Okuti Ukahi Nokulekesa Omunkhima Wa Jeova?
“Tulekesa omunkhima wa Jeova ngovilivandyelo.” —2 CORÍNTIOS 3:18.
OÑGENI MOKUMBULULA?
Namphila tuvakuankhali, oñgeni matunkhimaneka Jeova?
Oñgeni omalikuambelo etu nomaliongiyo etukuatesako okulekesa omunkhima wa Huku?
Oityi matyitukuatesako okutualako okunkhimaneka Jeova?
1, 2. Omokonda yatyi tyitavela ovanthu vahetekele ovituwa via Jeova?
MONKHALELO imwe ine onkhuavo, atuho tuelifwa no votate. Hamwe tueiviliale omunthu umwe upopila omukuendye okuti: ‘Welifua na tate yove,’ ine omuhikuena okuti ‘Ove unthyinangelesa me yove.’ Ovikando ovinyingi, ovana vahetekela etyi ovohe valinga. Iya onthue? Tupondola okuhetekela Tate yetu keulu, Jeova? Namphila katupondola okumumona, tupondola okunoñgonoka ovituwa viae oviwa pokulilongesa Ondaka yae nokusokolola kuetyi tutanga, nokutala ovipuka alinga, haunene etyi Omona wae Jesus Kristu apopia, nokualinga. (João 1:18; Romanos 1:20) Tyitavela okulekesa omunkhima wa Jeova.
2 Etyi Huku nkhele ehenetunge ovanthu, ankho utyii okuti ovo vapondola okulinga ehando liae, okuhetekela ovituwa viae, nokumunkhimaneka. (Tanga Gênesis 1:26, 27.) Mokonda Tuvakristau, tuhanda okuhetekela ovituwa via Huku yetu. Inkha tutyilinga, matukala nelao liokulekesa omunkhima wae, tyihatale komuhoko ine otyivala ine ontheto yetu. Mokonda yatyi? Omokonda “Huku utupu okapungulula, mahi, utavela kese munthu una onthilo nae nokulinga etyi tyaviuka, momalongo aeho.”—Atos 10:34, 35.
3. Oñgeni tulitehelela putyina tuumbila Jeova?
3 Ovakristau ovalembulwa valekesa omunkhima wa Jeova. Apostolu Paulu, nae omulembulwa wahoneka okuti: “Atuho novipala viahikululwa, tulekesa omunkhima wa Jeova ngovilivandyelo, okupilululwa opo tukale otyifuika tyae, menkhimano nenkhimano.” (2 Coríntios 3:18) Etyi omuuli Moisesi atunda Komphunda Sinai nomavai ahonekwa Ovitumino Ekwi, otyipala tyae ankho tyiliaima mokonda Jeova wapopia nae. (Êxodo 34:29, 30) Namphila ovipala vio Vakristau kaviliaima nga Moisesi, mahi vakala nehambu enene tyina vapopila vakuavo konthele ya Jeova, novituwa viae, nevangelo liae pala ovanthu. Ngovilivandyelo viokohale viahongwa nawa, ovalembulwa, no nongi ononkhuavo, valekesa omunkhima wa Jeova momuenyo wavo no movilinga viokuivisa. (2 Coríntios 4:1) Okuti ukahi nokulekesa omunkhima wa Jeova novituwa viove, nokuundapa apeho movilinga viokuivisa Ouhamba wa Huku?
TUHANDA OKULEKESA OMUNKHIMA WA JEOVA
4, 5. (a) Nga Paulu, ovilwa patyi tuna? (b) Oñgeni onkhali itukalesa?
4 Mokonda tuvaumbili va Jeova, tyotyili tuhanda okuhivilika nokunkhimaneka Omupakeko wetu muaviho tulinga. Mahi pamwe, etyi tuhanda okulinga hatyoko tulinga. Tupu, Paulu ankho una otyitateka ngotyo. (Tanga Romanos 7:21-25.) Oe wapopia nokuayandyuluka omokonda yatyi atuho tuna okulwa nomahando etu omavi, wati: “Ovanthu aveho ovakuankhali kavavasi omunkhima wa Huku.” (Romanos 3:23) Mokonda Andau walinga onkhali, ovanthu aveho vatyitilwa moupika wonkhali, ikahi ngatyina ohamba onkhalavi ivetumina.—Romanos 5:12; 6:12.
5 Onkhali oityi? Otyipuka tyimwe tyehelikuate novituwa via Jeova, nonondyila, novitumino, nehando liae. Onkhali inyona oupanga omunthu ena na Huku. Onkhali itutyilika okulekesa enkhimano lia Huku, ngatyina otyipuka tyilingisa omuyahi wonkhondyi okuponya. Ovikando vimwe, tulinga onkhali mokonda tuaholovona okuilinga. Ovikando ovikuavo tulinga onkhali mokonda tuaponya. (Números 15:27-31) Onkhali ina epondolo enene muonthue, nokutuyapula Komupakeko wetu. (Salmo 51:5; Isaías 59:2; Colossenses 1:21) Ovanthu ovanyingi vatyinda omuenyo monkhalelo imwe iveyapula ku Huku, moluotyo, vapumbwa omphitilo ongwa yokulekesa omunkhima wa Huku. Tyotyili, natyike tyinyona unene ovanthu tyipona onkhali.
6. Namphila tuvakuankhali, oñgeni tupondola okulekesa omunkhima wa Huku?
6 Namphila tuatyitwa nonkhali, Jeova “o Huku wava ekevelelo.” (Romanos 15:13) Etyi aava Jesus ngotyilikutila, Jeova waikula ondyila opo tuyovolwe konkhali. Mokonda yekolelo motyilikutila otyo, ‘katuvapika vali vonkhali,’ mahi tukahi monkhalelo ongwa yokulekesa omunkhima wa Jeova. (Romanos 5:19; 6:6; João 3:16) Inkha tutualako okukala omapanga a Huku, tupondola okukala nonthumbi yokuti metuyambe pahetyino iya komutwe atukapewa omuenyo uhapu uhena onkhali. Namphila nkhele tuvakuankhali, tuna elao enene liokutalwa na Huku ngovanthu valekesa omunkhima wae!
TULEKESEI OMUNKHIMA WA HUKU
7. Oityi tuna okuimbuka konthele yetu muene inkha tuhanda okulekesa omunkhima wa Huku?
7 Mokonda tuvakuankhali, atuho tulinga oviponyo. Inkha tuhanda okulekesa omunkhima wa Huku, tuesukisa okuimbuka okuti kese umwe una eyembelo liahaviukile. (2 Crônicas 6:36) Tuesukisa okutavela okuti tuna omayembelo okulinga onkhali, iya tuna okulwa nomayembelo oo, opo tutyivile okunkhimaneka Huku. Mongeleka, inkha tulinga onkhali yokutala omikanda no nosinema mbovanthu vahavalele, tuna okuimbuka okuti tuesukisa okuovola ovakulu vewaneno opo vetukuateseko. (Tiago 5:14, 15) Otyo otyipuka tyotete tuesukisa okulinga inkha tyilityili tuhanda okunkhimaneka Huku. Tuna okutala nawa apeho inkha tukahi nokutyinda omuenyo monkhalelo Jeova ahanda. (Provérbios 28:18; 1 Coríntios 10:12) Namphila tuna eyembelo liokulinga onkhali, tuhayekei otyo tyitutyilike okulekesa omunkhima wa Huku.
8. Namphila katuafuilepo, oityi tuesukisa okulinga?
8 Jesus oe vala omunthu walingile apeho etyi tyihambukiswa Huku, nokulekesa nawa-nawa omunkhima wa Huku. Namphila tuhafuilepo nga Jesus, tuesukisa okulinga ononkhono opo tumuhetekele. (1 Pedro 2:21) Jeova katale vala ononkhono tulinga opo tukule mopamphepo, mahi tupu utala ononkhono tulinga opo tumunkhimaneke, iya utuyamba.
9. Oñgeni Ombimbiliya itukuatesako okulekesa nawa omunkhima wa Huku?
9 Ombimbiliya itukuatesako okunoñgonoka oñgeni tupondola okulekesa nawa omunkhima wa Huku. Tuesukisa okulilongesa nawa Ombimbiliya nokusokolola kuetyi ipopia. (Salmo 1:1-3) Okutanga apeho Ovihonekwa matyitukuatesako okukala Ovakristau valongoka. (Tanga Tiago 1:22-25.) Etyi tulilongesa Mombimbiliya tyipameka ekolelo lietu, netokolo lietu liokulityilika onkhali, nokuhambukiswa Jeova.—Salmo 119:11, 47, 48.
10. Oñgeni omalikuambelo maetukuatesako okuumbila vali nawa Jeova?
10 Opo tulekese omunkhima wa Huku, tupu tuesukisa “okutualako okulikuambela.” (Romanos 12:12) Tuesukisa okulikuambela ku Jeova etukuateseko okumuumbila monkhalelo etavela. Tupondola okumuita ospilitu sandu, nekolelo, nononkhono opo tuanye omakengelelo, nounongo ‘wokuundapesa nawa ondaka yotyili.’ (2 Timóteo 2:15; Mateus 6:13; Lucas 11:13; 17:5) Ngetyi omona etei ku he, nonthue tutei ku Tate yetu, Jeova. Inkha tumuita etukuateseko okumuumbila vali nawa, tupondola okukala nonthumbi yokuti metyilingi. Tuhasokei okuti omalikuambelo etu maanumanesa Jeova! Moluotyo, tuhivilikei Jeova nomalikuambelo, nokumupandula, nokuovola ehongolelo liae haunene tyina tuvasiwa novitateka, nokuita etukuateseko okumuumbila monkhalelo inkhimaneka enyina liae likola.—Salmo 86:12; Tiago 1:5-7.
11. Oñgeni omaliongiyo etu etukuatesako okulekesa omunkhima wa Huku?
11 Huku waavela “omupika wekolelo nokualunguka” otyilinga tyokuyunga nawa onongi mbae mbakolela. (Mateus 24:45-47; Salmo 100:3) Omupika wekolelo uhanda okutukuatesako okulekesa omunkhima wa Jeova. Omaliongiyo etu etukuatesako okupilulula nawa ovituwa vietu opo tukale Ovakristau ovawa, ngetyi omutungi wovikutu anyika vali nawa otyikutu tyetu opo tufiwe. (Hebreus 10:24, 25) Moluotyo, tuesukisa okuhika liwa komaliongiyo. Inkha tukala notyituwa tyokuhika lietaka komaliongiyo, kamatupoloko esilivilo iya ovipuka vimwe vipondola okutulamba.
TUHETEKELEI HUKU
12. Oñgeni tupondola okuhetekela Huku?
12 Opo tulekese omunkhima wa Jeova, tuesukisa “okukala ovahetekeli va Huku.” (Efésios 5:1) Onkhalelo imwe yokuhetekela Jeova, okutala ovipuka ngetyi evitala. Inkha tulinga ovipuka ngetyi tuhanda, atuhalingi ngetyi Huku asoka, matulekesa okuti tutupu onthilo nae, atyituetela ovitateka. Mokonda tukahi mouye wa Satanasi Eliapu, tuna okulinga ononkhono opo tuyale etyi Jeova eyele, nokukala nohole netyi Jeova ehole. (Salmo 97:10; 1 João 5:19) Tuesukisa okukala nonthumbi yokuti onkhalelo ike vala yaviuka yokuumbila Huku okulinga ovipuka aviho pala okumunkhimaneka.—Tanga 1 Coríntios 10:31.
13. Oityi tuesukisila okuyala onkhali? Oityi matulingi inkha tuyala onkhali?
13 Jeova uyele onkhali, nonthue tuesukisa okuiyala. Inkha tuyala onkhali matukalela kokule na kese tyimwe tyipondola okutulingisa onkhali. Mongeleka, tuna okuliyunga ku vana vayapuka motyili, mokonda ovanthu ovo kavahande okunkhimaneka Huku. (Deuteronômio 13:6-9) Moluotyo, tuesukisa okulityilika vana vayapuka motyili ine umwe upopia okuti omukuatate mahi utupu onthilo na Huku. Tuesukisa okutyilinga alo umwe inkha ombunga yetu. (1 Coríntios 5:11) Katupoloko natyike otyiwa tyina tuovola okulekesa okuti vana vayapuka motyili ine vana vapopia omapita eongano lia Jeova, kavapopi otyili. Tyotyili, tuhaovolei okunoñgonoka etyi vapopia, tyilinge momikanda viavo ine mo Internete, mokonda otyo tyipondola okunyona oupanga wetu na Jeova.—Tanga Isaías 5:20; Mateus 7:6.
14. Onkhalelo patyi yakolela yokuhetekela Jeova? Omokonda yatyi?
14 Okulekesa ohole onkhalelo imwe yakolela yokuhetekela Jeova. (1 João 4:16-19) Tyotyili, ohole tuna navakuetu ituimbukisa okuti tuvalongwa va Jesus novaumbili va Jeova. (João 13:34, 35) Mokonda tuvakuankhali, pamwe katyapepukile okukala nohole. Mahi tuesukisa okulinga ononkhono mbokulekesa apeho okuti tuna ohole. Okukala nohole, novituwa ovikuavo Vioukristau, matyitutyilika onkhali novipuka ovikuavo ovivi.—2 Pedro 1:5-7.
15. Inkha tuhole vakuetu oñgeni matuvetekula?
15 Ohole itulunda okulingila vakuetu ovipuka oviwa. (Romanos 13:8-10) Mongeleka, okukala nohole nou tuelinepa nae matyitutyilika okumulavisa. Inkha tuhole ovakulu vewaneno, nokuhumba ovilinga viavo, matutavela, nokulinga etyi vetutolela. Ovana vehole ovohe vetavela, nokuvehumba, nokuhevepopi omapita. Inkha tuhole vakuetu, kamatuvetale ngatyina ovatutu vali tyipona onthue ine okupopia navo tyehena onthilo. (Tiago 3:9) Iya ovakulu vewaneno vehole onongi mba Huku, mavembutekula nonkhenda.—Atos 20:28, 29.
16. Oñgeni ohole itukuatesako movilinga viokuivisa?
16 Tupu tuesukisa okulekesa ohole movilinga viokuivisa. Mokonda ohole yetu na Jeova onene, kamatusoyo tyina ovanthu vehetutehelela ine kavesukile. Mahi, matutualako okuivisa onondaka onongwa Mbouhamba, nokulipongiya nawa nokulinga ononkhono opo tukale ovalongesi ovawa Vondaka ya Huku. Inkha tyilityili tuhole Huku, novanthu, kamatuivisa vala mokonda tuetyitumwa. Mahi, matutale ovilinga ovio ngelao enene, nokuvilinga nehambu.—Mateus 10:7.
TUALAKO OKUNKHIMANEKA JEOVA
17. Mokonda tutyii okuti onkhali itutyilika okulekesa omunkhima wa Huku, oityi tuesukisa okulinga?
17 Ovanthu ovanyingi mouye kavaimbuka okuti onkhali otyipuka tyimwe tyinyona. Mahi onthue tutyii. Moluotyo, tuesukisa okulwa neyembelo lietu liokulinga onkhali. Tutyii okuti tuesukisa okulongesa omutima wetu opo utukuateseko okulinga etyi tyaviuka tyina tuhimbika okupeleya otyivi. (Romanos 7:22, 23) Tyotyili, tuvakuankhali, mahi Huku upondola okutupameka opo tulinge apeho etyi tyaviuka.—2 Coríntios 12:10.
18, 19. (a) Oityi matyitukuatesako okufinda ovilwa tuna na Satanasi novilulu viae? (b) Tuesukisa okutokola okulinga tyi?
18 Mokonda tuhanda okunkhimaneka Jeova, tuna okulwa na Satanasi novilulu viae. Matufindi ovilwa ovio nombatelo “yovimaneko via Huku.” (Efésios 6:11-13) Satanasi tyihatalama wovola okuvaka enkhimano liatokala vala Jeova. Tupu, Eliapu lilinga ononkhono opo linyone oupanga wetu na Jeova. Mahi, tumufinda tyina onthue, novanthu ovakuavo ovanyingi ovakuankhali ovalume, novakai, novana vatualako okukolela, nokunkhimaneka Huku. Ngotyo, tutualeiko okuhivilika Jeova, ngo noandyu keulu mbati: “Jeova, Huku yetu, ove vala watokala okupewa enkhimano nehumbilo noutumini, mokonda ove watunga ovipuka aviho. Tyetyi viatungwa nokukahiko mokonda yehando liove.”—Revelação 4:11.
19 Apeho tukalei nehando enene liokutualako okunkhimaneka Jeova. Oe uhambukwa unene tyina atala ovaumbili vae ovanyingi valinga ononkhono mbokumuhetekela, nokulekesa omunkhima wae. (Provérbios 27:11) Tuesukisa okulitehelela nga David, waimba okuti: “Mandyihivilika enyina liove omuvo auho.” (Salmo 86:12) Apa katutu, ovanthu vokutavela mavetyivili okulekesa nawa-nawa omunkhima wa Jeova, nokumuhivilika apeho. Omuvo oo, maukakala omuwa unene. Okuti ukahi nokulekesa omunkhima wa Jeova Huku pahetyino, nekevelelo liokuketyilinga apeho?
[Olutalatu pefo 30]
Okuti ukahi nokulekesa omunkhima wa Jeova mononkhalelo ombu?