Oñgeni Matukumbulula?
1. Omokonda yatyi tuesukisa okuhetekela ongeleka ya Jesus tyina tulingwa omapulo?
1 Mononthiki mbuno, ovanthu vahuva nonkhalelo ongwa omu Jesus ankho akumbulula ovanthu vemulinga omapulo. Tyina tulingwa omapulo omanyingi movilinga viokuivisa, tuesukisa okuhetekela ongeleka ya Jesus.—1 Ped. 2:21.
2. Oityi matyitukuatesako okukumbulula omapulo nounongo?
2 Tete Tehelela: Jesus ankho usoka omokonda yatyi omunthu ekahi nokumulinga epulo. Ovikando vimue, ankho tyesukisa okulinga omapulo opo atale oityi omunthu tyili ekahi nokusoka. Ovanthu vamue vapondola okupula, “Ove utavela ku Jesus?” mahi, hamwe vahanda okunoñgonoka omokonda yatyi uhalingi otyipito tyo Natale. Inkha ove utala okuti omunthu wokuapula tyotyili uhanda umwe okunoñgonoka ekumbululo, upondola okumuvatela opo etyinoñgonoke nawa.—Luc. 10:25-37.
3. Oityi matyitukuatesako okuvasa omakumbululo aviuka Movihonekwa?
3 Undapesa Ondaka ya Huku Pala Okukumbulula: Otyiwa okuundapesa Ombimbiliya yove pala okukumbulula epulo. (2 Tim. 3:16, 17; Heb. 4:12) Omukanda Raciocínio, nono “Tópicos Bíblicos para Palestrar,” mbuvasiwa mo Tradução do Novo Mundo das Escrituras Sagradas, mbutuvatela okuava ekumbululo liaviuka. Inkha omunthu walinga epulo ketavela ko Mbimbiliya, upondola okukala tyafuapo pala okupopia etyi Ovihonekwa vilongesa. Avela ondundo omunthu opo akale nesuko liotyotyili kounongo uvasiwa Mombimbiliya. Inkha uhetekela Jesus, omakumbululo ove maakala omawa, nokuna esilivilo, nokupameka “ngatyina omamaçã oolu pomalonga opalata.” —Pro. 25:11.
4. Omokonda yatyi katuesukisile okukumbulula kese epulo tulingwa?
4 Okuti Tuesukisa Okukumbulula Omapulo Aeho? Inkha walingua epulo uhevili okukumbulula, uhakale nohonyi yokupopia okuti: “Hanoñgonokele nawa ekumbululo liepulo liove, mahi mandyikaovola andyikondoka nekumbululo.” Okulekesa esuko olio komunthu, matyimuavela ondundo yokukukonga opo uye okumutalelapo vali. Inkha utala okuti epulo liatunda konondyale vaovola okutañguna, hetekela Jesus mokuhapopi unene. (Luc. 20:1-8) Tupu, inkha vamue vehena esuko enene notyili vaovola okutañguna nove, uhatualeko vali nokutomphola navo, mahi, undapesa omuvo wove pala okuovola vana vena esuko liotyotyili.—Mat. 7:6.
5. Ongeleka patyi Jesus etuavela konthele yokukumbulula omapulo?
5 Jesus ankho utyii okuti okuyumba onthumbi mu Jeova, tyakolela pala okufuisapo otyilinga tyae “tyokuava oumbangi konthele yotyili,” nokukumbulula omapulo ovanthu ankho vahanda umue okunoñgonoka otyili. (João 18:37) Tuna elao enene liokuhetekela Jesus mokukumbulula vana “vahanda omuenyo wahapu!”—Atos 13:48.