Ovituwa Vihivilika Huku
1. Omokonda yatyi Onombangi mba Jeova vaimbukwa tyina vekahi motyonge?
1 Tyina tuenda kotyonge tyononthiki ononthatu, tuimbukwa novanthu okuti tueya kotyonge. Movionge ovinyingi vilingua momapundaumbo omanene, ovanthu vetuimbuka onthwe valie. Mono hotele nomonombale pamwe muyula ovanthu vatunda kovilongo veya kotyonge, iya ovanthu ovanyingi vakala potyilongo otyo vatala ovaenda ovanyingi vapaka ovikalatau viotyonge kovikutu. Makulandula omahinangelo amwe maetukuatesako opo tuhivilike Huku mokukala novituwa oviwa mepundaumbo mamulinguilwa otyonge.—1 Ped. 2:12.
2. Oñgeni tupondola okuhivilika Huku pokuvala nawa mepundaumbo liotyonge?
2 Onkhalelo Yetu Yokuvala: Tyina tuvala nawa pokuenda kotyonge ovanthu vetupanda. Moluotyo, onkhalelo yetu yokuvala momivo omikuavo mo hotele, tyina tukalia monombale, na tyina tuenda kopalasa, no ponomphangu onokhuavo, vana vetutala vapondola okuhuva. Namphila katuesukisile okuvala ngatyina tukahi motyonge, mahi tuvala nonondunge, nonthilo, katuvale ovikutu viatona nokumonekela. Vana vetutala vapondola okumona okuti tuelikalela na vana vehelilongesa. (Rom. 12:2) Okuyawisako, okuvala ovikalatau viotyonge, matyilekesa okuti tuna otyonge, tupu matyave onomphitilo mbokuava oumbangi, nokuimbukwa navakuetu.
3. Oñgeni tupondola okulekesa oumphua-lundo nouwa?
3 Oumphwa-lundo Nonthilo: Momuwo uno ovanthu ovanyingi velihole ovo muene vokuhapandula, oñgeni ondundo yetu nokupwa elundo nonthilo mavieta ouwa pala vana vetutala, mono hotele nomonombale! (2 Tim. 3:1-5) Putyina tuovola okupakela onomphangu vakuetu nokutambula omikanda omipe tuapewa motyonge, hatyiwako okupaka vala omahando etu komutwe tyipona avakuetu. (1 Cor. 10:23, 24) Etyi onthiki yotete akala potyonge tyononthiki ononthatu, omulume umwe wasuka wati: “Ame hihinangela elongomona nalike mahi ovituwa vio nombangi vianthyuvisa unene.”
4. Omokonda yatyi tuesukisila okuliava opo tuundape motyonge?
4 Okuliava Tyihakuluminyua: Ovakristau votyotyili valekesa otyituwa tyokuliava tyihakuluminyua. (Sal. 110:3) Okuti upondola okuliava opo ukuatesako ovilinga vio motyonge? Motyonge tyimwe ankho ovakuatate vehungi po 600 nonomphange veliavele opo vasukule pomphangu yotyonge. Ovanthu vetyimona vapopia okuti: “Otyipuka tyihuvisa unene okutyitala! Okutala ovanthu ovo aveho veliava.” Tuna ehambu nokukevelela otyonge tyenima lio 2013 iya kamatukala vala nomphitilo yokutehelela nokulongeswa na Huku mahi tupu tuhanda okumuhivilika.
[Okakasa pefo 3-6]
Omahinangeleso Otyonge Tyononthiki Ononthatu tyo 2013
◼ Oola Otyonge Matyihimbika: Mononthiki ambuho ononthatu omapito maaikulwa 6h00. Otyonge matyihimbika 8h20. Putyina otyiimbo tyamahimbika okuhika, atuho tuna okuenda ponomphangu mbetu, opo otyonge tyihimbike monkhalelo yaongana. Mutano, no Tyasapalo otyonge matyimanuhuka 15h55 iya Tyalumingu tyimanuhuka 14h40.
◼ Apa Patalamena Omatuku-tuku: Ponomphangu mapatalamena omatuku-tuku avana maveya kotyonge kambufetelwa, mahi omatuku-tuku ena okukalela omu ehikila. Nawike upondola okupaka etuku-tuku pomphangu papakelua ovilema. Mokonda omphangu yokutalamena omatuku-tuku onthutu, muhaetei omatuku-tuku omanyingi, ombunga ike ipondola vala okueta etuku-tuku like inkha vafuamo aveho.
◼ Okupakela Vakuetu Onomphangu: Tupakela vala onomphangu ovanthu vana tuendela navo metuku-tuku like ine ovo vana tukala navo meumbo like, na vana tulongesa Ombimbiliya. Ovipundi viapakelwa vana vakulupa no vokuvela kavihi, katyitavela ombunga vaumphame navo. Mbambavo yekelei onomphangu ombo vana vakulupa na vana vavela na vana vevekuatesako.—1 Cor. 13:5.
◼ Okulia: Mbambavo etelela okulia kuove, opo uhatunde pomphangu yotyonge pala okukalanda okulia mokueenda kuomuvo wokuomba. Upondola okutyinda okulia kuove mosaku onthutu itavela okupaka mombuelo yotyipundi tyove. Onosaku ononene, novipuka vityatyuka, novikunwa vikoleswa, kavipondola okutualwa pomphangu yotyonge. Mahi, mutavelwa vala omapindi ono ngasosa alandeswa potyonge.
◼ Oviawa Viotyali: Tupondola okulekesa olupandu luetu mokuava onombongo motyonge pala okuvatela ovilinga via Huku mouye auho.
◼ Ovihemba: Inkha ukahi nokunwa ovihemba, vietelela mokonda hamwe motyonge mutupu ovihemba ovio.
◼ Ononkhaku: Kese enima ovanthu velipumapo mokonda yononkhaku. Otyiwa okuvala ononkhaku mbutavela okuenda, tyilinge metapalo ine okonondondelo.
◼ Otyonge Tyelaka Lionompholo lio Angola: Otyonge otyo matyilingilwa kondyuo yovionge ko Ex-Seart, okuhimbikila mo 11-13/10/2013.
◼ Outuku-tuku Wokutyinda Ovana: Katupondola okutuala outuku-tuku oo pomphangu yotyonge. Opo mutyivile okuyunga vali nawa ovana venyi, vaumphame ponthele yenyi. Elondolo eli o pala vana mavalingila ovionge ponomphangu mbokusana ombola.
◼ Omuniko: Ovionge ovinyingi vihole okulingilwa monondyuo mbaikwa iya opo mufile omphepo mupakwa ovifilamphepo ine muna vala oundyanena oututu. Moluotyo, otyiwa okuhawave omilela vinika unene, no noperfume mbupondola okulinga omapita vana vavela monthulo, navakuavo vokuna ovitateka konthele yovipuka ovio.—1 Cor. 10:24.
◼ O Formulariu Queira Visitar (S-43): Tuna okuundapesa o formulariu Queira Visitar tyina tuavasa omunthu wesuka notyili pokuava oumbangi motyonge. Inkha wahoneka oformulariu oyo, upondola okuviavela ovakuatate vaundapa mo Seketa Yomikanda, ine omuhoneki weuaneno liove tyina wamakondoka keumbo.
◼ Vokueliava Pala Okuundapa Motyonge: Ehambu matukala nalio tyina tukahi motyonge maliliyawisa inkha tuliava pala okuundapa. (Atos 20:35) Kese umwe uhanda okuvatela motyonge aye Koseketa Yokuliava Pala Okuundapa Motyonge. Ovana nkhele vehena omanima 16 navo vapondola okuundapa, mahi vena okuundapa novohe ine omukulu omukuavo.