Opi Sesusi Atyitilwa Iya Onalupi Atyitwa?

Sesale Augustu, omutumini wo Loma watumine ovanthu aveho vekelihonekese. Moluotyo, Suse na Maliya ankho vena okulinga oungendi okuenda kepunda-umbo oku Suse atyitililwe, kepunda-umbo lyo Mbelei kokumbili kwo Selusalei.

Mo Mbelei ankho muna ovanthu ovanyingi veya okulihonekesa. Mokonda yotyo, Suse na Maliya avavasi vala omphangu mohambo, muna ankho mukala ovimbulu novinyama ovikuavo. Sesusi ngamo, atyitilwa. Maliya emuhiki notyinyanga iya emulangeka momutemba, ankho mulila ovinyama.

Tyipondola Huku wamona okuti, Sesale Augustu mahindi otyitumino tyokuhonekesa ovanthu. Omokonda yatyi? Omokonda, ngotyo Sesusi ankho matyitilwa ko Mbelei, epunda-umbo liatyitililwe omukuaukulu wae, Ohamba Daviti. Ovihonekwa ankho vityipopia-le okuti, olio epunda-umbo mamutyitilwa Omutumini walaelwe. — Miquéias 5:2.

Otyinthiki otyo ankho tyakolela unene! Tyina vekahi mokati kovipembe, ovanthita avamimikilwa notyimimi tyeveetela onohanya. Otyo ankho omunkhima wa Siovaa! Imwe po noandyu mba Huku, aipopila ovanthita okuti: “Muhakalei nowoma, tyetyi ame ndyimupopila onondaka onongwa mbehambu limwe enene ovanthu aveho mavakala nalio. Mokonda hono muatyitilwa omuyovoli, mepunda-umbo lya Daviti, Kilisitu, Tatekulu. Mamumuimbuka ñgana: Mamuvasi olukembe lwawingilwa povinyanga, lwalangekwa momutemba.” Liwa-liwa ponthele yoandyu oyo apamoneka onoandyu ononyingi, ambuti: “Huku keulu ahilivikwe, ovanthu apanda kombanda yohi vakale nombembwa.” — Luka 2:10-14.

Etyi onoandyu mbapita, ovanthita avelipopila poyavo okuti: “Tuendei ko Mbelei, tukatale etyi tyamoneka-ko, etyi Siovaa etupopila.” (Luka 2:15) Avaende iya avavasi umwe olukembe Sesusi oku onoandyu mbevepopila. Ovanthita avapopila ovanthu aveho etyi vapopilwa no noandyu, iya aveho avahuvu unene. Maliya apake nawa atyiho tyapopiwa iya otyo etyisokolola momutima wae.

Ovanthu ovanyingi hono vati Sesusi watyitwa monthiki 25 ya Dezembro. Mahi ko Mbelei mohanyi ya Dezembro ombila iloka iya tupu kutenda unene. Ovikando vimwe mohanyi oyo, alo umwe ongandyi itoka. Momuvo oo wenima, ovanthita ankho kavapondola okukala konohambo kounthiki novipako viavo. Tupu, katyiyumbwa onthumbi okuti omutumini wo Loma watumine ovanthu vaende ovikambo ovilaale, okukelihonekesa momuvo wombila, ngwe ankho vemunumanena, kavemuhande-ale. Ovipuka ovio aviho vilekesa okuti, tyafuile Sesusi watyitwa mohanyi ya Outubro.