OSAPI YO KONDYE | OÑGENI HUKU ATALA OVITA?
Onkhalelo Huku Ankho Atala Ovita Pomuvo wo no Apostolu
Ovanthu ankho vekahi nokumoneswa emone. Ngetyi ankho tyilinga ovakuaukulu vavo, ova Judeu pomuvo wo no apostolu avelikuambela unene ku Huku, opo eveyovole mononkhumbi ankho vamoneswa Noutumini wo Roma. Iya aveivi ovanthu vapopia konthele ya Jesus. Okuti ankho oe Mesiya walaelue? Tyotyili, ovanyingi ankho “vakevela okuti omulume oo, oe mayovola ova Isilayeli” moupika wo Roma. (Lucas 24:21) Mahi kavayovolelwe. Iya menima 70 Pomuvo wa Kristu, omafualali o Roma ahanye-po o Jelusalei nondyuo ya Huku.
Omokonda yatyi? Oityi Huku ahaluililile-ko ova Judeu, ngetyi alingile kohale? Kevetumine vakalwe opo veliyovole moupika mokonda yatyi? Okuti onkhalelo Huku atala ovita yapiluluka? Au. Mahi, ova Judeu valingile epiluluko enene. Kavetavelele okuti Jesus Omona wa Huku, o Mesiya. (Atos 2:36) Moluotyo, elongo liavo aliho lianyona oupanga wakolela ankho lina na Huku.—Mateus 23:37, 38.
Huku kayovolele vali ova Judeu no Tyilongo tyavo Valaelwe. Tupu nalumwe vali Huku akuatesileko ova Judeu ni okuvetuma kovilwa. Ngetyi Jesus apopile, Huku wayeka-po okupanda elongo olio lio Isilayeli, ahimbika okupanda elongo ekuavo epe, liapopiwa mo Mbimbiliya okuti “Isilayeli ya Huku.” (Gálatas 6:16; Mateus 21:43) Ewaneno lio Vakristau valembulwa lialekesa okuti, olio o Isilayeli ya Huku. Pomuvo wo no apostolu, Ovakristau vapopilwa okuti: “Pahe onwe, onwe vanthu va Huku.”—1 Pedro 2:9, 10.
Mokonda ankho pahe Ovakristau votete “ovanthu va Huku,” okuti Huku weveluililile-ko opo eveyovole moupika wo Roma? Okuti wevetumine opo vakalwise onondyale mbavo? Au. Omokonda yatyi? Tyina Huku ankho atuma ovanthu vae vakalwise onondyale, ankho oe utokola onalupi ovita ovio vina okulingwa, ngetyi onthele yokualamba yalekesa. Huku kaluililile Ovakristau votete, tupu kevetumine kovita viouye. Tyimoneka nawa, okuti omuvo wo no apostolu, ankho hamuvo-ko wa Huku wokulua opo amaneko ovivi nononkhumbi.
Ngotyo, ngetyi tyalingile ovaumbili va Huku kohale, Ovakristau ovo pomuvo wo no apostolu, ankho vena okukevelela alo omuvo Huku meya okunyimako ovivi nononkhumbi. Iya putyina ankho vakevelela ku Huku, ankho kavapondola okutokola ovo muene okukaluisa onondyale mbavo. Jesus Kristu wetyiyandyulula nawa novipuka alongesa. Mongeleka, kahongolelele ovalongwa vae okuenda kovilwa, mahi wevepopilile okuti: “Tualeiko okukala nohole nonondyale mbenyi, nokuitila-ko vana vemumonesa ononkhumbi.” (Mateus 5:44) Etyi Jesus apopia okuti o Jelusalei maiya okuteyua-po nomafualali o Roma, kapopilile ovalongwa vae opo vapumphame iya avakevela okulwa. Mahi wevetumine vaye nkholo okutunda mo Jelusalei, iya avaende umwe nkholo.—Lucas 21:20, 21.
Tupu, kononkhono mba Huku apostolu Paulu wahoneka okuti: “Nonthyolwa, muhakondolelei nawike ovivi, . . . Mokonda tyahonekwa okuti: ‘Okukondolela ovanthu, otyilinga tyange, ame madyifete kese munthu,’ otyo tyapopia Jeova.” (Romanos 12:19) Paulu ankho upopia onondaka Huku apopile kohale, mbuvasiwa mu Levítico 19:18 na Deuteronômio 32:35. Ngetyi tyapopiwa monthele yokualamba, Huku kohale wakuatesile-ko ovanthu vae movilwa. Oyo onkhalelo imwe yokukondolela onondyale mbovanthu vae. Ngotyo, onondaka mba Paulu, mbulekesa okuti onkhalelo Huku atala ovita kayapilulukile. Pomuvo wo no apostolu, ovita ankho nkhele onkhalelo yaviuka ku Huku pala okuamena ovaumbili vae, nokumana-ko ononkhumbi novivi. Mahi, ngetyi alinga tunde kohale, Huku oe muene utokola onalupi ovita ovio vina okulingwa, no valie vena okukalwa movita ovio.
Tyayandyuluka nawa, okuti Huku kenetume nalumwe Ovakristau votete okukalwa. Iya hono? Okuti Huku una ovanthu ehole okutuma kovita hono? Okuti pahe omuvo wa Huku wokuluila-ko ovaumbili vae wehika-po? Oñgeni Huku atala ovita hono? Onthele yahulilila kononthele ombu, maikumbulula omapulo oo.