Tyina Omunthu Amankhi Wenda Napi?

Ekumbululo Lyo Mbimbiliya

Ombimbiliya yati: “Ovanthu vokuna omuenyo vetyii okuti mavankhi, mahi vokuankhia, vetupu vali etyi vei.” (Eclesiastes 9:5; Salmo 146:4) Ngotyo, tyina tuamankhi, katuko vali. Omunthu wankhia, kasoko, kalingi na tyike, keivi na tyike.

“Keheke oko mokondoka”

Tupondola okunoñgonoka oku tuenda nako tyina tuamankhi okutalela kuetyi Huku apopilile omulume wotete Andau, etyi ehemutavelele, wati: “Ove uheke iya keheke oko mokondoka.” (Gênesis 3:19) Etyi Huku ehenelinge Andau okumupola “keheke,” ankho Andau keko. (Gênesis 2:7) Tupu, etyi Andau ankhia akondoka keheke, ankho keko vali.

Na hono tyina omunthu ankhia ngotyo keko vali. Ombimbiliya ipopia ovanthu novinyama okuti: “Aveho vatunda keheke iya aveho vakondoka keheke.” — Eclesiastes 3:19, 20.

Ononkhia hanthyulilo ya atyiho

Ovikando ovinyingi Ombimbiliya yeeleka ononkhia nolumphoki. (Salmo 13:3; Suau 11:11-14; Ovilinga 7:60) Tyina omunthu elele, keivi na tyike tyikahi nokupita ponthele yae. Tyelifwa notyo, vokuanhia kavei vali na tyike. Mahi, Ombimbiliya ipopia okuti Huku utyivila okupahulapo ovanthu kolumphoki olo, avakala vali nomuenyo. (Jó 14:13-15) Vana Huku makatutilisa, ya atyiho.