Twalako Tyahambukwa Pokwakalela Wove

1-2. Vokwakalela vavo vavela, Siovaa uvetala ñgeni? (Omihe 19:17) (Tupu tala omalutalatu.)

OMUKULU umwe Ombangi woko Coreia utiwa o Jin-yeol wapopia wati: “Apa nanepa palamba-le omanima 32. Mahi omukai wange kavete-mo. Apa ahimbika okuvela pena-le omanima etano. Ame ndyihole unene omukai wange, ame ndyimuhunga, mahi hityilingi tyokuti ndyilinga ñgeni. Mokonda ketyivili okuliviya-viya ame umwe nemukalela. Mwene una oula wae, wange neufweneka po wae, tyina tulangala-po tulikwata momankhanya.”

² Okuti noove una ou wakalela uvela? Okuti ovo tate yove? Oyou mwelinepa nae? Omona wove? Epanga liove? Ine una ou wakalela mokutala tyokumukwatesako kutyilingi ngatyina uti wakuluminywa, mokonda umuhole, tupu uhole Siovaa. (1 Tim. 5:​4, 8; Tia. 1:27) Mahi vimwe ukondya navio vakwenyi kavevimono. Pamwe tyina muna vakwenyi uyola-yola umwe, mahi tyina wike ukalela vala okulila. (Ovii. 6:6) Pahe upondola vala okuti, peihama peiwe na mwene. Namphila vimwe ukondya navio, vakwenyi kavevimono, mahi Siovaa uvieete. (Tala Okutunda 3:7.) Evi ulingila ou wakalela Siovaa uvimona, tyina ulila ukulwete, ukuhole unene. (Ovii. 56:8; 126:5) Evi ulingila ou wakalela, ngootyo uli nokulevalesa Siovaa, mwene mekekufeta. — Tanga Omihe 19:17.

3. Oityi tutila tyepwiyile koo Ambalayau na Sala okulinga oungendi na Tela?

³ Mombimbiliya mwapopia ovanthu ovanyingi ankho vakalela vavo vakulupa, okuti hatyo vavela. Tutalei etyi tyalingile ovo Ambalayau na Sala. Etyi vati pokutunda mepunda-umbo lyo Uli, Tela he yae ankho wakulupa-le, mokutala una-le omanima 200. Mahi no ngootyo avai umwe nae. Ovakulu ovo vaendele ononthiki ononyingi, otyo valalaila pokati, atee vekehika umwe ko Halaa. (Ehim. 11:​31, 32) Tutyii okuti ovo Ambalayau na Sala ankho vehole unene ombwale Tela. Mahi tyepwiyile unene okweenda nae. Ngwe mokutala vaendelele komakamelu no komambulu. Pahe nkhele soka-vo ombwale Tela okweendela kembulu. Mokutala ovo Ambalayau na Sala pamwe ankho vaponwa umwe. Mahi Siovaa weveavelele ononkhono vetyivile okukwatesako ombwale Tela. Noove Siovaa mekukwatesako ngeetyi akwatesileko ovo Ambalayau na Sala. — Ovii. 55:22.

4. Oityi matulilongesa monthele ei?

⁴ Otyipuka tyimwe matyikukwatesako pokwakalela wove, okuhambukwa. (Omih. 15:13) Omunthu wehambu ukoleleya tyahambukwa naapa ovipuka vialema. (Tia. 1:​2, 3) Oityi una okulinga ulinge omunthu wehambu? Tyimwe okuyumba onthumbi mu Siovaa, olikwambela omwiiti ekukwateseko ulinge omunthu wehambu. Pena ovipuka ovikwavo tupondola okulinga, tuhambukwe pokwakalela vetu. Monthele ei matupopi-mo vimwe. Tupu matupopi oityi vomewaneno vesukisa okulinga vakwateseko ava vakalela vavo. Mahi nkhele matupopi omokonda yatyi vana vakalela vakwavo vesukisila okuhambukwa, novipuka vipondola okuvepola ehambu.

OKUKALELA VETU TYIPONDOLA OKUTUPOLA EHAMBU

5. Omokonda yatyi vana vakalela vakwavo vesukisila okuhambukwa?

⁵ Ine ukalela vala okusoka kweevi uli nokukondya navio pokwakalela wove, matyikuponeswa pahe olingi vala tyokuti, ndyilinga ñgeni. (Omih. 24:10) Ngwe tyina waponwa, opo pahe upondola vala okuvekandukila, nokuvelinga vala onya. Ovipuka patyi vipondola okupola ehambu vokwakalela vakwavo?

6. Vokwakalela vakwavo oityi vepwilila?

⁶ Vokwakalela vakwavo vepwila. Omuhikwena umwe Ombangi utiwa o Leah una ou akalela wati: “Ame ndyipwila unene. Pamwe tyina tyiti kongulohi ndyitupu-ale vali ononkhono, nokukumbulula umwe vala omunthu wanthuma omesasi, tyinkhisa vala elundo.” Vamwe vakalela vavo, kavalala, kavakaenda-enda. Omuhikwena umwe Ombangi utiwa o Inés wati: “Ame hilala-le. Pamwe tulala vala lupahi nokukwatesako maivi. Ame nombwale yange, nokukaenda-enda umwe vala katutyivili.” Vamwe mokonda vena ava vakalela, ovilinga vimwe meongano kavetyivili okuvilinga, nokukongwa pokapito kavaende. Pahe pamwe vankhia vala ounye, valinga vala ngonkhwatwa.

7. Omokonda yatyi vamwe velivelela onombei?

⁷ Veihamenwa, velivela onombei. Omuhikwena umwe Ombangi utiwa o Jessica wati: “Ame ndyina ovipuka vimwe nehevili okulinga. Tyina ndyili vala opo nokulinga oupuka wange, tyinkhala omapita. Ngoti opo hesukile-ale na tate.” Vamwe pahe valovola okukalela vavo. Ava ovakwavo vasoka okuti etyi veli nokulinga tyitupu-ale. Nkhele ovakwavo, vehole okulivela onombei mokonda tyina vamanumana, pokupopia vahatula vala, valinga onya ava vakalela. (Tia. 3:2) Ovakwavo tyiveihama unene okutala okuti omunthu vakalela uli nokuvila-po. Omukai umwe Ombangi utiwa o Barbara wati: “Tyindyihama unene okutala omunthu ndyihole, uulukuta umwe katutu-katutu.”

8. Oityi vamwe vapopia tyilekesa okuti okupandula ava vena ava vakalela tyivekalesa nawa?

⁸ Vasoka okuti etyi valingila vakwavo tyitupu-ale. Omokonda yatyi? Omokonda kavapandulwa. Naina okupandula ava vena ava vakalela tyipondola okuvekalesa nawa. (1 Tes. 5:18) Omuhikwena umwe Ombangi utiwa o Melissa wati: “Pamwe ndyiihamenwa umwe andyilili, mahi tyina ava nakalela vamati, ‘tupandula unene otyipuka utukwatesako,’ ndyikala nawa, ndyihambukwa! Onondaka vapopia mbumphameka, na tyina ndyiya onthiki onkhwavo, ndyiya umwe tyahambukwa.” Omukulu umwe utiwa o Ahmadu wapopia oñgeni tyokupandulwa tyihole okumukalesa. Omukulu oo vatekula omona omukainthu wou velilandula nomukai wae. Omukainthu watyo oo uvela otyinthonya. Wapopia wati: “Ovipuka tuhole okumulingila vimwe kevii-ale, mahi tyina amati napandula, na tyina amahoneka okamukanda ati ‘ndyimuhole unene,’ tuhambukwa unene.”

ETYI MOLINGI UTWALEKO TYAHAMBUKWA

9. Oityi tyina okulinga ou una ou akalela?

⁹ Tavela okuti vimwe kumevivili. (Omih. 11:2) Atuho vala tuponwa, vimwe atuhevivili okuvilinga. Naina otyiwa usoke evi uvila okulinga, evi wehevili oviyeke. Otyo katyapengele, okutyilinga tyilekesa okuti, utyii okuti vimwe kuvivili! Tupu tyina wamamono okuti pena ou uhanda okukukwatesako, tavela. Umwe Ombangi utiwa o Jay wati: “Mwene munthu na munthu monthiki una umwe evi evila okulinga. Okulinga vala evi tuvila atuheliipaa-ko, tutwalako tyahambukwa.”

10. Oityi tutila vana vakalela vakwavo vena okukungunyika ovipuka? (Omihe 19:11)

¹⁰ Noñgonoka omokonda yatyi ou wakalela alingila ovipuka alinga. (Tanga Omihe 19:11.) Ine ukala omunthu wokukungunyika ovipuka, tyina una etyi walingwa na tyina pena umwe wekupopia omapita, kumanumana vala liwa. Mosoko oityi etyipopila, oityi etyilingila. Tyili omauvela amwe alingisisa omunthu okupopia evi viahai na mutwe. (Omup. 7:7) Nomunthu umwe ukahi nawa, omunthu wovanthu, tyina amavele upondola okunkhia ononyengo nokukandukila vala vakwavo. Upondola vala okuyayesa vakwavo, nokuvepenya, nokupandula ahapandula-le. Ine una ou wakalela wavela, ovola okunoñgonoka oñgeni ouvela oo ukalesa omunthu watyo. Tyina wametyinoñgonoka opo motyimono okuti, vimwe upopia vala mokwavela, hakuti otyo ekahi. — Omih. 14:29.

11. Ovipuka patyi ava vena ava vakalela vena okusuka vali navio? (Oviimbo 132:​4, 5)

¹¹ Pameka oupanga wove na Siovaa. Pamwe mosukisa okuyeka-po ovilinga vimwe, ulinge “evi viesukisa vali.” (Fili. 1:10) Pwoovio yatyo viesukisa vali, tyimwe okupameka oupanga wove na Siovaa. Nohamba Ndaviti ankho una ovilinga ovinyingi mahi otyipuka ankho esuka vali natyo, oupanga wae na Siovaa. (Tanga Oviimbo 132:​4, 5.) Naina povipuka una okusuka vali navio, pati umwe nokutanga Ombimbiliya ononthiki ambuho, nokulikwambela. Omuhikwena umwe Ombangi utiwa o Elisha wati: “Ame tyinkhwatesako andyitwalako tyahambukwa okulikwambela, nokusoka konovelesikulu mbumwe mbunthulisa omutima mbomukanda Oviimbo. Mahi etyi tyinkhwatesako vali unene okulikwambela. Ndyilikwambela unene ku Siovaa anthulise omutima.”

12. Omokonda yatyi ava vena ava vakalela vesukisila okulinga evi mavivekalesa nekongoko?

¹² Linga evi mavikukalesa nekongoko. Vana vokuna ava vakalela mokonda ovilinga vivehitikinya kavali-ale, pamwe nokuteleka kavateleka-le. Mahi ove opo wahavele wesukisa okulia okulia kukahi nawa nokunana-nana monongolo. Namphila una ovilinga ovinyingi, uti ove ulia, ove unana-nana monongolo. (Efe. 5:​15, 16) Tupu wahalangale-po eli lietaka. (Omup. 4:6) Vokwatanga vapopia okuti, omunthu tyina elele nowongo upululukwa. Omukanda umwe upopia ekongoko wapopia okuti, ovanthu vana vokulala umwe nawa, kavalingi unene otyiho, na tyina pena tyimwe tyevelemena-po vatula omutima. Tupu pamwe linga umwe evi uhole. (Omup. 8:15) Omuhikwena umwe una ou akalela, wapopia etyi tyimukwatesako okuhambukwa. Wati: “Tyina namatale tyitavela okutunda-po ndyenda umwe. Mohanyi ndyina umwe onthiki tukaenda-enda nepanga liange.”

13. Okuyola-yola otyiwa mokonda yatyi? (Omihe 17:22)

¹³ Linga omunthu wokuyola-yola. (Tanga Omihe 17:22; Omup. 3:​1, 4) Okuyola tyikalesa nawa omunthu. Otyihemba, tyihakula. Tyina una ou wakalela, ovipuka pamwe kaviende ngeetyi ankho usoka. Mahi ankho ulinga omunthu wokuyola-yola naapa ovipuka vialema, kumanumana unene, kumatokota unene omutwe. Okuyola-yola nomunthu wakalela mukala vali omapanga.

14. Omokonda yatyi otyiwa utomphole nepanga uyumba onthumbi?

¹⁴ Tomphola nepanga liove uyumba onthumbi. Pamwe molikwatehila umwe ulinge evi mavikuhambukiswa, mahi no ngootyo osoyo. Opo yatyo opo, otyiwa utomphole nepanga liove, omupopila evi viekusoyesa. Tomphola nepanga uyumba onthumbi, wahamekupolo-po omapita. (Omih. 17:17) Mekutehelela umwe nawa, ekupopila onondaka mambukupameka, okala nawa. — Omih. 12:25.

15. Omokonda yatyi otyiwa usoke koviwa ukevelela?

¹⁵ Soka ñgeno muli mouye omupe, nou wakalela. Apeho hinangela okuti, otyo ukahi nokulinga tyokukalela mukwenyi kumbi matyipu, mokonda etyi Siovaa ati pokwatunga ovanthu hatyoko evehandelele. (2 Kol. 4:​16-18) Apa katutu matumono “omwenyo wotyotyili.” (1 Tim. 6:19) Okutomphola nou wakalela ovipuka mamukalinga Mouye Omupe, matyikuhambukiswa. (Isa. 33:24; 65:21) Omuhikwena umwe Ombangi utiwa o Heather wati: “Ndyihole okupopila ava nakalela okuti, apa katutu matukatunga atuho ovikutu, matukahataika atuho nokukaenda nomisikaleta. Matukalinga onombolo, atukatelekela-po vetu vokwatutiliswa. Atuho tupandula Siovaa mokonda yoviwa meketwavela.”

ETYI VOMEWANENO VENA OKULINGA VEVEKWATESEKO

16. Oityi vomewaneno vapondola okulinga vakwateseko ava vena ava vakalela? (Tupu tala olutalatu.)

¹⁶ Kwatesako vokuna ava vakalela, navo vetyivile okulinga ovipuka viavo. Tyina tukwateseako vomewaneno vena ava vakalela, opo vetyivila okulinga ovilinga viavo, nokufima-po. (Ngal. 6:2) Vamwe vena onthiki vapanga yokulinga otyipuka otyo. Omukai umwe Ombangi utiwa o Natalya wakalela omulume wae wahaende, wati: “Mewaneno muna omukwendye umwe, uya tuvali mosimanu peumbo lietu, akale nombwale yange. Vaivisa aveho otyo vatomphola, tupu vatala osinema. Tyina ameya ombwale yange ihambukwa, opo pahe naame ndyityivila okulinga oupuka wange nokukaenda-enda.” Ine mewaneno lienyi muna ou ukalelwa, upondola nthiki imwe okalala keumbo liomunthu oo, opo una wemukalela apululukwe-po umwe nawa.

17. Momaliongiyo no movionge oityi upondola okulinga ukwateseko ava vena ava vakalela?

¹⁷ Vekwatesako momaliongiyo no movionge. Vana vena ava vakalela, pamwe momaliongiyo no movionge kavatehelela-le nawa mokonda vakwatesako vavo. Pahe opo uvekwateseko, movionge no momaliongiyo upondola okukapumphama nou ukalelwa, mukwenyi atehelele umwe nawa. Ine omunthu ukalelwa kapondola okutunda meumbo, upondola okwenda meumbo liae amutalela eliongiyo mo telefone. Ou wokumukalela aende umwe kondywo yomaliongiyo.

18. Oityi vali tupondola okulinga tukwateseko ava vena ava vakalela?

¹⁸ Pandula ava vena ava vakalela, tupu veitila-ko. Ovakulu vomawaneno vena okupameka apeho vana vena ava vakalela. (Omih. 27:23) Mahi atuho mewaneno tuna okupandula ava vena ava vakalela. Tupu otyiwa okuveitila-ko Siovaa evepe ononkhono avatwalako tyahambukwa. — 2 Kol. 1:11.

19. Ovipuka patyi tukevelela?

¹⁹ Apa katutu Siovaa makamana-ko aviho vitulilisa. Kakukavelwa vali, kakukankhiwa vali. (Ehol. 21:​3, 4) “Otyilema matyikahombauka ngombambi.” (Isa. 35:​5, 6) Ovanthu kavakakulupa vali, petupu ou makakalela vali wavo mokonda tyatiwa uvela, mokonda “ovipuka vyo kohale, kamavikahinangailwa vali.” (Isa. 65:17) Mosimbu tukevelela ovipuka ovio, Siovaa kametuyeke-po. Okumuyumba onthumbi, metwavela ononkhono ‘tutyivile okukoleleya umwe nawa noumphwa-lundo nehambu.’ — Kolo. 1:11.