Hinangela Ofeto Yeyovo Nolupandu
1, 2. Omokonda yatyi tuna okuhinangela ofeto yeyovo nolupandu?
1 Mokonda yokutavela kotyitumino tya Jesus, Ovakristau mouye auho maveliongiya monthiki 22, ya Tyitalale yo 2008 Motyasapalo putyina ekumbi liamanyingila, pala okuhinangela ononkhia mba Jesus Kristu. (Lucas 22:19; 1 Coríntios 11:23-26) Onthue tuesuka unene nokuhinangela onthiki oyo mokonda yolupandu olunene tuna novipuka aviho vialingwa monthiki oyo, omanima 1.975 konyima. Mokonda Jesus watuaileko nekolelo namphila amonesilwe ononkhumbi nokuapapelwa momuti, wahilivika enyina lia Tate yae, nokuavela ekumbululo liakolela ku Satanasi walingile omukuele.—Jó 1:11; Provérbios 27:11.
2 Ohonde Jesus amomesa yapameka omphangu omphe, okuikula ondyila opo ovanthu ovakuankhali vetavelwe ngo vana va Huku, nokukala nekevelelo liokukatumina na kristu Kouhamba wae wo keulu. (Jeremias 31:31-34; Marcos 14:24) Tupu, ohole onene Jeova ena novanthu yalekeswa nawa etyi aava Omona wae onthyolwa ngo tyilikutila, ngetyi Jesus muene apopilile Nicodemu.—João 3:16.
3. Vana mavakala Pehinangelo Liononkhia mba Tatekulu, mavapolopo esilivilo patyi?
3 Konga Vakuenyi: Ovilinga Vietu Viouhamba via Kupupu vietupopila opo tuhoneke popapelo omanyina ovanthu vana tuhanda okukonga. Okuti ove wahimbikale okukonga aveho vana wahoneka popapelo yove? Okuti ove ukahi nokulipongiya opo uundape movilinga ovio viokukonga mavihimbika monthiki ya 1 ya Tyitalale pala okukonga ovanthu veye Kehinangelo Liononkhia mba Tatekulu? Vana mavakalapo, mavatehelela onotestu mbo Mbimbiliya mambupameka ekolelo mofeto yeyovo, ituala komuenyo wahapu.—Romanos 10:17.
4. Omokonda yatyi tyesukisa okuhika tete pomphangu mapalingilwa Ehinangelo Liononkhia mba Tatekulu?
4 Atuho tuna okulinga ononkhono pala okuhika tete pomphangu mapalingilwa Ehinangelo, opo tukukunye nokuliepesa aveho veya keliongiyo olio liakolela. Mokonda Pehinangelo olio mapakala ovanthu ovanyingi, tyakolela tusukalale vali unene novape, na vana vehole okuiya vala ovikando vimue komaliongiyo.
5. Oñgeni ove mopongiya omutima wove pala Ehinangelo Liononkhia mba Tatekulu?
5 Pongiya Omutima Wove: Mokamukanda Examine as Escrituras Diariamente yo 2008 nomo Calendário ko 2008, muna onotestu mbo Mbimbiliya mbuna okutangua pala Ehinangelo okuhimbikila monthiki 17 ya Tyitalale. Okutanga onotestu ombo mbupopia ovipuka viakolela viapitile momuenyo wa Jesus mononthiki mba hulililako mbomuenyo wae pano pohi, matyitukuatesako okupongiya omutima wetu pala Ehinangelo Liononkhia mba Tatekuku. (Esdras 7:10) Okulikuambela nokusokolola nawa komahipululo oo Ombimbiliya, matyiyawisa olupandu luove kohole ya Jeova no Mona wae mokuaava ofeto yeyovo.—Salmo 143:5.
6. Inkha tulinga ononkhono pala okupanda ofeto yeyovo matyituavela Ouwa patyi?
6 Putyina ehinangelo likahi popepi, lipongiya nawa, nokukuatesako vakuenyi opo navo velipongiye pala onthiki oyo yakolela unene. Okuhinangela ofeto yeyovo nolupandu matyipameka oupanga wetu na Jeova no Mona wae. (2 Coríntios 5:14, 15) Tupu matyituavela ondundo pala okuvehetekela mokukala nohole navakuetu.—1 João 4:11.