“Kala Nombembwa Novanthu Aveho”
1. Elondolo patyi Liombimbiliya tuna okulandula tyina tupopia nomunthu anumana?
1 Ovanthu va Jeova vehole ombembwa, iya ovilinga vietu vieta ombembwa. (Isa. 52:7) Pamwe tuvasa ovanthu vanumana tyina tupopia navo. Oityi matyitukuatesako okukala ovana-mbembwa?—Rom. 12:18.
2. Omokonda yatyi tyakolela okukala ovana-ndunge?
2 Kala Omuna-ndunge: Namphila ovanthu vamwe tyina tupopia navo kavahambukwa mokonda veyele otyili, ovakuavo vanumana mokonda yovipuka vimwe veiva konthele yetyi tupopia. Pamwe tuvevasa momuvo vahahambukilwe. Omunthu pamwe unumana mokonda yotyitateka tyimwe. Alo umwe tyina upopia nae ondaka ya Huku tyimunumanesa, onthwe tuna okuhinangela okuti valinga ngotyo mokonda vayondyua. (2 Cor. 4:4) Okukala ovana-ndunge tyitukuatesako okukala tyahiliya, atuhanumana.—Prov. 19:11.
3. Oñgeni tuna okukala nonthilo novanthu tuvasa?
3 Kala Nonthilo: Ovanyingi motyilongo tyetu vapamena momatavelo avo. (2 Cor. 10:4) Ovo vapondola okuholovona etyi vahanda okutehelela. Katupondola okutomba ovanthu vena omatavelo avo ine okukala ngatyina onthwe tuakolela vali. Inkha vaanya okupopia nonthwe katuvekuluminya.
4. Oityi tyihangununa okukumbulula nawa?
4 Kumbulula Nawa: Alo umwe inkha ovanthu vetupopia omapita, tuna okulekesa okuti tuna onthilo nokupopia nawa. (Col. 4:6; 1 Ped. 2:23) Onthwe katuovola okutañguna, mahi tupopia etyi omunthu ahanda okutehelela. Nouwa-tima tupondola okumupula oityi ehetavelela. Opo tulityilike okumunumanesa, pamwe otyiwa okuteta etompho.—Prov. 9:7; 17:14.
5. Ouwa patyi utundilila kokukala ovana-mbembwa movilinga viokuivisa?
5 Inkha tukala ovana-mbembwa, omunthu upondola okutyihinangela, atehelela onthiki onkhuavo tyina avasa umwe umupopila ondaka ya Huku. (Rom. 12:20, 21) Alo umwe inkha nkhele utualako okuhetavela, nthiki imwe upondola okutavela akala ombangi. (Gál. 1:13, 14) Namphila inkha ketavelele otyili, onthwe tunkhimaneka Jeova nokuhiwisa etyi tulongesa tyina tulikondola omutima nokukala ovana-mbembwa.—2 Cor. 6:3.