Otyonge Tyononthiki Ononthatu
Otyiimbo matyihimbika 8:20 mononthiki ambuho ononthatu. Putyina otyiimbo tyamahimbika okuhika, tuna okuenda ponomphangu mbetu, opo otyonge tyihimbike monkhalelo yaongana. Mutano, no Tyasapalo otyonge matyimanuhuka 15:55, Tyalumingu 14:40.
Ononthele ambuho mbotyonge mbuhika noviimbo nkhele viokutehelela vala. Oviimbo ovio ha pala vala okutuhambukiswa kuapwa, mahi vitunoñgonokesa Jeova nokumufenda. Moluotyo, putyina omuhongoli amapopi okuti otyiimbo matyihimbika, oo omuvo wokupumphama iya atutehelela otyiimbo nehambu, amuhahipulula vala. Mokulinga ngotyo matulekesa okuti tuahumba ononkhono mbovakuatate vena otyilinga tyokulinga oviimbo (orquestra Watchtower). Ovakuatate ovo nonomphange, valinga oungendi ovikando vivali menima, nonombongo mbavo muene, pala okuenda ko Patterson, Nova York, opo vakalinge oviimbo ovio pala ehambu lietu. Putyina tuamatehelela oviimbo viotete, atuho tuna okuimbila kumwe tunkhimaneke Jeova mokuimba oviimbo vietu Viouhamba.
Mokonda omphangu yokutalamena omatuku-tuku onthutu, muhaetei omatuku-tuku omanyingi, lipakeleimo opo muendele vala metuku-tuku like inkha aveho vafuamo. Vana vatyinda ovilema ine ovavei ovo vala vena okupaka etuku-tuku pomphangu vapakelua.
Tala komasuka-suka avakuenyi, namphila pamwe upondola okupumbwa apa ankho uhanda okupumphama mokonda ya vakuenyi. Okuhaovola omasuka-suka etu vala tyilekesa okuti tuvakristau votyotyili iya atuhilivika Huku. (João 13:34, 35; 1 Cor. 13: 5; 1 Ped. 2:12) Upondola okupakela vala onomphangu vana weya navo metuku-tuku like ine ovo vana ukala navo meumbo like, na vana ulongesa Ombimbiliya. Mbambavo wahapake ovipuka viove pomphangu yeheyove. Okulinga ngotyo tyikuatesako vakuenyi vaovola onomphangu, vamone okuti petupu ovanthu mavaumphamapo. Vokuakulupa no vokuvela vapakelwa ovipundi viavo. Mokonda ovipundi kavihi, papumphama vala wike ine vevali maveveyungu.
Alo umwe tyina tulihonekesa pala okunyingila mo wotele ine okutundamo ine tyina otyonge tyamapu, tuna okuvala ovikutu vikahi nawa, viasukuka. Ngotyo matuhambukwa tyina tukahi movionge vietu nokuhakala nohonyi tyina tuamavasi onomphitilo mbokuava oumbangi. Ovituwa vietu oviwa nomuvalo wetu omuwa tuvala tyina tuenda kotyonge, kamaukuatesako vala ovanthu vomitima omiwa, avetavela ondaka ya Huku Ombimbiliya, mahi tupu matyietela ehambu Jeova.—Sof. 3:17.
Inkha tuna omakina yokukayula, ine ovikuavo vali, matulekesa okuti tuesuka navakuetu putyina tuheyuvikiya. Tupu matulekesa okuti tuna ovituwa oviwa, putyina tuhelihonekela onomesase mokuenda kuotyonge.
Upondola okutyinda okulia kuove mosaku onthutu itavela okupaka mombuelo yotyipundi tyove. Onosaku ononene, novipuka vityatyuka, kavipondola okutualwa motyonge.
Una uhanda okuava oviawa no cheque, una okuihoneka menyina lio “Associação das Testemunhas de Jeová.” Tupu oviwa vipondola okulingwa notyikalatau tyokulevala kombango.
Vana vavela vesukisa okutomwa nononguya tyina vekahi motyonge, kavapondola okumbuyumba pana papakwa esilo, tyilinge motyonge ine mo wotele, mokonda ovanthu vapondola okuliyaha-ko.
Omanima aeho ovanthu ovanyingi vehole okulipumapo ine okutingusuka haunene omokonda yokuvala ononkhaku mbayeluka unene. Otyiwa okuvala ononkhaku mbukahi nawa mbutavela okueenda pana payendama, nokulonda ponondondelo ine popakuavo vali.
Opo mutyivile okuyunga nawa ovana venyi, vaumphame ponthele yenyi.
Moluotyo, otyiwa okuhawave omilela nokulipaka onoperfume mbunika unene, mokonda mbupondola okulinga omapita vana vavela, na vakuavo vokuna ovitateka viokuhitakana.—1 Cor. 10:24.
Inkha wahoneka o formulariu oyo, upondola okuyavela ovakuatate vaundapa mo Seketa Yomikanda, ine omuhoneki weuaneno liove.
Okuvala nawa tyilekesa okuti Tuvakristau. Avela etyi una ovanthu vokuava inkha otyo tyilingwa.
Vokuliava Pala Okuundapa Motyonge: Una uhanda okuundapa motyonge aye Koseketa Yovokuliava Pala Okuundapa Motyonge. Ovana nkhele vehena omanima 16 navo vapondola okuundapa, mahi vena okuundapa no vohe ine omukulu omukuavo.