Oviimbo Ovipe Mefendelo!
1 Meliongiyo lienima lio Watch Tower Bible and Tract Society of Pennsylvania, (Sociedade Torre de Vigia de Bíblias e Tratados de Pensilvânia) lialingwa monthiki 4 ya Kulindi yo 2014, muapopiwa eiviso liati omukanda wetu woviimbo mautalwa vali nawa. Tyotyili eiviso olio lietuhambukiswa unene! Aveho vakalele-po, vahinangeleswa esilivilo enene oviimbo Viouhamba vina mefendelo lietu.—Sal. 96:2.
2 Hamwe upondola okulipula okuti, ‘omokonda yatyi omukanda woviimbo wesukisila okutalwa nawa?’ Kuna omahunga omanyingi. Tyotyili enoñgonoko lietu konthele Yovihonekwa litualako okuyandyululwa, iya otyo tyesukisila okuviukisa oviimbo vietu. (Pro. 4:18) Ehunga ekuavo tuesukisila okuviukisa oviimbo vietu olieli: Onondaka ononyingi mbukahi momukanda ou woviimbo tuna, mbapolelwe Mombimbiliya Tradução do Novo Mundo yokuatalwa nawa. Oviimbo vietu pahe vina okuviukiswa opo vilikuate Nombimbiliya omphe. Tunde etyi tuahimbika okulinga eviukiso olio liesukisa liokutala vali nawa oviimbo vietu, kualingwa etokolo liokuyawisa oviimbo ovipe momukanda wetu woviimbo.
3 Okuti tuesukisa okukevela omukanda omupe opo tuhimbike okuimba oviimbo ovipe? Au. Tuna ehambu liokumupopila okuti monohanyi mambulandulako oviimbo ovio ovipe mavipakwa mo site yetu, jw.org. Tyina oviimbo ovipe viameya, inkha otyiimbo matyiimbwa otyipe matyipakwa konthyulilo Yeliongiyo Liovilinga, apahonekwa onondaka, “otyiimbo otyipe.”
4 Oñgeni Matulilongesa Oviimbo Ovipe: Tyipondola okupuiya okuimba otyiimbo otyipe. Ngetyi tyalingile omuhoneki wo Salmu, tuhanda okuimba momaliongiyo etu ewaneno, “atuhakala tyahaimbi.” (Sal. 30:12) Opo utyivile okuimba otyiimbo otyipe, linga ñga:
Wana-wana okutehelela oviimbo viangalavalwa viahikwa no piano, mavipakwa mo site yetu. Tyina wamatehelela ehimbwe, matyikupepukila okuhinangela oviimbo ovio.
Lilongesa onondaka mboviimbo, na vikale momutwe.
Tehelela oviimbo otyo utala onondaka mbavio. Linga ngotyo alo utyivila nawa.
Okulilongesa oviimbo ovipe mokamuvo kehehi Mefendelo lienyi Liombunga matyimukuatesako.
5 Tyina otyiimbo otyipe tyameya Meliongiyo Liovilinga, ewaneno malitehelela oñgeni otyiimbo otyo tyahikwa no piano. Ovateheleli mavaimbi okulandula motyiimbo tyahikwa no piano, ngetyi tulingale noviimbo ovikuavo.
6 Tyina usoka konthele yotyo, okuimbila momaliongiyo etu tukala nomphitilo yokuwaneka kumwe onondaka mbetu opo tuhilivike Jeova. Ngotyo, tuna okulityilika otyituwa tyokulupauka tyina tyehesukisile momuwo wokuimba oviimbo momaliongiyo etu.
7 Kuna onkhalelo onkhuavo yokulekesa ehumbilo ewa noviimbo vietu. Tyina kuakamba katutu opo otyonge tyihimbike, kuhika otyiimbo. Momanima evali, ovakuatate vetu no nomphange vatunda movilongo vielikalaila, valinga oungendi okuenda ko Patterson, Nova York, opo valinge oviimbo vietu viefendelo. Ngotyo, tyina omuhongoleli etuita tuende ponomphangu mbetu otyo tutehelela oviimbo viangalavalwa, tukahi nokulinga nawa. Okulinga ngotyo tyitukuatesako okupaka nawa omutima opo tutehelele etyi matyipopiwa.—Esd. 7:10.
8 Hono matumanuhula eliongiyo lietu notyiimbo otyipe tyati: “Ouhamba Ukahi Nokutumina!” Otyiimbo otyo, tyapopiwa unene meliongiyo lienima liokualamba, haunene tyalingwa pala okulekesa okuti Ouhamba wa Huku ukahi nokutumina omanima 100 tunde etyi waviala.
9 Oviimbo ovipe tyotyili “ovipuka oviwa” viatunda ku Jeova. (Mat. 12:35a) Tulingei atyiho opo tulilongese oviimbo ovipe nokuviimba nomutima auho opo tuavele ehiliviko ewa nehumbilo Huku yetu!—Sal. 147:1.