“Opo Huku Ankho Uli-pi?”

TYINA PAMAMONEKA OTYIPONGA, HAMWE UHOLE OKULIPULA OKUTI, ‘OPO HUKU ANKHO ULI-PI?’ INE HAMWE NO OVE WAKALELE NOTYITATEKA TYIMWE OTYINENE OLIPULU INKHA HUKU WESUKA UMWE NO OVE?

Hamwe ulitehelela nga Sheila ukala ko Estados Unidos. Wekulila mombunga ihole okuenda kokapela. Ngwe wati: “Tunde pouna, ankho ndyihole Huku mokonda oe Mutungi wetu. Mahi ankho hilitehelela okuti wesuka na ame. Ankho ndyisoka okuti unthala vala mahi otyo ngwe eli kokule. Ankho hisoko okuti Huku undyele. Mahi tupu ankho hitavela okuti ngwe unthyole.” Omokonda yatyi Sheila akalela nomalusoke oo? Sheila wati: “Ombunga yange yali novitateka ovinyingi vielilandaula, iya ngoti ankho kekahiko nokutukuatesako.”

Nga Sheila, no ove utavela okuti kouye kuna Huku Omukulami. Mahi, tyipondola uhole okulipula inkha tyili-tyili Huku wesuka no ove. Ombimbiliya ipopia okuti kuali omulume umwe omuviuki ankho utiwa Job. Nae wakalele nomalusoke oo, mahi ngwe ankho una onthumbi yokuti Omutungi wetu una epondolo iya omunongo. (Jó 2:3; 9:4) Konyima yetyi Job alambela movitateka vielilandaula, otyo pahamoneka natyike tyimukuatesako, apulu Huku okuti: “Omokonda yatyi uholekela otyipala tyove kuaame iya onthale ngondyale yove?”—Jó 13:24.

Oityi Ombimbiliya ipopia? O Huku tuna okuvela onombei tyina pamamoneka otyitateka? Okuti pena ovipuka vimwe vilekesa okuti wesuka novanthu? Okuti tulitehelela okuti ngwe utuluete, utunoñgonoka, ine utukuatesako tyina pamoneka ovitateka?

Mononthele mambulandulako, matutale inkha tyili Huku wesuka nonthue, okutalela kovipuka atunga. (Romanos 1:20) Konyima, atutale inkha Ombimbiliya ipopia okuti Huku wesuka nonthue. Tyina “tumunoñgonoka” vali nawa pokati kovipuka atunga, no pokati ko Mbimbiliya, matyikukalesa nonthumbi yokuti “ngwe wesuka no ove.”—1 João 2:3; 1 Pedro 5:7.