Onkhalelo Huku Atala Ovita Hono

Tete, ungumaneswa nonondaka ombu: Huku weete ononkhumbi mbovanthu ouye auho hono, iya una etyi asoka okulinga konthele yotyo. (Salmo 72:13, 14) Huku Mondaka yae Ombimbiliya, walaa okuti vana ‘vekahi nokumona ononkhumbi, mavakayovolwa.’ Onalupi? O pomuvo ‘wokuhololoka kwa Tatekulu Jesus keulu, kumwe no noandyu mbae mbononkhono ononene . . . mafete vana vehei Huku, na vana vehetavela onondaka onongwa konthele ya Tatekulu yetu Jesus.’ (2 Tessalonicenses 1:7, 8) Jesus makahololoka komutwe. Otyo, Ombimbiliya ityiihana okuti “ovita vionthiki onene ya Huku Wepondolo Aliho,” tupu vitiwa o Armagedom.—Revelação [Apocalipse] 16:14, 16.

Movita ovio maviya komutwe, Huku kamakatuma ovanthu. Mahi, makatuma Omona wae Jesus Kristu nono andyu ononkhuavo, opo vakalwise onondingavivi. Onoandyu ombo, mambukanyima-ko ononkhumbi ambuho.—Isaías 11:4; Revelação 19:11-16.

Hono, onkhalelo Huku atala ovita kayapilulukile. Ovita nkhele onkhalelo yaviuka pala okumanako ovivi nononkhumbi. Mahi, ngetyi alinga tunde kohale, Huku oe muene utokola onalupi ovita ovio vina okulingwa, no valie vena okukalwa movita ovio. Ngetyi tuetyimona-le, Huku watokola-le omuvo wovita mavimane-ko ovivi no nonkhumbi. Iya ou meya okulwa movita ovio Omona wae Jesus Kristu. Otyo, tyilekesa okuti ovita vikahi nokulingwa hono pano pohi, kaviapandelwe na Huku, namphila vamwe vasoka okuti viaviuka.

Tala ongeleka: Soka ñgeno, ovakuendye vevali velikwai vekahi nokulwa, putyina he yavo ehepo. Konyima avayeke-po nkhele okulwa, avaihana he kotelefone. Umwe ati oe wahimbika okunduisa, mukuavo ati ame oe wandeva. Aveho veliyava ku he yavo, iya kese umwe akevelela opo emukuateseko motyitateka otyo. Tyina he amatehelela kese umwe, evepopila opo vahalwe vali, aiti vemukevele tyina ameya, opo atetulule otyitateka otyo. Mahi pakala vala katutu avahimbika vali okulwa. Tyina he yavo amehiki meumbo, kamahambukwa nomona nawike, mevevete aveho mokonda kavetavelele etyi evepopila.

Hono, ovilongo viokulilwisa, apeho viita ku Huku opo evekuateseko. Mahi hono Huku kekahi konthele naike movita. Mondaka yae Ombimbiliya oe wapopia nawa okuti: “Muhakondolelei nawike otyivi notyivi,” tupu ‘Muhafetei nawike ovivi mokonda yovivi emulinga.’ (Romanos 12:17, 19) Huku ukahi nokupopila ovanthu okuti vesukisa “okukevela noumphua-lundo kwe” etyi meya okulinga mo Armagedom. (Salmo 37:7) Mahi ovanthu vovilongo kavetavela okukevelela Huku eye okutetulula ovitateka, vatokola ovo muene okulilwisa. Iya otyo, tyinumanesa Huku mokonda kwe omalityindailo. Ngotyo, mo Armagedon Huku makatetulula ovitateka vilwisa ovanthu, avihakakala-ko vali. Mokonda “makamana-ko ovita alo kuna kuaoyela oohi.” (Salmo 46:9; Isaías 34:2) Moluotyo, o Armagedom ovita mavikamana-ko ovilwa aviho.

Tyimwe povipuka ovinyingi oviwa mavikalingwa Nouhamba wa Huku, okunyima-ko ovita. Jesus wapopile konthele youtumini oo, melikuambelo eli liiwe nawa liati: “Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:10) Ouhamba wa Huku maukanyima-ko ovita, novipuka ovivi vieta ovita.a (Salmo 37:9, 10, 14, 15) Moluotyo, ovalanduli va Jesus vakevelela nombili ovipuka oviwa mavikalingwa Nouhamba wa Huku.—2 Pedro 3:13.

Matukevelela alo nalupi, opo Ouhamba wa Huku uye okumana-ko ovivi aviho no nonkhumbi? Omaulo Ombimbiliya ekahi nokufuiswapo, alekesa okuti tukahi “kononthiki mbahulilila-ko” mbouye uno. (2 Timóteo 3:1-5)b Apa katutu, Ouhamba wa Huku mauweta ovita vio Armagedon, pala okumanuhula ononthiki mbahulilila.

Ngetyi wamona konthyimbi, vana mavakankhia movita viahulilila-ko, o vokuhahande “okutavela onondaka onongwa konthele ya Tatekulu yetu Jesus.” (2 Tessalonicenses 1:8) Mahi hinangela okuti, Huku kahambukwa nononkhia mbomunthu nawike, alo umwe onondingavivi. (Ezequiel 33:11) Mokonda ‘oe kahande omunthu nawike aipawe’ movita viahulilila-ko, pahe ukahi nokutuma opo onondaka onongwa konthele ya Tatekulu yetu Jesus, “mbuiviswe kombanda yohi aiho, pala oumbangi movilongo aviho” putyina onthyulilo nkhele iheneye. (2 Pedro 3:8, 9; Mateus 24:14; 1 Timóteo 2:3, 4) Tyotyili, mokonda yovilinga viokuivisa vilingwa no Nombangi mba Jeova, ovanthu hono vekahi nokupewa omphitilo yokunoñgonoka Huku, nokutavela onondaka onongwa konthele ya Jesus. Ngotyo, mavakakala nomuenyo, iya avakatala etyi ovita mavikapwa-ko.