Tyokutaha Mandyityiyeke-po?
SOKA ñgeno pena ombwale imwe yehimbika-le okutaha kohale. Ityihole tyokutaha, tyina ina apa yahanda okulinanena yenda vala. Mahi pahe omapanga ayo novavo valinga otyiho, vahanda iyeke-po okutaha, mahi kuyo kavesukisa-le okulinga otyiho.
Okuti noove otyo ukahi ngootyo? Oityi matyikukwatesako utale ine tyokutaha motyiyeke-po ine kumetyiyeke-po?
Movilongo vimwe tyina omunthu amehiki meti limwe ukatalwa nondotolo imupopile ine nkhele tyitavela atahe aa una okutyiyeka-po. Onombangi vakala movilongo mulingwa otyipuka otyo, vena umwe okutavela etyi tyipopia ovatumini. (Loma 13:1) Tyilinge motyilongo tyenyi muna ovitumino ovio tyilinge mutupu, ovipuka vimwe matupopi vipondola okukukwatesako okutala ine motyiyeke-po tyokutaha.
SOKA OÑGENI UHOLE OKUTAHA
Eongano limwe liomo Estados Unidos liapopia okuti vokwakulupa vapondola okulilinga omapulo aa:
Okuti nkhele ndyityivila umwe okutala nawa onosinali, ndyimona-po nawa kounthiki?
Okuti okuvendamena potyilivandyelo ndyitale omatuku-tuku eli monyima tyimphwiya?
Ankho pena etyi namona hisete okutalavala?
Pokutaha ndyilihindaika vala otyo ndyisetesa vakwetu veli monyima?
Okuti ndyikalela vala okuti himaa ndyipumwa, himaa ndyipuma? Okuti etuku-tuku liange lielisipata, ndyihole okupuma movipuka vili vala ngoopo?
Nthiki imwe onopulisa mbanthalamekele-ale mokonda tyatiwa nataha omapita?
Okuti ndyihole okupoila tyina ndyitaha?
Okuti ndyili nokunwa ovihemba vindingisa omalwinge?
Okuti ombunga yange nomapanga ange vamphopila okuti otyipuka ndyitaha katyivekalesa nawa?
Ine pena limwe pomapulo oo wati yoo, okuti hatyo evali, opo usukisa okusoka nawa. Upondola ononthiki mbumwe ohatahe, haunene umwe kounthiki. Uti ok ala otale ine uya umwe nokutaha nawa. Upondola okutomphola nepanga liove oo umwe womeumbo lienyi, ekutale ine uli umwe nokutaha nawa. Tupu upondola okwenda mosikola ukalongeswe vali okutaha nawa. Mahi ine pomapulo oo omanyingi atyo weeti yoo, opo hahe vali uyeke-po okutaha.a
LANDULA ONONDUNGE MB’OMBIMBILIYA
Pamwe katutyimono okuti tyokutaha pahe tyili nokutupona. Tupu tyokuti tyokutaha tuna okutyiyeka-po tyipondola okutunumanesa. Pahe naina onondunge patyi mb’Ombimbiliya mbupondola okukukwatesako okusoka nawa etyi molingi? Tutalei-po onombali.
Vimwe kumevivili vali. (Omih. 11:2) Tyina omunthu eli nokukulupa tyati umwe omaiho kaamonopo-ale vali nawa, okwiva keivi-ko vali nawa, ononkhono utupu-ale vali, nokulinga ovipuka useta vala. Ovanthu vamwe mokonda yokwakulupa kosaluwa kavakwate-ko vali mokonda vetyii okuti vapondola okulivetela-ko. Nokutaha ongootyo. Omunthu uli nokukulupa upondola okuti tyokutaha hahe ndyityiyeke-po mokonda tyipondola okundyetela. (Omih. 22:3) Na tyina vakwavo vemupopila okuti valinga otyiho notyipuka ataha, mokonda utyii okuti vimwe kevivili vali utavela umwe. — Tala 2 Samuwele 21:15-17.
Wahaetele vakwenyi. (Epal. 22:8) Ine omunthu katahe nawa upondola okwiipaa vakwavo. Omunthu wokutaha ngwe pahe tyimupona, upondola okwiipaa vakwavo nae ankhila-po. Ine pokutaha wiipaa omunthu, uvelwa onombei.
Wahasoke okuti okuyeka-po okutaha ovanthu mavekutombo. Siovaa ukuhole unene mokonda yeetyi ukahi, mokonda yeetyi welipaka koututu, weliola omutima, neetyi wahahande okwetela vakwenyi. Ngwe wati okuti, mekukwatesako mekupameka. (Isa. 46:4) Kamekuyeke-po. Naina likwambela ku Siovaa omwiiti ounongo, utyivile okusoka nawa ine kumataha-taha vali.
a Opo unoñgonoke vali katale mo Despertai! 22 ya Agosto yo 2002, ponthele yati: “Acidente de automóvel: ‘Só acontece com os outros’?”