Kuatesako Ovanthu Okutehelela Huku?
1. Onombrochula patyi tuapewa motyonge tyononthiki ononthatu “Ouhamba wa Huku Uye!” Omikanda ovio oviti oviwa mokonda yatyi?
1 Motyonge Tyononthiki Ononthatu tyosapi yati “Ouhamba wa Huku Uye!” Tuapewa onombrochula onombali, imwe yati, Tehelela Huku opo Ukale Nomuenyo Wahapu, no yokuapepuka vali yati Tehelela Huku. Mokonda mbuna onondaka mbehehi, tyapepuka okumbupitiya tyihasete. Ombrochula Tehelela Huku opo Ukale Nomuenyo Wahapu, yapitiyua momalaka 431 etyi tueipewa.
2. Ovalie haunene mavapolo esilivilo ko nombrochula ombo?
2 Ovalie haunene mavapolo esilivilo ko nombrochula ombo? Tala ononkhalelo mambulandulako mbuhole okumoneka unene ouye auho:
• Omuivisi umwe upopia nomunthu avasa, tyilinge otyikando tyotete ine o puetyi akondoka ko, wimbuka okuti omunthu oo ketyii okutanga ine utanga vala katutu.
• Omuivisi wivisila ovanthu vapopia elaka liokuna vala omikanda vihehi viapitiyua ine lihena omikanda. Ine ovanyingi motelitoliu kavetyii okutanga elaka vapopia vali nawa.
• Omuivisi wivisa melaka liovimpholo motelitoliu yae.
• Ovohe vahanda okulongesa ovana vavo ovatutu nkhele vehetyii okutanga.
3. Oñgeni ombrochula Tehelela Huku yapongiyua?
3 Oñgeni Mbapongiyua: Ombrochula Tehelela Huku ina vala onondaka mbuhehi, mbapepuka no notestu pombuelo ya kese efo mbutoneka ononthele mbavilapo. Omokonda yatyi? Nkhele soka ñgeno omunthu ukuavela ombrochula yahonekwa melaka ove uhei nokuhevili okutanga. Okuti ñgeno wasuka nayo, namphila ina omalutalatu omawa? Au, kusuku nayo. Tupu, ovanthu vehetyii okutanga kavesuku nomikanda vina onondaka. Moluotyo, kese efo pena omalutalatu apongiyua nawa, nokamunthinda kalekesa olutalatu malulandula kolukuavo pokutomphola.
4. Oñgeni ombrochula Tehelela Huku opo Ukale Nomuenyo Wahapu, yapongiyua?
4 Ombrochula Tehelela Huku opo Ukale Nomuenyo Wahapu, ina omalutalatu elifwa no ombrochula Tehelela Huku. Yalingwa pala okulongesa vana vatanga vala katutu ine vekahi nokulilonga okutanga. Tupu, omuivisi upondola okuundapesa ombrochula oyo, tyina elilongesa nomunthu una ombrochula Tehelela Huku. Konthyimbi ya kese longeso kokumbili, kuna epulo malikumbululwa pomafo elongeso olio. Muna omalutalatu nonondaka no notestu. Pombuelo yomafo omanyingi pena okakasa kena ononthele ononkhuavo no notestu pala okutomphola nomulongwa, tyitei kenoñgonoko liae.
5. Onalupi, no ñgeni matuave onombrochula ombo?
5 Oñgeni Mbuundapeswa: Upondola okuava kese imwe movilinga viove umbo na umbo, tyina utala okuti maikuatesako omunthu, namphila ohanyi oyo kambukahi nokuawa. (Tala okakasa kati: “Oñgeni Mbupondola Okuawa.”) Tyina utalelapo omunthu wesuka, upondola okupopia vala okuti una otyipuka uhanda okumulekesa, iya omuavela ombrochula.
6. Oñgeni matulilongesa nomunthu onombrochula ombo?
6 Mokonda ombrochula Tehelela Huku kayalingilwe nomapulo, kaililongeswa okulinga omapulo nomakumbululo ngetyi tulinga pokulilongesa omukanda Ombimbiliya Ilongesa. Kese muhoko ovanthu vehole okutehelela omahipululo. Ngotyo, undapesa omalutalatu opo upopie omahipululo avasiwa mo Mbimbiliya. Hangununa oityi omalutalatu oo alekesa. Popia noundyandyi. Ita omulongwa apopie etyi asoka. Tanga onotestu mbukahi pombuelo yefo, otomphola nae etyi mbupopia. Mulinga omapulo opo nae apopie, iya otale inkha wetyinoñgonoka nawa. Inkha ukahi nokuundapesa ombrochula Tehelela Huku opo Ukale Nomuenyo Wahapu, tanga nae onondaka mbukahipo no notestu tyina mupopia kese lutalatu.
7. Oñgeni matukuatesako omulongwa Wombimbiliya okukula?
7 Kuatesako Omulongwa Okukula: Tukevelela okuti elilongeso lienyi malipe omulongwa ehando liokulilongesa okutanga, opo anoñgonoke Jeova nehando liae. (Mat. 5:3; João 17:3) Ngotyo, inkha mulilongesa ombrochula Tehelela Huku, tyina utala okuti omulongwa wesuka umwe, upondola okumukuatesako okulilongesa okutanga, iya konyima amunyingila mo mbrochula Tehelela Huku opo Ukale Nomuenyo Wahapu. Tyina omulongwa amana okulilongesa onombrochula ombo, nkhele kapondola okumbatisalwa. Wesukisa okulilongesa nae omukanda Ombimbiliya Ilongesa ine omukanda omukuavo maumuvatela okunoñgonoka vali nawa Ombimbiliya.
8. Omokonda yatyi upandulila oviti ovio ovipe pala ovilinga viokuivisa?
8 Ovanthu vena okutehelela Ohamba youye auho, inkha vahanda okukala nomuenyo uhapu. (Isa. 55:3) Jeova uhanda “ovanthu vatyo aveho,” na vana vehetyii okutanga, velilongese okumutehelela. (1 Tim. 2:3, 4) Tupandula unene ngatyi oviti ovio ovipe, tupondola okulongesa navio ovanthu okutehelela Huku!
[Ehangununo liolutalatu pefo 3]
Oñgeni Matumbuave
Lekesa omunthu pomafo 2-3, opopi okuti: “Uhanda okukala mouye ukahi ngou weete apa? [Yeka akumbulule.] Ovihonekwa [ine, omukanda ou ukola vilaa] okuti apa katutu Huku maeta ouye omuwa, wombembua muna muhakakala nawike omuhepi nouvela. Tala oityi tuna okulinga opo tukakale mouye oo. [Tanga Isaías 55:3, yapopiwa peulu liefo 3.] Itukonga opo ‘tuende ku’ Huku ‘nokumutehelela.’ Mahi oñgeni matutehelela Huku?” Ikula pomafo 4-5 iya otomphola nae konthele yekumbululo. Inkha utupu omuvo, musila ombrochula omulae onalupi moya opo mupopie konthele yekumbululo.