Mohanyi ya Setembro Matuovola Ovanthu Vesuka Nokulongesiwa Ombimbiliya

Mohanyi ya Setembro matulikuatehila tuende momaumbo ovanthu, tukevepopile okuti tulongesa ovanthu Ombimbiliya. Matuhimbika etompho nombulusula Kalako Nomwenyo Apeho!. Vokuhanda okukala ovakokoli-ndyila vapola pokati mohanyi oyo, vapondola okuundapa onoola 30. Mahi muene-muene matuundapa ñgeni?

• Etyi tupondola okulinga metompho liotete: Opo omunthu akale nolumbwe netyi momupopila, linga epulo lili pefo 16, amutomphola evi vili-po umulekese oñgeni tulongesa ovanthu Ombimbiliya. Soka kovanthu vekutehelele-ale nawa, no kuava watile mandyiya vali. Hamwe vamwe pana ankho kavesukile-ale nokulilongesa Ombimbiliya. Mahi ine uvepopila oñgeni pahe tulongesa Ombimbiliya, hamwe pahe vapondola okutambula omukanda avetavela okulilongesa. Pahe ine tuenda meumbo limwe atuhavasi-mo omunthu? Opo katupondola okusapo ombulusula. Okomisau Yovilinga maimupopila ononthiki mamulingi omaliongiyo okukaivisa mokueenda kuohanyi.

• Tyina tuli nokulinga ovilinga ovikuavo: Ine mewaneno lienyi muundapa nokatuku-tuku komikanda, paka-mo ombulusula Kalako Nomwenyo Apeho!. Ine peya omunthu apolopo ombulusula, mupopila okuti tupu mupondola okumulongesa Ombimbiliya, omulekesa umwe oñgeni tyililongeswa. Ine pola opo kamuetyivilile okulilekesa, mupopila okuti moya okutyilinga monthiki onkhuavo. Omukulu wovilinga hamwe upondola okupopila ovaivisi vamwe vetyivila okulongesa nawa vende vakaave ombulusula ava vaundapa mono venda, hamwe vetavela okulongeswa. Na tyina weheli movilinga viokuivisa upondola okuavela ovanthu ombulusula, ava muundapa navo novanthu ovakuavo vali, ovepopila okuti omo tulongesa ovanthu Ombimbiliya.

Sesusi wetutuma ‘tulongese ovanthu’ “vakale ovalongwa.” (Mat. 28:19, 20) Otyilinga etyi otyinene matulingi mohanyi ya Setembro nomikanda Kalako Nomwenyo Apeho!, opala tutyivile umwe okulongesa ovanthu vakale ovalongwa.