Ovola Okunoñgonoka Otyili
Omokonda Yatyi Ovanthu Valingila Okapungulula
Ovanthu ovanyingi valinga okapungulula vakuavo mokonda yokuehei otyili. Tala onongeleka ombu:
Ovanthu vamwe vokuovola ovaundapi, vasoka okuti ovakai kavetyivili okulinga ovilinga ñgeno vilingwa vala novanongo, no vokualunguka.
Vo ko Alemanha vahungile ova Sundeu okuti vapaka oukola mo nonyombo mbavo avayandyanesa omauvela. Mokueenda kuoutumini wo Nazi, ova Sundeu vahungilwe vali. Mahi pahe avatendeleyua okuti ovo ankho vekahi nokulingisa otyilongo tyo Alemanha okuhakala vali nonombongo. Mokonda yovipuka ovio vivali, ova Sundeu avalingwa unene onya. Iya na hono nkhele vamwe valingwa onya.
Ovanthu ovanyingi vasoka okuti ovanthu aveho vokualemana, vetupu-ale ehambu vakalela vala okunumana.
Ovanthu vokutavela kovipuka ovio, vasoka okuti otyo hakapungulula-ko. Vapondola okukupopila okuti tusoka tupu ngotyo, omokonda ye etyi ne etyi. Tupu vasoka okuti una wehetyitavela omokonda vala kei nawa ovipuka.
Oñgeni Ombimbiliya Ipondola Okutukuatesako?
“Hatyiwa-ko omunthu okuhanoñgonoka ovipuka.” — PROVÉRBIOS 19:2.
Otyo tyitulongesa-tyi? Ine katunoñgonoka nawa oñgeni tyili-tyili ovipuka vikahi, matulingi vala etyi tyahaviukile. Ine tutavela vala kounkhembi, atuhanoñgonoka otyili, matupolo-po vala omapita ovanthu.
Okunoñgonoka Otyili Tyitukuatesako
Ine tunoñgonoka umwe nawa oñgeni tyili-tyili ovanthu vamwe vekahi, kamatutavela kovipuka ovanthu vevetendeleya. Tyina tuamanoñgonoka okuti ovipuka ankho vipopiwa ovanthu vamwe haviotyotyili-ko, matuovola okuvenoñgonoka vali nawa.
Linga Ñgaa
Ovanthu vapondola okupopia okuti vomuhoko wongandi vena otyituwa tyimwe otyivi, mahi noñgonoka okuti, ovanthu ovanyingi vomuhoko oo, vetupu otyituwa otyo weiva.
Otyiwa okunoñgonoka okuti, hamwe ove nkhele kwii nawa ovanthu vomuhoko oo.
Ovola okunoñgonoka otyili ku ava vayumbwa onthumbi.