Ononthiki Ononthatu Matupamekwa Mopaspilitu
1. Oñgeni matupoloko ouwa kotyonge tyononthiki ononthatu tyenima lino?
1 Mouye uno wepuiya wa Satanasi, Jeova utualako okupameka ovaumbili vae. (Isa. 58:11) Otyipuka Jeova aundapesa pala okutupameka otyonge tyononthiki ononthatu. Mokonda otyonge tyenima lino tyikahi popepi, oñgeni matulipongiya opo tupamekwe mopaspilitu?—Pro. 21:5.
2. Epongiyo patyi tuesukisa okulinga?
2 Inkha nkhele kunelipongiye, linga oprograma yove opo ukaite kovilinga ukale potyonge otyo ononthiki ambuho ononthatu. Wasokale omuwo wesukisa opo uhike liwa pomphangu yotyonge kese nthiki opo utyivile okuvasa ovipundi tyina otyonge nkhele tyihenehimbike? Tyotyili, katuhande okupumbwa okulia kuopaspilitu kupameka Jeova etupongiyila! (Isa. 65:13, 14) Welipongiyale oñgeni muende kotyonge no pomphangu apa mokakala?
3. Onondonga patyi mbupondola okukukuatesako ove nombunga yove okupola esilivilo motyonge?
3 Oityi matyikukuatesako okutehelela nawa mokueenda kuotyonge? Inkha tyitavela, mononthiki mbotyonge uhalangalepo lietaka. Tala komulongomoni. Landula onotestu Mombimbiliya yove. Honeka ononthele wesukisa okuhinangela. Onombunga mbupumphame kumwe opo vakuateseko ovana vavo okutehelela nawa. (Pro. 29:15) Ove upondola okutomphola ononthele mbakolela vali mbotyonge kokangulohi nombunga. Opo ombunga yove itualeko tyapama tyina otyonge tyamapu, mupondola okuovola omuwo mokueenda Kuelilongeso Liombimbiliya Mombunga opo mupopie ononthele ombunga yove yesukisa okuundapesa.
4. Oñgeni tupondola okukuatesako vakuetu mewaneno lietu opo vapamekue mopaspilitu?
4 Kuatesako Vakuenyi Okukala Tyapama: Onthue tuhanda vakuetu navo vapamekue mopaspilitu. Pena ovaivisi vakulupa ine ovakuavo mewaneno vesukisa okukuatehiwako opo vaye kotyonge? Upondola okuvekuatesako? (1 João 3:17, 18) Ovakulu vewaneno, haunene vo grupu, vesukisa okutala inkha ovaivisi ovo vekahi nokuvatelwa.
5. Oñgeni matuave okamukanda kokukonga pala otyonge tyononthiki ononthatu? (Tupu tala okakasa pombanda.)
5 Ngetyi tuhole okulinga, tyina kuakamba onosimano ononthatu matuave okamukanda kokukonga ovanthu opo vaye kotyonge. Omawaneno esukisa okulipongiya opo vaundape motelitoliu aiho okuava oumukanda wavo auho. Inkha ombunga yove konthyulilo yonosimano ombo yahupisa oumukanda, weetelela kotyonge opo ukonge vana wavela oumbangi. Oumukanda ombunga yove yahupisapo waavela ovakuatate valekesa ovanthu povipundi tyina unyingila momphangu yotyonge Mutano. Onondonga konthele youmukanda oo mambuawa motyonge. Sapo okamukanda keke pala ove, mokonda mokesukisa pala okupopia konthele yelongomona liahulililako Tyalumingu.
6. Omononkhalelo patyi tupondola okulekesa ovituwa oviwa motyonge?
6 Ovituwa Oviwa Vipameka: Momuwo uno omu ovanthu ovanyingi “velihole ovo muene” nokuhena onthilo netyi vakuavo vasoka, tyitupameka unene okukala kumwe novakuatate valinga ononkhono mbokulekesa ovituwa oviwa! (2 Tim. 3:2) Tulekesa ovituwa oviwa tyina tunyingila pomphangu yotyonge monkhalelo yahiliya nokuaongana nokupakela vala onomphangu ovanthu vana tuendela navo metuku-tuku like ine vana tukala navo meumbo like, ine vana tukahi nokulongesa Ombimbiliya. Tulandulei onondonga mbomuhongoli wotyonge tyina ametuiti tupumphame ponomphangu mbetu opo tutehelele otyiimbo matyihimbika okuhika. Tulekesa okuti tuna ovituwa oviwa tyina tuika otelefone yetu, opo ihavielele vakuetu vekahi nokutehelela. Tupu tulekesa okuti tuna ovituwa oviwa tyina tulityilika okutomphola, nokutuma onondaka monotelefone, nokulia, ine okuenda-enda momivanda mokueenda kuo programa.
7. Oñgeni tupondola okupamekwa nokupameka ovakuatate vetu?
7 Oupanga Upameka: Ovionge vituavela onomphitilo ononyingi pala okulipameka nokuliwaneka novakuatate vakuetu ouye auho. (Sal. 133:1-3) Omokonda yatyi uhahimbikila “okulihandyula” novakuatate nonomphange vomawaneno omakuavo? (2 Cor. 6:13) Upondola okulinga ononkhono pala okunoñgonoka omunthu umwe ine ombunga kese nthiki. Omuwo wokuombapo omphitilo ongwa pala okutyilinga. Moluotyo, etelela okulia kuove opo ulie nokutomphola navakuenyi tyipona okuenda okukalila kombale. Otyo tyeta ononkhano onongwa noupanga wahapu.
8. Omokonda yatyi tuesukisila okuliava opo tuundape motyonge, iya oñgeni matutyilingi?
8 Tyitupameka unene okuundapela kumwe novakuatate vetu movilinga tulingila Huku! Upondola okuliava opo ukuateseko ewaneno liove movilinga viokusukukisa omphangu yotyonge? (Sal. 110:3) Inkha nkhele kuneundape movilinga ovio, enda Koseketa Yokulipakula Pala Okuvatela Ovilinga viotyonge. Ovanthu ovanyingi valinga ovilinga oviwa vihambukiswa.
9. Omokonda yatyi tyesukisa okutala nawa ovituwa vietu nonkhalelo yetu yokuvala mokueenda kuotyonge?
9 Ovituwa Vietu Vipameka Vana Vetutala: Ononthiki ambuho ononthatu tulekesei okuti tueya kotyonge, hamokueenda vala kuo programa. Vana vetutala tyina tukahi mepundaumbo liotyonge vesukisa okutala okuti tuelikalela navana vehe-Nombangi mba Jeova. (1 Ped. 2:12) Onkhalelo yetu yokuvala mepundaumbo liotyonge, meumbo tuehikila, nomombale ina okunkhimaneka Jeova. (1 Tim. 2:9, 10) Inkha tuvala ovikalatau vietu matyivatela vana vetutala okunoñgonoka okuti onthue Tunombangi mba Jeova. Iya otyo tyipondola okutuavela omphitilo yokuvetolela konthele yotyonge tyetu nokuava oumbangi.
10. Ongeleka patyi ilekesa okuti ovituwa vietu viava oumbangi ouwa?
10 Ovituwa vietu oviwa mokueenda kuotyonge vikalesa ñgeni vakuetu? Ngetyi tyapopia o jornale imwe, omulume umwe utumina pomphangu palingilwa otyonge wati: “Ovanthu vena unene onthilo. Tuahambukua okukala navo kese enima.” Enima liokualamba omulume umwe uhe-Mbangi ya Jeova wavombesa otyipapo tyae mo hotele ankho muna ovanthu veya kotyonge. Etyi otyipapo tyakondolua komutumini wo hotele novipuka aviho ankho vikahimo, omutumini watolela muene wotyipapo okuti: “Una elao mokonda Onombangi mba Jeova vena otyonge tyavo popepi iya mo hotele ankho mueyula Onombangi. Ñgeno kuakondolelue otyipapo tyove.”
11. Mokonda otyonge tyikahi popepi, oityi tuna okulinga, iya omokonda yatyi?
11 Ovionge vienima lino vikahi popepi. Kualingwa ononkhono ononyingi opo otyonge tyikale omuwo wepameko. Linga ononkhono opo ukalepo ononthiki ambuho ononthatu, nokulipongiya opo utale etyi Jeova neongano liae vekupakela. Tokola okupameka vakuenyi novituwa viove oviwa noupanga uhambukiswa. Ngotyo, ove navakuenyi mamulitehelela ngomukai umwe weile kotyonge enima liokualamba wahoneka okuti: “Nakala nehambu limwe enene!”
[Onondaka Mbavilapo pefo 4]
Ngetyi tuhole okulinga, tyina kuakamba onosimano ononthatu matuave okamukanda kokukonga ovanthu opo vaye kotyonge
[Onondaka Mbavilapo pefo 6]
Onkhalelo yetu yokuvala mepundaumbo liotyonge, meumbo tuehikila, nomombale ina okunkhimaneka Jeova
[Onondaka Mbavilapo pefo 7]
Tokola okupameka vakuenyi novituwa viove oviwa noupanga uhambukiswa
[Onondaka Mbavilapo pefo 4-7]
Omahinangeleso Otyonge Tyononthiki Ononthatu Tyo 2011
◼ Oola Otyonge Matyihimbika: Mononthiki ambuho ononthatu otyonge matyihimbika 8h20. Omapito maaikulwa 6h00. Putyina otyiimbo tyamahimbika okuhika, atuho tuna okuenda ponomphangu mbetu, opo otyonge tyihimbike monkhalelo yaongana. Mutano, no Tyasapalo otyonge matyimanuhuka 15h55 iya Tyalumingu tyimanuhuka 14h40.
◼ Apa Patalamena Omatuku-tuku: Ponomphangu ambuho mapatalamena omatuku-tuku avana maveya kotyonge kambufetelwa, mahi omatuku-tuku ena okukalela omu ehikila. Nawike upondola okupaka etuku-tuku pomphangu papakelua ovilema. Mokonda omphangu yokutalamena omatuku-tuku onthutu, muhaetei omatuku-tuku omanyingi, ombunga ike ipondola vala okueta etuku-tuku like inkha vafuamo aveho.
◼ Okupakela Vakuetu Onomphangu: Tupondola vala okupakela onomphangu ovanthu vana tuendela navo metuku-tuku like ine ovovana tukala navo meumbo like, navana tukahi nokulongesa Ombimbiliya.—1 Cor. 13:5.
◼ Okulia: Mbambavo etelelela okulia kuove, opo uhatunde pomphangu yotyonge pala okukalanda okulia mokueenda kuomuvo wokuomba. Upondola okutyinda okulia kuove mosaku onthutu itavela okupaka mombuelo yotyipundi tyove. Onosaku ononene, novipuka vityatyuka, novikunwa vikoleswa, kavipondola okutualwa pomphangu yotyonge. Mahi, mutavelwa vala omapindi onongasosa alandeswa potyonge.
◼ Oviawa Viotyali: Tupondola okulekesa olupandu luetu mokuava onombongo motyonge pala okuvatela ovilinga via Huku mouye auho.
◼ Vana Vatumbukilwa Nouvela Ine Veliveta: Inkha motyonge umue utumbukilwa nouvela, akapopie nomukuatate umue wokulekesa ovanthu kovipundi. Omukuatate oo, akapopila liwa Oseketa Yokuvatela vana vavela, opo ovakuatate vokuundapa moseketa oyo veye okumuvatela.
◼ Ovihemba: Inkha ukahi nokunwa ovihemba, vietelela mokonda hamwe motyonge kamamukala ovihemba ovio.
◼ Ononkhaku: Kese enima kuhole okumoneka ovitateka ovinyingi mokonda yononkhaku. Tyaviuka okuvala ononkhaku mbukahi nawa pala okuenda, tyilinge metapalo ine omonosikata.
◼ Ovimpholo: Otyonge matyilingwa mo 19-21 ya Kuenye Kunene Kondyuo Yovionge ko Viana, matyipitiyua melaka liavana vahapopi, (Língua de Sinais).
◼ Outuku-tuku Wokutyinda Ovana: Katupondola okutuala outuku-tuku oo pomphangu yotyonge. Opo mutyivile okuyunga vali nawa ovana venyi, vaumphame ponthele yenyi. Elondolo eli o pala vana mavalingila ovionge ponomphangu mbokusana ombola.
◼ Omuniko: Ovionge ovinyingi vihole okulingilwa monondyuo mbaikwa iya opo mufile omphepo mupakwa ovifilamphepo (ventoinha) ine muna vala oundyanena oututu. Moluotyo, otyiwa okuhawave omilela vinika unene, no noperfume mbupondola okulinga omapita vana vavela monthulo, navakuavo vokuna ovitateka konthele yovipuka ovio.—1 Cor. 10:24.
◼ Ono Formulariu Queira Visitar: Tuna okuundapesa o formulariu Queira Visitar (S-43-T) pala okupopia konthele ya kese munthu tuaavela oumbangi mokueenda kuotyonge, iya alekesa esuko notyili. Ovaivisi vena okutyinda o formulariu ike ine onombali tyina vaya kotyonge. Inkha wahoneka pomikanda ovio, upondola okuviavela ovakuatate vaundapa mo Seketa Yomikanda, ine okuviavela omuhoneki weuaneno liove tyina wamatundu kotyonge.—Tala Movilinga Vietu Viouhamba ya Kuhuhu yo 2009, pefo 4.
◼ Vokuelipakula Pala Okuvatela Ovilinga Viotyonge: Ehambu matukala nalio tyina tukahi motyonge maliliyawisa inkha tulipakula pala okuvatela. (Atos 20:35) Kese umwe uhanda okuvatela motyonge aye Koseketa Yokulipakula Pala Okuvatela Ovilinga viotyonge. Ovana nkhele vehena omanima 16 navo vapondola okuvatela movilinga ovio, mahi vena okuundapa novohe ine omukulu omukuavo.
[Okakasa pefo 5]
Oñgeni Matuave Okamukanda Kokukonga?
Opo tuundape otelitoliu yetu aiho, katyesukisile okupopia unene. Tupondola okupopia vala ngetyi: “Okamene. Tukahi movilinga vimwe vikahi nokulingwa ouye auho pala okuava okamukanda aka. Kove okaka. Movasimo ononthele ononyingi.” Okamukanda aka kalingwa pala okuvatela ovanthu vena esuko, muavela okamukanda opo atale pefo liotete. Kala omundyandyi. Tyina tuundapa movilinga ovio mo Tyasapalo no Tyalumingu, tupu tuesukisa okuava Omutala Womulavi no Despertai! inkha tyitavela.