Siovaa, noove upondola okukapopia tyina ulikwambela. Ya tyipondola movasi-mo omalikwambelo amwe apopia umwe etyi ove uli nokukondya natyo.

12. Pokutanga elikwambelo limwe oityi tupondola okulipula?

¹² Tyina uli nokutanga elikwambelo limwe m’Ombimbiliya lipula okuti: ‘Elikwambelo eli olialie? Oityi ankho eli nokukondya natyo? Okuti naame otyo ndyili nokukondya natyo? Oityi ndyililongesila kelikwambelo eli?’ Pamwe mosukisa okukatanga vali, utyivile okukumbulula omapulo oo, mahi okutyilinga matyikukwatesako. Pahe matuhipulula-po omalikwambelo a vamwe.

13. Oityi tulilongesila kelikwambelo lya Ana? (1 Samuwele 1:​10, 11) (Tala olutalatu kondye.)

¹³ Tanga 1 Samuwele 1:​10, 11. Etyi Ana alinga elikwambelo olio ankho uli nokukondya novipuka vivali viemwiihama unene. Tyo tete ankho kaveleka. Tya vali Penina ankho umulinga omukwele, pahe asoko okuti kesilivila. (1 Sam. 1:​4-7) Okuti noove una etyi uli nokukondya natyo? Upondola okulinga etyi tyalingile Ana. Tyakwatesileko Ana okulikwambela ehimbwe ku Huku, emupopila umwe atyiho tyili komutima. (1 Sam. 1:​12, 18) Noonthwe opo tutule omutima tuna okuyumba “omulemo wetu ku Siovaa,” mokumupopila okuti ndyili nokukondya notyongandi, notyongangi. — Ovii. 55:22.

14. (a) Oityi vali tulilongesila ku Ana? (b) Oityi matyitukwatesako okulikwambela nawa? (Tala okatoi.)

¹⁴ Etyi pahe pakala Ana akutula omona utiwa o Samuwele. Etyi emupola-ko emutwala kekaka liokufendela Komunene-nakwa Elii. (1 Sam. 1:​24-28) Pokulikwambela Ana apopi onondaka mbulekesa okuti una onthumbi yokuti, Siovaa uyakulila ovafendi vae vehemuyeke-po.c (1 Sam. 2:​1, 8, 9) Tyipondola no ngootyo meumbo nkhele ankho muna umwe ovitateka, mahi Ana waikile omutwe moviwa Siovaa eli nokumwaavela. Oityi otyo tyitulongesa? Tyitulongesa okuti ine tuna evi tuli nokukondya navio, tyimwe tyipondola okutukwatesako atutyivili okukoleleya, okwiika omutwe movipuka oviwa Siovaa eli nokutulingila pehepano.

15. Tyina tuna evi tuli nokukondya navio, oityi tulilongesila kelikwambelo lya Selemiya? (Selemiya 12:1)

¹⁵ Tanga Selemiya 12:1. Etyi omuuli Selemiya amona okuti ovanthu vana vokulinga evi viapenga ngoti vekahi vali nawa kwe, atyimusoyesa. Otyikwavo tyemusoyesile otyetyi ova Isilayeli vakwavo ankho vemulinga. (Sele. 20:​7, 8) Noonthwe tyina tumona okuti vana vokulinga ovivi ngoti vekahi vali nawa kwoonthwe, na tyina ovanthu vetukwela, tupondola okusoya. Selemiya wapopilile Siovaa etyi tyemutokotesa omutwe, mahi ahapopi okuti Huku oe uli nokupengesa. Etyi Siovaa amasula ovanthu vae vehetavela, otyo atyipe umwe vali onthumbi Selemiya yokuti Siovaa uviukisa. (Sele. 32:19) Noonthwe tyina pena etyi tyetutokotesa omutwe, tupondola okulikwambela ku Siovaa atumupopila-tyo, nonthumbi yokuti momuvo anaka meya okumana-ko aviho tuli nokukondya navio.

16. Oityi tulilongesila komulume watukile mu Levii? (Oviimbo 42:​1-4) (Tala omalutalatu.)

¹⁶ Tanga Oviimbo 42:​1-4. Otyiimbo etyi tyahonekwa nomulume umwe watuka mu Levii ankho uli koukonde, wahafendela Huku mondywo yae, nga vakwavo vatuka mu Levii. Pahe motyiimbo etyi wapopia etyi ankho tyemutokotesa omutwe. Noonthwe ine katutundu meumbo mokonda yokuvela, okuti hatyo twapakawa mokaleya kombanda yokufenda Siovaa, tupondola okukala ngomulume oo watukile mu Levii. Tupondola vala okuti, hono twahambukwa, hono twasoya. Otyo yatyo otyiwa okutyipopila Siovaa melikwambelo. Siovaa upondola okutukwatesako okutula omutima, atupake omutwe pomphangu atusoko nawa ovipuka. Omulume una watukile mu Levii etyimono okuti naina pena ovinyingi apondola okulinga ahilivike Siovaa. (Ovii. 42:5) Tupu wasokele kovipuka oviwa Siovaa ankho ekahi nokumulingila. (Ovii. 42:8) Okupopila Siovaa etyi tuli nokukondya natyo, matyitukwatesako okutula omutima, atukala vali nombembwa, atumono ononkhono mbokukoleleya.

17. (a) Oityi tulilongesila kelikwambelo liomuuli Sona? (Sona 2:​1, 2) (b) Onovelesikulu patyi mbuli m’Oviimbo mbupondola okutukwatesako povitateka? (Tala okatoi.)

¹⁷ Tanga Sona 2:​1, 2. Etyi omuuli Sona alinga elikwambelo olio, ankho uli meimo liombisi imwe onene. Namphila aanyene ku Siovaa, mahi pokulikwambela Sona ankho una onthumbi yokuti memutehelela. Onondaka mbumwe Sona apopile etyi eli nokulikwambela tumbuvasa m’Oviimbo.d Naina Sona ankho wii umwe nawa oviimbo ovio. Etyi evisoka umwe nawa, etyimono okuti Siovaa upondola okumukwatesako. Noonthwe ine tupaka momutwe onovelesikulu mbumwe mb’Ombimbiliya, pokulikwambela ku Siovaa povitateka, tupondola okumbuhinangela, ambututulisa omutima.

LIKWAMBELA UFWENE KU SIOVAA

18-19. Tyina etyi matupopi pokulikwambela katutyii, oñgeni onondaka mbuli m’Ova Loma 8:​26, 27 mbupondola okutukwatesako? Popia-po etyi tyalingile umwe.

¹⁸ Tanga Ova Loma 8:​26, 27. Pamwe mokonda yovitateka, tutokota umwe omutwe neetyi vala matupopi pokulikwambela atuhetyimono. Mahi tuna tyimwe tyitukwatesako. Otyityi? Pomuvo watyo opo omphepo ikola ya Huku, ‘itupopila-ko.’ Ñgeni ngootyo? Siovaa walulikile ovanthu vamwe nomphepo yae ikola, vahoneke omalikwambelo omanyingi Mondaka yae. Ine etyi matupopi katutyii, tupondola okupopia omalikwambelo eli m’Ombimbiliya, Siovaa metukumbulula.

¹⁹ Otyipuka otyo tyakwatesileko omuhikwena umwe woko Russia utiwa o Yelena. Wapakelwe mokaleya mokonda yokulikwambela nokutanga Ombimbiliya. Atyimwiihama umwe unene, nokulikwambela vala ankho tyimupwiya. Yelena wati: “Andyihinangela okuti tyina natokota omutwe etyi mandyipopi pokulikwambela hityii nawa-nawa, Siovaa upondola okukwatelela momalikwambelo ovafendi vae vokohale . . . aalingi ngatyina uti o ange. . . . Otyipuka otyo, otyo tyankhwatesileko unene etyi ovipuka vialema.”

20. Oityi tyipondola okututulisa omutima atulikwambela nawa?

²⁰ Tyina twatokota omutwe mokonda yovipuka tuli nokukondya navio, pokulikwambela tupondola vala okuti momutwe amuya etyi amuya etyi. Pahe oityi matyitukwatesako? Tyina tuhenelikwambele, tupondola okutehelela omukanda Oviimbo wangalavalwa. Tupu tupondola okuhoneka atyiho tyili momutima wetu ngeetyi tyalingile Ohamba Ndaviti. (Ovii. 18, 34, 142; onondaka mbokwahimbika.) Evi twapopia ovimwe vala tupondola okulinga tutule omutima atutyivili okulikwambela. (Ovii. 141:2) Mahi tupu upondola osoko ovikwavo vikutulisa omutima.

21. Pokulikwambela oityi tusukisila okupopia atyiho tyili momutima?

²¹ Tyitukalesa nawa okunoñgonoka okuti, Siovaa utwii nawa, wii etyi twesukisa naapa twehenetyipopie. (Ovii. 139:4) Uhambukwa tyina tumupopila evi vili momutima wetu vilekesa okuti tumuyumba onthumbi. Naina wahalinge otyinkhe tyokulikwambela ku Tate yetu wokeulu. Kopa ounongo momalikwambelo eli Mondaka yae. Tyina ulikwambela popia umwe atyiho tyili komutima, popia evi viekuhambukiswa neevi viekutokotesa omutwe. Mokonda Siovaa epanga liove, apeho makala ponthele yove, kemekuyeke-po!