‘Ehando Lia Huku Lilingwe’
1. Oipi osapi yotyonge tyonthiki ike tyenima lio 2012, iya omokonda yatyi tyaviuka okulilongesa onondaka ombo?
1 Onthue tualingwa mokonda yehando lia Jeova. (Rev. 4:11) Mahi, inkha katulilongesa nokulinga ehando lia Huku kamatutyivili okulinga etyi Jeova ahanda. Otyo katyapepukile, mokonda tuna okulwa neyembelo “liokulinga ovipuka viomahando olutu no omalusoke omutima” ine “okulinga ehando liomalongo.” (Efé. 2:3; 1 Ped. 4:3; 2 Ped. 2:10) Tyihena ombatelo ya Huku, tupondola “okukuatwa nomuenyo [Neliapu] pala ehando liae.” (2 Tim. 2:26) Otyonge tyetu tyonthiki ike tyenima lio 2012, matyikuatesako kese umwe puonthue okulinga etyi tyelikuata nelikuambelo Jesus alongesa ovalongwa vae liati: “Ehando liove lilingwe.”—Mat. 6:9, 10.
2. Omapulo patyi maakumbululwa mokueenda kuotyonge?
2 Omapulo Maakumbululwa: Putyina utehelela otyonge, ovola omakumbululo omapulo aa: Oityi tyakolela vali tyipona okutehelela Ondaka ya Huku? Oñgeni tupondola okunoñgonoka olipi ehando lia Huku pala onthue? Omokonda yatyi tuesukisila okukala tyafuapo pala okukuatesako ovanthu aveho? Oñgeni tupondola okuvasa ehambu liotyotyili momuenyo? Vakuendye novahikuena, oityi muesukisa okulinga opo muumbile Jeova? Ondyambi patyi itundilila kokulinga ehando lia Huku? Omokonda yatyi tyakolela unene okupameka nokuavela ondundo vakuetu?
3. Oñgeni tupondola okupola esilivilo kotyonge tyonthiki ike?
3 Linga ononkhono opo ukale potyonge nokutehelela nawa. Omukuatate umwe woko Mbetele ine omutalelipo womawaneno matumwa opo akale omulongomoni omuenda. Tyina otyonge tyihenehimbike ine tyina tyamanuhuka mupondola okutomphola nae nomukai wae inkha ena. Tyina wamakondoka keumbo, uhakale “omuteheleli ulimbuako,” mahi pitulula nombunga etyi weiva nokutomphola oñgeni mupondola okutyinda omuenyo welikuata nehando lia Huku.—Tia. 1:25.
4. Omokonda yatyi tyakolela okulinga tete ehando lia Huku?
4 Apa katutu, vana vaovola okulinga omahando avo muene nokuanya okutavela ehando lia Jeova mavahanyaunuako. (1 João 2:17) Ngotyo, tupandulei Jeova wapongiya otyonge etyi opo tyitukuateseko okupaka tete momuenyo wetu okulinga ehando lia Huku!