OSAPI YO KONDYE | OÑGENI HUKU ATALA OVITA?
Oñgeni Huku Atala Ovita?
Oñgeni ove mokumbulula epulo olio? Ovanthu ovanyingi vasoka okuti Huku uhole ovita. Vapopia okuti kohale ankho utuma ovaumbili vae okuenda kovita. Ombimbiliya otyo ipopia. Mahi ovakuavo, vaimbuka okuti Jesus Omona wa Huku, walongesile ovalanduli vae okuti vena okukala nohole no nondyale mbavo. ( Mateus 5:43, 44) Ngotyo, vasoka okuti onkhalelo ankho Huku atala ovita yapiluluka, hono kapande vali ovita.
Ove oityi usoka? Okuti Huku uhole ovita? Inkha uvihole, iya movilwa oe ukala konthele ya valie? Okuvasa omakumbululo omapulo oo, matyikukuatesako okutala nawa oñgeni ove utala ovita, netyi usoka konthele yavio. Mongeleka, inkha utyii okuti Huku uhole ovita, tupu ukuatesako vana vekahi konthele yove movilwa, mohambukwa mokonda mosoko okuti ove wahula konthele yaviuka. Tupu, mokala nonthumbi yokuti mamufindi. Mahi, inkha wiimbuka okuti Huku ukahi nokukuatesako onondyale mulwa nambo, mokala ñgeni? Mosoko nawa inkha ove ukahi umwe konthele yaviuka movilwa ovio.
Kuna otyipuka tyakolela unene tyikahi motyiponga. Okunoñgonoka oñgeni Huku atala ovita, tyipondola okupilulula etyi usoka konthele ya Huku. Inkha nove ukahi nokumona unene ononkhumbi mokonda yovita vilingwa novanthu, tyotyili wesukisa okunoñgonoka omakumbululo omapulo ati: Ngetyi vamwe vasoka, okuti Huku uhindila ovanthu okulinga ovita vieta ononkhumbi? Okuti kahande vana vamoneswa ononkhumbi novita ovio vakale nehambu?
Okunoñgonoka okuti omakumbululo Ombimbiliya elikalela unene nomalusoke oo aeho, matyikuhuvisa. Tupu, onkhalelo Huku atala ovita tunde kohale alo hono kayapilulukile. Tutalei etyi Ombimbiliya ipopia konthele yo ñgeni Huku ankho atala ovita kohale, no puetyi Jesus ankho eli pano pohi. Otyo matyitukuatesako okutala oñgeni Huku atala ovita hono, nokunoñgonoka inkha ovanthu komutwe mavakatuala-ko okulwa.