Etyi Sefetee Apopile

Ova Isilayeli vayekele-po okufenda Siovaa, avakafenda ono huku mbomatutu. Etyi ova Amoo veya okulwisa ova Isilayeli, ovika-huku viavo aviehevekwatesako. Ova Isilayeli vamwene ononkhumbi omanima omanyingi. Etyi vetyimona, avapopila Siovaa okuti: ‘Etyi twalinga katyaviukile. Mbambavo tuyovole-vo konondyale mbetu.’ Ova Isilayeli avahanye-po ovika-huku viavo avahimbika vali okufenda Siovaa. Siovaa kahandele vatwaleko nokumona ononkhumbi.

Siovaa aholovona omukwa-vita utiwa o Sefetee opo akalele komutwe ova Isilayeli vakalwise ova Amoo. Sefetee apopila Siovaa okuti: ‘Ine upakula ova Amoo pomavoko ange, una wamatumbuka tete kombundi yeumbo liange tyina ndyitunda kovilwa, makala wove.’ Siovaa weivile etyi Sefetee aitile, emukwatesako movilwa.

Etyi Sefetee akondoka keumbo, omunthu wotete wemuyakula omona wae omuhikwena, ankho enae vala aike. Ankho ukahi nokunyana otyo ahika opandelu. Pahe Sefetee malingi ñgeni? Ahinangela etyi apopile ati: ‘Tatiii, mona wange! Wateya omutima wange. Ndyina etyi napopila Siovaa. Nekupakula kwe opo ukaundape mekaka liae ko Silo.’ Omona apopila he okuti: ‘Tate, ine una etyi wapopila Siovaa, tyilinga. Mahi nkhele mandyende ndyikakale onohanyi onombali konomphunda nomapanga ange. Pahe andyeende nawa kekaka.’ Omona wa Sefetee aundapa mekaka liefendelo ononthiki ambuho ali nomwenyo. Omanima aeho omapanga ae ankho ekemutalela-po ko Silo.